Ekyabalamuzi 4:1-24 LGCB2014 - Bible AI

¹Ekudi bwe yamala okufa Abayisirayiri ne bakola nate ebibi eri Mukama.

²Mukama nʼabawaayo mu mikono gya Yabini Kabaka wa Kanani, eyabeeranga e Kazoli; omuduumizi wʼeggye lye nga ye Sisera eyabeeranga e Kalosesi ekyʼabamawanga.

³Yabini yalina amagaali agʼekyuma lwenda, era nʼajoogera Abayisirayiri emyaka amakumi abiri, kyebaava balaajaanira Mukama abayambe.

⁴Awo Nnabbi Debola mukazi wa Leppidosi ye yali akulembera Abayisirayiri mu kiseera ekyo.

⁵Era bulijjo yatuulanga wansi wʼolukindu olwayitibwanga olwa Debola wakati wʼe Lama ne Beseri mu kitundu kya Efulayimu ekyʼensozi: Abayisirayiri ne bajjanga gyali okubalamula.

⁶Nʼatumya Baraki mutabani wa Abinoamu ave mu Kedesi ekitundu kya Nafutaali, nʼamugamba nti “Mukama Katonda wʼAbayisirayiri akulagidde nti, ‘Ggenda okuŋŋaanyize abasajja bo ku lusozi Taboli, obalondemu omutwalo gumu okuva mu kika ekya Nafutaali nʼekya Zebbulooni.

⁷Ndisindika gyʼoli ku mugga Kisoni, Sisera omuduumizi wʼeggye lya Yabini, nʼamagaali ge nʼabalwanyi be era ndibawaayo mu mikono gyo.’ ”

⁸Baraki nʼamuddamu nti, “Kale nnaagenda bwʼonokkiriza ŋŋende naawe, naye bwʼotokkirize nange siigende.”

⁹Debola nʼamugamba nti, “Wewaawo nnaagenda naawe, naye ekitiibwa nʼobuwanguzi tebiibe bibyo, kubanga Mukama aliwaayo Sisera awangulwe mu mikono gyʼomukazi.” Baraki nʼaddayo ne Debola e Kedesi.

¹⁰Baraki nʼayita abʼekika kya Zebbulooni nʼekya Nafutaali bakuŋŋaanire e Kedesi, abasajja omutwalo gumu ne bamugoberera awamu ne Debola.

¹¹Keberi Omukeeni[4] yazimba eweema ye okumpi nʼomuti omwera e Zaanannimu ekiri okumpi ne Kedesi oluvannyuma lwʼokwawukana ne Bakeeni banne, bazzukulu ba Kobabu mukoddomi wa Musa.

¹²Awo Sisera bwe yamanya nga Baraki mutabani wa Abinoamu atuuse ku Lusozi Taboli,

¹³nʼakuŋŋaanya amagaali ge gonna lwenda agʼekyuma, nʼabalwanyi be bonna okuva ku Kalosesi ekyʼabamawanga okutuuka ku mugga Kisoni.

¹⁴Debola nʼagamba Baraki nti, “Mukama si yʼakukulembedde! Noolwekyo situkiramu kubanga olwa leero Mukama awaddeyo Sisera mu mikono gyo.” Awo Baraki nʼava ku lusozi Taboli nʼabalwanyi be omutwalo gumu.

¹⁵Mukama nʼafufuggaza nʼekitala Sisera nʼamagaali gonna nʼeggye lye lyonna nga Baraki alaba; Sisera nʼabuuka mu ggaali lye, nʼadduka.

¹⁶Baraki nʼafubutula eggye lya Sisera nʼamagaali gaalyo okutuuka e Keloseesi ekyʼamawanga; era nʼabatta nʼekitala obutalekaawo yadde nʼomu.

¹⁷Naye Sisera nʼaddukira eri eweema ya Yayeeri mukazi wʼOmukeeni Keberi: Kubanga waaliwo enkolagana wakati wa kabaka wʼe Kazoli, Yabini nʼabʼomu maka gʼOmukeeni Keberi.

¹⁸Yayeeri nʼafuluma okusisinkana Sisera; nʼamugamba nti Mukama wange yingira mu weema yange, totya. Sisera nʼayingira mu weema. Yayeeri nʼamubikkako omunagiro.

¹⁹Namwegayirira nti “Mpa kutuzzi nnyweko kubanga ennyonta enzita.” Nʼasumulula eddiba omufukibwa amata nʼamunywesa oluvannyuma nʼamubikkako.

²⁰Sisera nʼagamba Yayeeri nti yimirira mu mulyango gwa weema eno, omuntu yenna bwʼajja nʼakubuuza obanga muno mulimu omusajja yenna, omuddamu nti temuli.

²¹Awo Sisera bwe yali nga ali mu tulo tungi, Yayeeri mukazi wa Keberi nʼaddira enkondo ya weema nʼennyondo nʼamusooberera nʼamukomerera enkondo mu kyenyi, nʼeyitamu nʼekwata nʼettaka nʼafa.

²²Awo Baraki bwe yali nga anoonya Sisera, Yayeeri nʼafuluma okumusisinkana, nʼamugamba nti, “Jjangu nkulage omusajja gwʼonoonya. Baraki nʼayingira mu weema nʼalaba omulambo ggwa Sisera nga gukubiddwamu enkondo mu kyenyi.”

²³Ku lunaku olwo Katonda nʼawa Abayisirayiri obuwanguzi ku Yabini kabaka wa Kanani.

²⁴Abayisirayiri ne beeyongera okufufuggaza Yabini kabaka wa Kanani okutuusa lwe bamuzikiririzza ddala.