Ekyabalamuzi 16:1-31 LGCB2014 - Bible AI

¹Samusooni nʼalaga e Gaza nʼalabayo omukazi malaaya, nʼayingira gyʼali.

²Awo abantu abʼe Gaza ne bategeezebwa nga Samusooni bwʼali mu kifo ekyo. Ne bamuzingiza ne bamuteegera ku wankaaki wʼekibuga ekiro kyonna. Ne basiriikirira ekiro kyonna nga bagamba nti, “Obudde bwe bunaaba nga bunaatera okukya tunaamutta.”

³Naye Samusooni ne yeebaka okutuusa ettumbi, nʼagolokoka mu ttumbi, nʼakwata enzigi ebbiri eza wankaaki wʼekibuga, nʼemifuubeeto gyombi, nʼabisimbula okuva mu bifo byabyo, nʼagyawo nʼekisiba, nʼabiteeka ku bibegaabega bye nʼabitwala ku ntikko yʼolusozi olutunuulidde Kebbulooni.

⁴Awo oluvannyuma lwʼebyo nʼaganza omukazi mu kiwonvu kyʼe Soleki, erinnya lye Derira.

⁵Abakulembeze bʼAbafirisuuti[15] ne bagenda gyʼali ne bamugamba nti, “Musendesende olabe amaanyi ge amangi mwe gasibuka, tulyoke tusinziire okwo okumusobola, tumusibe tumujeeze. Naffe tulikuwa buli omu ku ffe, ebitundu bya ffeeza lukumi mu kikumi[16].”

⁶Awo Derira nʼagamba Samusooni nti, “Kaakano mbuulira amaanyi go amangi mwe gasibuka, era nʼekiyinza okukusiba okukujeeza.”

⁷Samusooni nʼamugamba nti, “Bwe bansiba enkolokolo embisi musanvu, ezitakaze, olwo nnaanafuwa ne mbeera ngʼomuntu omulala yenna.”

⁸Abakulembeze bʼAbafirisuuti ne baleetera omukazi enkolokolo musanvu embisi ezitakaze, nʼazimusibya.

⁹Waaliwo abasajja abaali beekwese mu kisenge omwo omukazi mwe yali. Awo omukazi nʼakoowoola Samusooni ngʼagamba nti, “Samusooni Abafirisuuti bakuguddeko.” Nʼakutula enkolokolo, ngʼomuntu bwe yandikutudde omuguwa oguyise mu muliro. Bwe kityo ensibuko yʼamaanyi ge nʼetazuulibwa.

¹⁰Awo Derira nʼagamba Samusooni nti, “Laba, onduulidde, era onnimbye. Kaakano mbuulira ekiyinza okukusiba.”

¹¹Nʼamugamba nti, “Bwe bansibya emiguwa emiggya egitakozesebwangako, nnaanafuwa, ne mbeera ngʼomuntu omulala yenna.”

¹²Awo Derira nʼaddira emiguwa emiggya, nʼamusiba, nga mu kisenge mulimu abasajja abeekwese. Nʼalyoka amukoowoola ngʼagamba nti, “Samusooni, Abafirisuuti bakuguddeko.” Nʼagyekutulako ku mikono ngʼewuzi.

¹³Awo Derira nʼagamba Samusooni nti, “Okutuusa kaakano onduulidde era onnimbye. Mbuulira ekiyinza okukusiba.” Nʼamugamba nti, “Bwʼonooluka emivumbo musanvu egiri ku mutwe gwange, nʼengoye, nʼobinyweza nzija kunafuwa, mbeere ngʼomuntu omulala yenna.” Nʼaluka emivumbo omusanvu egyʼali ku mutwe gwe, nʼengoye,

¹⁴nʼabinyweza nʼolubambo. Nʼamukoowoola ngʼagamba nti, “Samusooni Abafirisuuti bakuguddeko.” Nʼagolokoka okuva mu tulo, ne yeetakkuluza ku lubambo lwʼomuti ogulukirwako nʼengoye ezirukiddwa.

¹⁵Awo Derira nʼamugamba nti, “Oyinza otya okugamba nti onjagala, ate ngʼomutima gwo teguli nange? Gino emirundi esatu onduulidde, nʼotontegeeza amaanyi go amangi mwe gasibuka.”

¹⁶Bwʼatyo omukazi nʼamusendasendanga nʼebigambo bye ennaku zonna ngʼamubuuza okutuusa lwe yamwetamwa.

