Ekyabalamuzi 11:1-40 LGCB2014 - Bible AI

¹Yefusa Omugireyaadi yali mulwanyi wʼamaanyi; kitaawe yamuzaala mu malaaya.

²Mukazi wa Gireyaadi yali amuzaalidde abaana aboobulenzi, era abaana bʼomukazi oyo bwe baakula, ne bagobaganya Yefusa nga bagamba nti, “Tolisikira wamu naffe ku bintu bya kitaffe, kubanga kitaffe yakuzaala mu mukazi mulala.”

³Awo Yefusa nʼadduka baganda be, nʼagenda nʼabeera mu nsi ye Tobu. Abasajja abataaliko kigendererwa ne bakuŋŋaana gyʼali ne bamugoberera.

⁴Oluvannyuma lwʼebbanga abaana ba Amoni ne bakola olutalo ku Isirayiri.

⁵Awo abaana ba Amoni bwe baali nga balwana ne Isirayiri, abakadde abʼe Gireyaadi ne bagenda okukima Yefusa mu nsi ya Tobu.

⁶Ne bagamba Yefusa nti, “Jjangu otukulembere tulwanyise abaana ba Amoni.”

⁷Yefusa nʼagamba abakadde bʼe Gireyaadi nti, “Temwankyawa ne mungoba mu nnyumba ya kitange? Lwaki kaakano mujja gye ndi nga mulina ekizibu?”

⁸Abakadde bʼe Gireyaadi ne bagamba Yefusa nti, “Tuzze gyʼoli kaakano, ojje ogende naffe, olwanyise abaana ba Amoni, nʼoluvannyuma onoobeera mukulembeze wʼabo bonna ababeera mu Gireyaadi.”

⁹Yefusa nʼabaddamu nti, “Singa munzizaayo ne nnwana nʼabaana ba Amoni, Mukama nʼabampangusiza, nʼabeera omukulembeze wammwe?”

¹⁰Abakadde bʼe Gireyaadi ne baddamu Yefusa nti, “Mukama ye mujulirwa waffe, bwe tutaatuukirize kigambo ekyo.”

¹¹Awo Yefusa nʼagenda nʼabakadde bʼe Gireyaadi, abantu ne bamufuula omukulembeze waabwe era omuduumizi, nʼaddamu ebigambo byonna bye yayogera mu maaso ga Mukama mu Mizupa.

¹²Yefusa nʼatuma ababaka eri kabaka wʼabaana ba Amoni, ngʼamugamba nti, “Onnanga ki ggwe, okujja gye ndi, olwanyise eggwanga lyange?”

¹³Kabaka wʼabaana ba Amoni nʼaddamu ababaka ba Yefusa nti, “Kubanga Isirayiri bwe baali bava e Misiri baatwala ensi yange okuva ku Alunoni ne ku Yabboki nʼokutuukira ddala ku Yoludaani. Kaakano gituddize lwa mirembe.”

¹⁴Awo Yefusa nʼaddamu nʼaweereza ababaka eri kabaka wʼabaana ba Amoni

¹⁵ngʼagamba nti,

¹⁵“Yefusa bwʼati bwʼayogera nti, ‘Isirayiri teyatwala nsi ya Mowaabu newaakubadde ensi yʼabaana ba Amoni.

¹⁶Naye Isirayiri bwe baava mu Misiri ne baba nga bayita mu ddungu nga balaga ku Nnyanja Emyufu nʼe Kadesi,

¹⁷Isirayiri yatuma ababaka eri kabaka wa Edomu nga bamusaba bayitemu buyisi mu nsi ye. Naye ye teyabawuliriza. Isirayiri nʼatuma nʼababaka eri kabaka wa Mowaabu, naye nʼatabakkiriza kuyitamu. Isirayiri kyeyava asigala e Kadesi.

¹⁸Awo Isirayiri nʼalyoka ayita mu ddungu ne yeetooloola ensi ya Edomu nʼensi ya Mowaabu, nʼayita ku luuyi olwʼebuvanjuba obwʼensi ya Mowaabu, ne basiisira emitala wa Alumoni ku nsalo ya Mowaabu.

¹⁹Awo Isirayiri nʼatuma ababaka eri Sikoni kabaka wʼAbamoli era kabaka wʼe Kesuboni, ngʼamusaba ngʼagamba nti, Tukkirize tuyitemu tulage mu nsi yaffe.

²⁰Naye Sikoni nʼateesiga Isirayiri kuyita mu nsalo ye, era Sikoni nʼakuŋŋaanya abantu be bonna, ne basiisira mu Yakazi, nʼalwanyisa Isirayiri.’

