Ekyabalamuzi 8:1-35 LGCB2014 - Bible AI

¹Awo abasajja ba Efulayimu ne babuuza Gidyoni nti, “Lwaki watuyisa bwʼotyo, nʼototuyita bwe wagenda okulwana ne Midiyaani?” Ne bamunenya nnyo.

²Naye nʼabaddamu nti, “Kiki kye nkoze okugeraageranya nammwe kye mukoze? Amakungula ga Efulayimu tegasinga ezabbibu Abiyezeeri zʼakungudde?

³ⓖ Katonda yagabula Olebu ne Zeebu abakulembeze ba Midiyaani mu mukono gwammwe. Kiki kye nandiyinzizza okukola okugeraageranya nammwe?” Awo bwe yabagamba ebigambo ebyo ne bakkakkana.

⁴Awo Gidyoni nʼabasajja be ebikumi bisatu, nga bakooye, naye nga bakyabawondera, ne batuuka ku Yoludaani ne basomoka.

⁵Nʼagamba abasajja abʼomu Sukkosi nti, “Muwe ku basajja bange, ekyokulya, bakooye. Mpondera Zeba ne Zalumunna bakabaka ba Midiyaani.”

⁶Naye abakungu abʼomu Sukkosi ne bamuddamu nti, “Eggye lyo limaze okuwamba Zeba ne Zalumunna tulyoke tubawe emmere?”

⁷Awo Gidyoni nʼabaddamu nti, “Kale olwʼekyo kye muŋŋambye, Mukama Katonda bwʼaligabula Zeba ne Zalumunna mu mukono gwange, ndiyuza emibiri gyammwe nʼamaggwa agʼomu ddungu nʼemyeramannyo.”

⁸Bwe yava eyo, nʼayambuka nʼalaga e Penieri[7], nʼabasaba ekintu kye kimu. Naye abantu bʼe Penieri ne bamuddamu ngʼabasajja abʼomu Sukkosi bwe bamuddamu.

⁹Kyeyava agamba abantu bʼe Penieri nti, “Bwe ndikomawo emirembe, ndimenyaamenya omunaala guno.”

¹⁰Zeba ne Zalumunna baali mu Kalukoli nʼeggye lyabwe eryʼabasajja ngʼomutwalo gumu nʼekitundu, nga be bantu abaasigalawo ku ggye lyonna eryʼabantu abʼobuvanjuba. Abasajja ngʼemitwalo kkumi nʼebiri abaasowolanga ebitala be baali bafudde.

¹¹Awo Gidyoni nʼayambukira mu kkubo lyʼabo ababeera mu weema ku luuyi olwʼebuvanjuba olwʼe Noba nʼe Yogubeka nʼalumba eggye nga teritegedde.

¹²Zeba ne Zalumunna ne badduka, naye nʼabawondera, era nʼawamba bakabaka bombi aba Midiyaani, nʼawangulira ddala eggye lyabwe lyonna.

¹³Awo Gidyoni mutabani wa Yowaasi nʼakomawo okuva mu lutalo ngʼayitira mu Lukuubo lwa Keresi.

¹⁴Nʼasangiriza omuvubuka owʼoku bantu abʼomu Sukkosi, nʼabaako byʼamubuuza. Omuvubuka nʼamuwandiikira amannya gʼabakungu abʼomu Sukkosi, abakadde nsanvu mu musanvu.

¹⁵Gidyoni nʼalyoka ajja eri abasajja abʼomu Sukkosi nʼabagamba nti, “Zeba ne Zalumunna baabo be mwasinzirako okundulira nga muŋŋamba nti, temuyinza kuwa basajja bange abaali bakooye mmere, nga sirina Zeba ne Zalumunna mu mukono gwange.”

¹⁶Nʼakwata abakadde bʼekibuga nʼaddira amaggwa agʼomu ddungu nʼemyeramannyo nʼabonereza abasajja abʼomu Sukkosi.

¹⁷Nʼagenda nʼe Penieri nʼamenyaamenya omunaala gwa Penieri, nʼatta nʼabasajja bʼomu kibuga.

