Ekyabalamuzi 9:1-57 LGCB2014 - Bible AI

¹Abimereki mutabani wa Yerubbaali nʼagenda e Sekemu eri baganda ba nnyina nʼeri abʼekika bonna, abʼennyumba ya kitaawe, nʼennyumba ya nnyina nʼabagamba nti,

²“Mubuuze kaakano ngʼabatuuze bʼe Sekemu bonna bawulira nti, ‘Kiki ekisingako obulungi? Batabani ba Yerubbaali bonna ensanvu okubafuganga oba omuntu omu yʼaba abafuganga?’ Mujjukire nti ndi wa musaayi gwammwe.”

³Awo baganda ba nnyina ne bategeeza abatuuze bʼe Sekemu ebintu ebyo byonna. Abʼe Sekemu ne basalawo okugoberera Abimereki nga bwe bagamba nti, “Muganda waffe.”

⁴Ne bamuwa ebitundu bya ffeeza ebya sekeri nsanvu[9] okuva mu ssabo lya Baaluberisi. Abimereki nʼapangisa abayaaye nʼabantu abataalina bya buvunaanyizibwa ne bamugoberera.

⁵Nʼalaga mu nnyumba ya kitaawe mu Ofula nʼaddira baganda be, batabani ba Yerubbaali nsanvu nʼabattira ku jjinja. Naye omu ku baana abo omuto ayitibwa Yosamu mutabani wa Yerubbaali, nʼadduka ne yeekweka.

⁶Awo abatuuze bonna abʼe Sekemu nʼe Besimiiro ne bakuŋŋaana ne batikkira Abimereki ngʼayimiridde okuliraana omuti omunene, ne bamufuula kabaka mu Sekemu.

⁷Awo Yosamu bwe baamugamba ebigambo ebyo, nʼalinnya ku ntikko yʼolusozi Gerizimu nʼayogera mu ddoboozi eryʼomwanguka ngʼagamba nti, “Mumpulirize abatuuze bʼe Sekemu, Katonda alyoke abawulirize.

⁸Emiti gyʼagenda okulonda kabaka, ne gigamba omuzeyituuni nti, ‘Ba kabaka waffe.’

⁹Naye omuzeyituuni ne gubaddamu nti, ‘Ndekeyo okuvaamu amafuta agʼomuzeeyituuni agampeesa balubaale nʼabantu ekitiibwa, ŋŋende okuyuuguumya emiti?’

¹⁰Awo ne giraga eri omutiini ne gigugamba nti, ‘Ggwe jjangu obeere kabaka waffe.’

¹¹Naye nagwo ne guddamu nti, ‘Ndekeyo okuvaamu obuwoomi nʼekibala ekirungi, ŋŋende okuyuuguumya emiti?’

¹²Awo ne giraga eri omuzabbibu ne gigugamba nti, ‘Ggwe jjangu obeere kabaka waffe.’

¹³Naye omuzabbibu ne gubaddamu nti, ‘Ndekeyo okuvaamu wayini asanyusa balubaale nʼabantu, ŋŋende okuyuuguumya emiti?’

¹⁴Awo emiti gyonna ne gigamba omweramannyo nti, ‘Jjangu obeere kabaka waffe.’

¹⁵Awo omweramannyo ne gugamba emiti nti, ‘Bwe muba nga ddala munnonda okuba kabaka wammwe, mujje mwewogome mu kisiikirize kyange. Naye bwe kitaba kityo, omuliro guve mu mweramannyo gusaanyeewo emivule gyʼomu Lebanooni.’

¹⁶“Kale nno obanga mwakola kya kitiibwa era mu mutima omulungi ne mufuula Abimereki kabaka, era bwe muba nga mwalaga obwenkanya eri Yerubbaali nʼennyumba ye, ne mumukola nga bwe kyamusaanira,

¹⁷kubanga kitange yabalwanirira, nʼawaayo obulamu bwe, nʼabawonya mu mukono gwa Midiyaani,

¹⁸naye mmwe ne mujeemera ennyumba ya kitange ne muttira batabani be nsanvu ku jjinja limu, ne mufuula Abimereki omwana wʼomuddu omukazi, kabaka wʼabatuuze abʼomu Sekemu, kubanga ye muganda wammwe,

¹⁹era bwe muba nga mwakola kya kitiibwa era nga mwakikola mu mutima omulungi ne muyisa Yerubbaali nʼennyumba ye bwe mutyo, kale Abimereki asanyuke, era nammwe abasanyuse.

