Ekyabalamuzi 2:1-23 LGCB2014 - Bible AI

¹Awo Malayika wa Mukama nʼava e Bokimu nʼajja e Girugaali, nʼagamba nti, “Nabaggya mu nsi yʼe Misiri ne mbaleeta mu nsi gye nalayira okuwa bajjajjammwe; ne ŋŋamba nti, Endagaano yange gye nalagaana nammwe sirigimenya emirembe gyonna;

²ⓓ nammwe temukolanga ndagaano nʼabantu abʼomu nsi eyo: museseggulanga ebyoto byabwe; naye mmwe temugondedde kiragiro kyange: Kiki ekibakozesezza bwe mutyo?”

³Kaakano kyenva ŋŋamba nti Siibafubutule mu maaso gammwe, naye banaaba balabe bammwe ne bakatonda baabwe banaaba nkonge gye muli.

⁴Malayika wa Mukama bwe yamala okugamba Abayisirayiri bonna ebigambo bino ne balyoka batema emiranga.

⁵Ekifo ekyo ne bakituuma erinnya Bokimu; ne baweera eyo Ssaddaaka eri Mukama.

⁶Awo Yoswa bwe yamala okulagira Abayisirayiri baabuke, buli omu ku bo nʼagenda okugabana ekitundu kye yasuubizibwa.

⁷Abayisirayiri ne baweerezanga Mukama mu kiseera kyonna ekya Yoswa era ne mu kiseera kyonna ekyʼabakulembeze abaawangaala okusinga Yoswa era abaalaba ebikolwa ebyʼamaanyi Mukama bye yakolera Abayisirayiri.

⁸Awo omuweereza wa Mukama Yoswa mutabani wa Nuuni nʼafa. We yafiira ngʼaweza emyaka kikumi mu kkumi.

⁹Ne bamuziika e Timunasukeresiⓔ mu kitundu kye yagabana mu nsi ya Efulayimu eyʼensozi mu bukiika obwa kkono obwʼolusozi Gaasi.

¹⁰Awo abʼomulembe gwa Yoswa bonna bwe baafa ne baggwaawo ne waddawo omulembe gwʼabataamanya Mukama yadde ebikolwa ebyʼamaanyi bye yakolera Abayisirayiri.

¹¹Abayisirayiri ne bakola ebibi mu maaso ga Mukama era ne basinza Babayaali.

¹²Ne banyiiza Mukama kubanga baagoberera era ne basinza bakatonda abalala abamawanga agaali gabeetoolodde ne beerabira Mukama Katonda wa bajjajjaabwe eyabaggya mu nsi ye Misiri.

¹³Ne bava ku Mukama ne basinza ba Baali ne Asutoleesi.

¹⁴Mukama nʼasunguwalira nnyo Abayisirayiri: Kyeyava abawaayo mu mikono gyʼabanyazi ne babanyanga era ne batasobola na kwerwanako okuva mu mikono gyʼabalabe baabwe ababeetoolodde kubanga Mukama yali amaze okubawaayo.

¹⁵Buli gye baatabaalanga ne bawangulwa kubanga Mukama yabavaako olwʼekibi kyabwe nga bwe yabalayirira; ne bawotookerera nnyo.

¹⁶Mukama nʼabawa abakulembeze abaabalwaniriranga ne babawonya abanyazi.

¹⁷Naye tebaawuliriza bakulembeze baabwe ne bagoberera era ne basinza bakatonda abalala. Tebaakola nga bajjajjaabwe abaagobereranga nʼokuwuliranga ebiragiro bya Mukama.

¹⁸Buli Mukama lwe yabawanga omukulembeze yamuyambanga era nʼanunulanga Abayisirayiri okuva mu mikono gyʼabalabe baabwe ekiseera ekyʼomukulembeze oyo. Olwʼokusindanga nʼokweraliikirizibwa abalabe baabwe abaabajooganga, Mukama kyeyava abakwatirwa ekisa.

¹⁹Naye omukulembeze olwafanga ne baddamu okweyisanga obubi okukira ne bajjajjaabwe, ne bagobereranga ne baweerezanga era nʼokuvuunamiranga bakatonda abalala ne banywerera ku mpisa zaabwe embi olwʼemputtu yaabwe.

²⁰Mukama nʼasunguwalira nnyo Abayisirayiri nʼagamba nti, “Olwʼokuba nga abantu bano bamenye endagaano gye nalagaana ne bajjajjaabwe, so tebagondedde ddoboozi lyange,

²¹Siifubutule mu maaso gaabwe wadde eggwanga nʼerimu ku ago Yoswa ge yafa bawangudde.

²²Wabula nzija kukozesa amawanga gano okugezesa Abayisirayiri okulaba obanga banaafaayo okunywerera mu kkubo lya Mukama nga bajjajjaabwe bwe baakola, oba nedda.”

²³Bwʼatyo Mukama nʼaleka amawanga gali mu nsi eyo, nʼatagawaayo mu mikono gya Yoswa yadde okugafubutula mu nsi eyo nga Yoswa yaakafa.