¹⁷Awo Samusooni nʼamubuulira ebyali ku mutima gwe byonna. Nʼamugamba nti, “Simwebwangako nviiri, kubanga ndi muwonge eri Katonda okuva mu lubuto lwa mmange. Bwe mwebwako enviiri, olwo amaanyi gange gananvaako, ne nnafuwa, ne mbeera ngʼomuntu omulala yenna.”

¹⁸Awo Derira bwe yalaba ngʼamutegeezezza byonna ebyali ku mutima gwe, nʼatumira abakulembeze bʼAbafirisuuti ngʼagamba nti, “Mukomeewo omulundi guno gwokka, kubanga yantegeezezza ebiri mu mutima gwe byonna.” Awo Abafirisuuti ne bakomawo nga baleese ezaabu.

¹⁹Nʼamwebasa ku maviivi ge, nʼayita omusajja nʼamumwa emivumbo omusanvu egyali ku mutwe gwe, nʼatandika okujeeza, amaanyi ge ne gamuvaako.

²⁰Nʼamukoowoola ngʼagamba nti, “Samusooni, Abafirisuuti bakuguddeko.” Nʼagolokoka okuva mu tulo ngʼagamba nti, “Nzija kwetakkuluza ŋŋende nga bulijjo.” Naye teyamanya nga Mukama Katonda amulese.

²¹Awo Abafirisuuti ne bakwata Samusooni, ne bamuggyamu amaaso, ne bamuserengesa e Gaza nga musibe mu njegere ezʼekikomo, ne bamuteeka mu kkomera mu nnyumba omuseerebwa obuwunga.

²²Kyokka bwe yamala okumwebwa, enviiri ze ne zitandika okumera.

²³Awo abakulembeze bʼAbafirisuuti ne bakuŋŋaana okuwaayo ssaddaaka eri lubaale waabwe Dagoni[17], nga bwe basanyuka. Ne boogera nti, “Lubaale waffe agabudde Samusooni omulabe waffe mu mukono gwaffe.”

²⁴Abantu bwe baalaba Samusooni, ne batendereza lubaale waabwe nga bwe boogera nti,

²⁴“Lubaale waffe agabudde omulabe waffe mu mukono gwaffe, oyo eyazikiriza ensi yaffe, nʼatta bangi ku ffe.”

²⁵Awo bwe baasanyuka ennyo, ne bawowoggana nga bwe bagamba nti, “Mutuyitire Samusooni atusanyuseemu.” Ne baleeta Samusooni abasanyuseemu, nga bamuggya mu kkomera. Ne bamuyimiriza wakati wʼempagi.

²⁶Awo Samusooni nʼagamba omuweereza eyali amukutte ku mukono nti, “Leka nkwate ku mpagi eziwaniridde essabo, nsobole okuzeesigama.”

²⁷Mu ssabo mwalimu ekibiina kinene ekyʼabasajja nʼabakazi nga mulimu nʼabakulembeze bonna abʼAbafirisuuti. Ne waggulu ku kasolya kwaliko abantu ngʼenkumi ssatu abaali batunuulira Samusooni ngʼabasanyusaamu.

²⁸Awo Samusooni nʼasaba eri Mukama ngʼagamba nti, “Mukama Katonda onzijukire kaakano, ompe amaanyi. Omulundi guno gwokka, ayi Katonda mpalane eggwanga ku Bafirisuuti olwʼamaaso gange abiri.”

²⁹Samusooni nʼakwata empagi zombi ezaali wakati mu ssabo we yali ayimiridde, nʼazeesigamako, omukono gwe ogwa ddyo nga guli ku mpagi emu, nʼomukono ogwa kkono nga guli ku ndala.

³⁰Samusooni nʼayogera nti, “Leka nfiire wamu nʼAbafirisuuti.” Nʼasindika nʼamaanyi ge gonna, essabo ne ligwa ku bakulembeze, nʼabantu bonna abaalimu naye, era nʼatta bangi mu kufa kwe okusinga ne be yatta nga mulamu.

³¹Awo baganda be nʼennyumba yonna eya kitaawe ne bagenda ne baggyayo omulambo gwe, ne bagutwala ewaabwe, ne bamuziika mu ntaana ya kitaawe Manowa eyali wakati wʼe Zola ne Esutaoli. Yali akulembedde Isirayiri okumala emyaka amakumi abiri.