²⁰Naye bwe kitaba bwe kityo, omuliro guve mu Abimereki, gusaanyeewo abatuuze bʼomu Sekemu nʼabʼe Besimiiro, ate era omuliro guve mu batuuze abʼomu Sekemu ne mu Besimiiro gusaanyeewo Abimereki.”

²¹Oluvannyuma lwʼebyo, Yosamu nʼadduka nʼalaga e Seeri, nʼabeera eyo olwʼokutya muganda we Abimereki.

²²Awo Abimereki nʼafuga Isirayiri okumala emyaka esatu.

²³Katonda nʼakyawaganya Abimereki nʼabatuuze bʼomu Sekemu, ne balya mu Abimereki olukwe,

²⁴Katonda ngʼawoolera eggwanga olwʼekikolwa ekyʼokutta batabani ba Yerubbaali ensanvu, nʼomusaayi gwabwe ngʼaguteeka ku Abimereki muganda waabwe eyabatta ngʼayambibwako abatuuze bʼomu Sekemu.

²⁵Abatuuze bʼomu Sekemu ne bassaawo abasajja ku nsozi babbenga era banyagululenga buli eyayitanga mu kkubo. Abimereki nʼategeezebwa.

²⁶Awo Gaali mutabani wa Ebedi nʼajja ne baganda be mu Sekemu, abatuuze bʼomu Sekemu, ne batanula okumwesiga.

²⁷Ne balaga mu nnimiro ne bakungula ezzabbibu zaabwe, ne basogola omubisi, nʼoluvannyuma ne bakola embaga mu ssabo lya katonda waabwe, ne balya ne banywa ne bakolimira Abimereki.

²⁸Awo Gaali mutabani wa Ebedi nʼayogera nti, “Abimereki ye ani? Abʼomu Sekemu be baani okumuweereza? Si ye mutabani wa Yerubbaali, era Zebbuli si ye mumyuka we? Muweereze abantu ba Kamoli, kitaawe wa Sekemu. Lwaki tuweereza Abimereki?

²⁹Ani ayinza okumpa obuyinza okukulembera abantu bano, olwo ndyoke nziggyewo Abimereki? Era nzija kumusoomooza nga mugamba nti, ‘Kuŋŋaanya eggye lyo, otulumbe.’ ”

³⁰Awo Zebbuli omukulu wʼekibuga bwe yawulira ebigambo bya Gaali mutabani wa Ebedi, nʼasunguwala nnyo.

³¹Nʼaweereza ababaka eri Abimereki mu kyama okumugamba nti, “Laba Gaali mutabani wa Ebedi, ne baganda be bazze mu Sekemu. Basekeeterera ekibuga okukulwanyisa.

³²Kaakano, ggwe jjangu mu kiro nʼabasajja bo muteegere mu nnimiro.

³³Mu makya enjuba ngʼevaayo, onoogolokoka nʼolumba ekibuga. Onoomulumba ye nʼabantu abali naye abajja okukulumba, ggwe olyoke obakole ekyo omukono gwo kye guteekeddwa okukola.”

³⁴Awo Abimereki nʼabasajja be ne bagolokoka mu kiro ne bagenda ne beekweka mu bibanja bina okumpi nʼe Sekemu.

³⁵Gaali mutabani wa Ebedi nʼafuluma nʼayimirira mu mulyango gwa wankaaki wʼekibuga, ne Abimereki nʼabasajja be nabo ne bavaayo gye baali beekwese.

³⁶Awo Gaali bwe yabalaba, nʼagamba Zebbuli nti, “Laba abantu nga bava ku nsozi waggulu!” Zebbuli nʼamuddamu nti, “Ebisiikirize ebyʼensozi byʼolaba ngʼabantu.”

³⁷Naye Gaali nʼayogera nate nti, “Laba, abantu bajja nga bayitira mu muwaatwa gwʼensi, nʼekibinja ekimu kifuluma mu kkubo eryʼomwera ogwʼabafumu.”