²¹Mukama Katonda wa Isirayiri nʼagabula Sikoni nʼabantu be bonna mu mukono gwa Isirayiri, nʼabawangula, era Isirayiri nʼatwala ensi yonna eyʼAbamoli.

²²Ne bawamba ensalo yonna eyʼAbamoli okuva ku Alumoni okutuuka ku Yabboki, nʼokuva ku ddungu okutuuka ku Yoludaani.

²³Kaakano obanga Mukama Katonda wa Isirayiri yagoba Abamoli mu maaso gʼabantu be Isirayiri, ggwe ani okulwanyisa Isirayiri?

²⁴Lwaki totwala ensi lubaale wo Kemosi gye yakuwa, naffe ne tutwala eyo Mukama Katonda waffe gye yatuwa?

²⁵Ddala ddala osinga Balaki mutabani wa Zipoli kabaka wa Mowaabu? Yali akaayanyizza Isirayiri wadde okubalwanyisa?

²⁶Isirayiri emaze emyaka ebikumi bisatu mu Kesuboni nʼebyalo byayo, ne mu Aloweri nʼebyalo byayo, ne mu bibuga byonna ebiri ku lubalama lwa Alunoni. Kiki ekyabalobera okubyeddiza mu kiseera ekyo?

²⁷Kaakano sirina kye nkusobezza naye ggwe onnumbye okulwana nange. Kale Mukama, Omulamuzi, leero alamule wakati wʼabaana ba Isirayiri nʼabaana ba Amoni.”

²⁸Naye kabaka wʼabaana ba Amoni nʼatassaayo mwoyo ku bubaka Yefusa bwe yamutumira.

²⁹Awo Omwoyo wa Mukama Katonda nʼajja ku Yefusa; Yefusa nʼasomoka Gireyaadi ne Manase, nʼayita ne mu Mizupa ekyʼe Gireyaadi, era mu Mizupa ekyʼe Gireyaadi gye yava okulumba abaana ba Amoni.

³⁰Yefusa ne yeeyama eri Mukama Katonda ngʼagamba nti, “Bwʼonogabula abaana ba Amoni mu mukono gwange,

³¹ekintu kyonna ekirifuluma mu nzigi zʼennyumba yange nga nkomyewo mu buwanguzi, ne kinyaniriza nga nva mu baana ba Amoni, ndikiwaayo ngʼekiweebwayo ekyokebwa eri Mukama.”

³²Awo Yefusa nʼalumba abaana ba Amoni nʼabalwanyisa, era Mukama Katonda nʼabagabula mu mukono gwe.

³³Nʼabakuba okuva ku Aloweri okutuuka e Minnisi, byʼebibuga amakumi abiri, nʼokutuukira ddala ku Aberukeramimu; nʼabakubira ddala era abaana ba Isirayiri ne bawangulira ddala abaana ba Amoni.

³⁴Awo Yefusa bwe yakomawo e Mizupa mu maka ge, laba muwala we nʼajja okumukulisaayo ngʼakuba ebitaasa era ngʼamuzinira. Ye mwana yekka gwe yalina.

³⁵Yefusa bwe yamulaba, nʼayuza engoye ze, nʼayogera mu ddoboozi eryʼomwanguka nti, “Zinsaze muwala wange. Onnakuwazizza nnyo, era ondeetedde ennaku, kubanga neeyama eri Mukama Katonda, so siyinza kukimenyawo.”

³⁶Awo muwala we nʼamugamba nti, “Kitange weeyama eri Mukama. Kola ekyo kye weeyama eri Mukama Katonda, kubanga awooledde eggwanga ku balabe bo, abaana ba Amoni.”

³⁷Nʼagamba kitaawe nti, “Nkusaba ekintu kimu kyokka, onzikirize ŋŋende ne mikwano gyange mu nsozi okumala emyezi ebiri, ne kaabireko kubanga ndi mbeerera.”

³⁸Nʼamugamba nti, “Genda.” Nʼagenda nʼamala emyezi ebiri mu nsozi ngʼali ne bawala banne nga yeekaabirako olwʼokuba yali mbeerera.

³⁹Oluvannyuma lwʼemyezi ebiri, omuwala nʼakomawo eri kitaawe, era kitaawe nʼamuwaayo eri Mukama, nga bwe yeeyama.

³⁹Yali muwala mbeerera, ngʼempisa bwe yabanga mu Isirayiri.

⁴⁰Kyafuuka mpisa okuva mu biro ebyo, nti abawala mu Isirayiri bajjukira muwala wa Yefusa Omugireyaadi okumala ennaku nnya buli mwaka.