Ekyabalamuzi 12:1-15 LGCB2014 - Bible AI

¹Abasajja ba Efulayimu ne bayitibwa okusomoka okulaga mu Zafoni. Ne bagamba Yefusa nti, “Lwaki wagenda okulwanyisa abaana ba Amoni, nʼotatuyita kugenda naawe? Tugenda kukwokera mu nnyumba yo.”

²Yefusa nʼabaddamu nti, “Nze nʼabantu bange twatawaana nnyo okulwanyisa abaana ba Amoni, era nabakoowoola mujje mutubeere, naye temwajja kutubeera kuva mu mukono gwabwe.

³Bwe nalaba nga temuzze kutubeera, ne nteeka obulamu bwange mu ngalo zange, ne nsomoka okulwana nʼabaana ba Amoni, era Mukama Katonda nʼabagabula mu mukono gwange. Kaakano kiki ekibaleeta gye ndi okulwana nange leero?”

⁴Awo Yefusa nʼakuŋŋaanya abantu bʼe Gireyaadi bonna, ne balwanyisa Efulayimu. Abasajja abʼe Gireyaadi baabalwanyisa kubanga Efulayimu baayogera nti, “Mmwe muli bakyewaggula ba Efulayimu abʼe Gireyaadi, wakati mu Efulayimu ne mu Manase.”

⁵Abʼe Gireyaadi ne bawamba ebifo bya Yoludaani okusomokerwa okutuuka mu Efulayimu, era bwe waabangawo ku bakomawo aba Efulayimu eyayagalanga okusomoka, abasajja abʼe Gireyaadi nga bamubuuza nti, “Oli Mwefulayimu?”

⁶Bwe yeegananga, nga bamugamba ayogere nti, “Shibbolesi.” Bwe yayogeranga nti, “Sibbolesi,” kubanga teyayinzanga kukyogera bulungi, ngʼakwatibwa era ngʼattibwa awo awasomokerwa ku Yoludaani. Mu biro ebyo, mu Efulayimu ne mufaamu abantu emitwalo ena mu enkumi bbiri.

⁷Awo Yefusa nʼalamula Isirayiri okumala emyaka mukaaga. Yefusa Omugireyaadi nʼafa, nʼaziikibwa mu kimu ku kibuga bya Gireyaadi.

⁸Oluvannyuma lwa Yefusa, Ibuzaani owʼe Besirekemu[11] nʼalamula Isirayiri.

⁹Yalina abaana aboobulenzi amakumi asatu, nʼabaana aboobuwala amakumi asatu. Bawala be nʼabafumbiza abantu abataali ba kika kye, ne batabani be nʼabawasiza abawala abataali ba kika kye. Nʼakulembera Isirayiri okumala emyaka musanvu.

¹⁰Ibuzaani nʼafa, nʼaziikibwa mu Besirekemu.

¹¹Oluvannyuma lwa Ibuzaani, Eroni Omuzebbulooni, nʼalamula Isirayiri okumala emyaka kkumi.

¹²Eroni Omuzebbulooni nʼafa, nʼaziikibwa mu Ayalooni mu nsi ya Zebbulooni.

¹³Awo oluvannyuma lwa Eroni, Abudoni mutabani wa Kereri Omupirasoni nʼalamula Isirayiri.

¹⁴Yalina abaana aboobulenzi amakumi ana, nʼabazzukulu amakumi asatu abeebagalanga endogoyi nsanvu. Yalamula Isirayiri okumala emyaka munaana.

¹⁵Abudoni mutabani wa Kireri Omupirasoni nʼafa, nʼaziikibwa mu Pirasoni mu nsi ya Efulayimu, mu nsi eyʼAbamaleki eyʼensozi.