³⁸Awo Zebbuli nʼalyoka amugamba nti, “Biki bye wali oyogera bwe wagamba nti, ‘Abimereki ye ani ffe okumuweereza?’ Abo si be bantu be wanyooma? Kaakano genda obalwanyise.”

³⁹Awo Gaali nʼakulembera abatuuze bʼomu Sekemu okulwanyisa Abimereki.

⁴⁰Abimereki nʼamugoba, ne Gaali nʼamudduka, era bangi ne batuusibwako ebiwundu, era ne bagwa ku mulyango gwa wankaaki.

⁴¹Abimereki nʼabeera mu Aluma. Zebbuli nʼagoba Gaali ne baganda be mu Sekemu baleme kubeerangamu.

⁴²Ku lunaku olwaddirira, Abimereki nʼategeezebwa ngʼabantu bwe bagenda okulima.

⁴³Awo nʼaddira abasajja be nʼabaawulamu ebibinja bisatu, nʼateegera abantu mu nnimiro. Bwe yalaba ngʼabantu bafuluma ekibuga balage mu nnimiro, nʼabalumba.

⁴⁴Abimereki nʼekibinja kye yali nakyo ne banguwa okuwamba omulyango gwa wankaaki wʼekibuga, ate ebibinja ebibiri byo ne byanguwa okulaga mu nnimiro ne batta abaaliyo.

⁴⁵Abimereki nʼazibya olunaku olwo ngʼalwanyisa abʼomu kibuga, nʼakiwamba, nʼabaalimu nʼabatta, nʼekibuga nʼakizikiriza, nʼakiyiwamu nʼomunnyo.

⁴⁶Olwawulira ebyo, abatuuze abaali mu kigo kya Sekemu, ne baddukira mu ssabo lya Eruberisi.

⁴⁷Awo bwe baategeeza Abimereki nti abatuuze bʼomu Sekemu baali bakuŋŋaanidde mu kigo kya Sekemu,

⁴⁸ye nʼabasajja be ne balinnya ku lusozi Zalumoni, nʼakwata embazi nʼatema ettabi nʼalyetikka ku kibegabega. Nʼalagira nʼabasajja be yali nabo ngʼabagamba nti, “Mwanguwe, mukole nga bwe nkoze.”

⁴⁹Buli omu ku bo nʼatema ettabi nʼalyetikka, ne bagoberera Abimereki. Ne bagatuuma ku kigo, ne bakikumako omuliro. Abantu bonna abaali mu kigo kya Sekemu, be basajja nʼabakazi nga lukumi ne bafiiramu.

⁵⁰Awo Abimereki nʼagenda e Sebezi, nʼasiisira okwetooloola ekibuga ekyo era nʼakiwamba.

⁵¹Mu kibuga ekyo mwalimu ekigo ekyʼamaanyi, era abantu bonna abasajja nʼabakazi abʼomu kibuga ne baddukira omwo ne beggaliramu. Ne balinnya ku kasolya kʼekigo.

⁵²Abimereki nʼalumba ekigo, naye bwe yali ngʼakisemberedde, akume omuliro ku mulyango gwakyo,

⁵³ⓗ ne wabaawo omukazi omu eyakasuka olubengo ku mutwe gwa Abimereki, nʼamwasa omutwe.

⁵⁴Amangwago Abimereki nʼagamba eyasitulanga ebyokulwanyisa bye nti, “Sowola ekitala kyo onzite, si ku lwa nga kinjogerwako nti nattibwa mukazi.” Omuddu we nʼamufumita ekitala nʼafa.

⁵⁵Awo abantu ba Isirayiri bwe baalaba nga Abimereki afudde, buli omu nʼaddayo ewuwe.

⁵⁶Katonda bwʼatyo nʼawalana eggwanga olwʼobutali butuukirivu bwa Abimereki, olwa Abimereki okutta abaana ba kitaawe, abooluganda nsanvu.

⁵⁷Katonda nʼabonereza nʼabantu bʼomu Sekemu olwʼobutali butuukirivu bwabwe bwonna, nʼatuukiriza nʼekikolimo Yosamu mutabani wa Yerubbaali kye yabakolimira.