Ekyabalamuzi 15:1-20 LGCB2014 - Bible AI

¹Awo ebbanga bwe lyayitawo, ngʼebiro ebyʼokukungula eŋŋaano bituuse, Samusooni nʼagenda okukyalira mukazi we ngʼamutwalidde akabuzi akato. Nʼayogera nti, “Nnaagenda eri mukazi wange mu kisenge.” Naye kitaawe wʼomukazi nʼatamukkiriza kugenda yo[14].

²Kitaawe wʼomukazi nʼagamba Samusooni nti, “Nze nalowooza nti wamukyayira ddala, kyennava mugabira mukwano gwo. Muganda we omuto amusinga okulabika obulungi. Kaakano gwʼoba otwala mu kifo kyʼoli.”

³Samusooni nʼabagamba nti, “Ku mulundi guno sirina musango, Abafirisuuti bwe nnaabakola akabi.”

⁴Awo Samusooni nʼagenda nʼakwata ebibe ebikumi bisatu, nʼasiba bibiri bibiri emikira, nʼakwataganya emikira, nʼaddira ebitawuliro nʼateeka ekitawuliro wakati wʼemikira kinneebirye.

⁵Nʼakoleeza ebitawuliro, nʼata ebibe okugenda mu nnimiro zʼAbafirisuuti. Nʼayokya ebinywa nʼeŋŋaano eyali tennakungulwa, nʼennimiro zʼemizeyituuni.

⁶Awo Abafirisuuti bwe baabuuza akoze bwe kityo, ne boogera nti, “Ye Samusooni mukoddomi wʼOmutimuna, kubanga Omutimuna yaddira mukazi wa Samusooni, nʼamuwa mukwano gwa Samusooni.” Abafirisuuti ne bagenda ne bookya omukazi ne kitaawe omuliro.

⁷Samusooni nʼabagamba nti, “Olwʼokuba nga mweyisizza bwe mutyo, sirirekayo okuggyako nga mbawalanyeeko eggwanga.”

⁸Nʼabalumba nʼatta bangi nnyo ku bo, nʼagenda nʼabeera mu mpuku eyʼomu lwazi lwʼe Etamu.

⁹Abafirisuuti ne bayambuka ne basiisira mu Yuda, ne basaasaana okumpi ne Leki.

¹⁰Abantu ba Yuda ne bababuuza nti, “Lwaki mutulumbye?” Abafirisuuti ne babaddamu nti, “Tuzze okuwamba Samusooni tumutwale nga musibe, tumwesasuze nga bwe yatukola.”

¹¹Awo abasajja enkumi ssatu okuva mu Yuda ne bagenda ku mpuku yʼolwazi lwʼe Etamu ne bagamba Samusooni nti, “Tewamanya ngʼAbafirisuuti be batufuga? Kaakano kiki kino kyʼotukoze?” Nʼabaddamu nti, “Nneesasuzza kye bankola.”

¹²Ne bamuddamu nti, “Tuzze okukusiba tukuweeyo mu mukono gwʼAbafirisuuti.” Samusooni nʼabagamba nti, “Mundayirire nga temunzitte mmwe mwennyini.”

¹³Ne bamuddamu nti, “Tukkiriziganyizza. Tujja kukusiba busibi, tukuweeyo mu mukono gwabwe, naye tetujja kukutta.” Ne bamusiba emiguwa ebiri emiggya ne bamuggyayo mu mpuku.

¹⁴Bwe yali asemberera Leki Abafirisuuti ne bajja gyʼali nga baleekaana. Awo Omwoyo wa Mukama Katonda nʼamukkako, emiguwa egyali gimusibye emikono ne giba ngʼobugoogwa obwokeddwa omuliro, ne gisumulukuka okuva ku mikono gye.

¹⁵Nʼalaba oluba lwʼendogoyi olutannavunda, nʼalukwata, nʼakuba abasajja lukumi.

¹⁶Samusooni nʼalyoka ayogera nti, “Nkozesezza oluba lwʼendogoyi okukola entuumu bbiri; nkozesezza oluba lwʼendogoyi okutta abasajja lukumi.”

¹⁷Bwe yamala okwogera ekyo, nʼakanyuga oluba nʼalusuula, ekifo ekyo nʼakituuma Lamasuleki.

¹⁸Nʼalumwa nnyo ennyonta, nʼakabira Mukama Katonda ngʼagamba nti, “Omuddu wo omuwadde obuwanguzi olwʼamaanyi; ne kaakano nfe, ngwe mu mukono gwʼabatali bakomole?”

¹⁹Katonda nʼakola ekinnya mu Leki, ne muvaamu amazzi, kwe yanywa nʼaddamu amaanyi, nʼaba mulamu. Ekifo ekyo kyeyava akituuma Enkakkole, era kikyaliyo mu Leki nʼokutuusa leero.

²⁰Samusooni nʼakulembera Isirayiri mu biro byʼAbafirisuuti, okumala emyaka amakumi abiri.