¹⁸Nʼalyoka abuuza Zeba ne Zalumunna nti, “Abasajja be mwattira e Taboli baali bafaanana batya?” Ne bamuddamu nti, “ggwe nga bwʼoli nabo bwe baali. Buli omu yali afaanana abalangira.”

¹⁹Nʼabaddamu nti, “Abo baali baganda bange, abaana ba mmange. Mukama Katonda nga bwʼali omulamu, singa mwabalekawo, sandi basse mmwe.”

²⁰Awo nʼagamba Yeseri mutabani we omubereberye nti, “Golokoka obatte.” Naye omuvubuka oyo nʼatasowolayo kitala kye okubatta. Yatya kubanga yali akyali mulenzi bulenzi.

²¹Zeba ne Zalumunna ne boogera nti, “Ggwe jjangu otutte, kubanga ngʼomusajja bwʼali, nʼamaanyi ge bwe genkana. Gidyoni nʼagolokoka nʼatta Zeba ne Zalumunna, nʼatwala nʼebyali bitimbiddwa mu bulago bwʼeŋŋamira zaabwe.”

²²Awo abantu ba Isirayiri ne bagamba Gidyoni nti, “Tufugire ddala ggwe ne mutabani wo, kubanga otulokodde okuva mu mukono gwa Midiyaani.”

²³Naye Gidyoni nʼabaddamu nti, “Nze sijja kubafuga, so ne mutabani wange tajja kubafuga, wabula Mukama yʼanaabafuganga.”

²⁴Gidyoni nʼabagamba nti, “Mbasaba ekintu kimu; buli omu ku mmwe ampe empeta ze yanyaga ku Bayisimayiri.”

²⁵Ne bamuddamu nti, “Okuzikuwa tujja kuzikuwa.” Ne bayalirira olugoye wansi, buli omu nʼateekako empeta ze yanyaga.

²⁶Obuzito bwʼempeta eza zaabu ne buba sekeri lukumi mu lusanvu (nga kilo kkumi na mwenda nʼekitundu), obutabalirako bya kwewoomya, ebirengejja, nʼebyambalo ebya ffulungu, ebyayambalwanga bakabaka ba Midiyaani, nʼemikuufu egyateekebwanga mu bulago bwʼeŋŋamira zaabwe.

²⁷Awo Gidyoni nʼaddira zaabu nʼamusaanuusa nʼamukolamu ekifaananyi ekyʼekkanzu (efodi), nʼakiteeka mu kibuga kye Ofula. Abayisirayiri bonna ne bakivuunamiranga ne bakisinzanga, era ne kifuukira Gidyoni nʼenju ye yonna omutego.

²⁸Awo Midiyaani nʼewangulwa abaana ba Isirayiri, era nʼetaddayo kubalumba. Ensi nʼeba nʼemirembe okumala emyaka amakumi ana, Gidyoni gye yabalamula.

²⁹Yerubbaali ye Gidyoni mutabani wa Yowaasi, nʼaddayo ewaabwe.

³⁰Gidyoni yazaala abaana aboobulenzi nsanvu mu bakazi abangi be yalina.

³¹Nʼomuzaana we owʼomu Sekemu yamuzaalira omwana wabulenzi, era nʼamutuuma Abimereki.

³²Awo Gidyoni mutabani wa Yowaasi nʼafa, ngʼakaddiye bulungi, nʼaziikibwa mu ntaana ya kitaawe Yowaasi mu Ofula ekyʼAbabiezeri.

³³Gidyoni nga yʼakafa, abaana ba Isirayiri ne bakyuka okusinza babaali ne bafuula Baaluberisi[8] katonda waabwe.

³⁴Abaana ba Isirayiri ne batajjukira Mukama Katonda waabwe eyabalokola okuva mu mukono gwʼabalabe baabwe bonna ku njuyi zonna.

³⁵Ne batalaga kusiima eri abʼenju ya Yerubbaali, ye Gidyoni, olwʼebirungi byonna bye yakolera Isirayiri.