Ekyamateeka Olwokubiri 15:1-23 LGCB2014 - Bible AI

¹Ku buli nkomerero yʼomwaka ogwʼomusanvu, amabanja gonna onoogasonyiwanga.

²Okusonyiwa okwo kunaabeeranga bwe kuti: buli muntu eyawola munne ebbanja, anaasazangamu ebbanja eryo lye yamuwola. Temubanjanga Bayisirayiri bannammwe, kubanga ebiro Mukama byʼanaabanga ataddewo ebyʼokusonyiwagana amabanja binaabanga bimaze okulangirirwa.

³Onooyinzanga okubanja munnaggwanga akusasule[5], naye ebbanja muganda wo lyʼakulinako onoolimusonyiwanga.

⁴Naye tewaabeerengawo mwavu mu mmwe kubanga ngʼotuuse mu nsi Mukama Katonda wo gyʼakuwa okugyefunira ngʼobutaka bwo obwʼenkalakkalira nʼakuyiwangako emikisa gye emingi,

⁵kasita onoogonderanga ddala Mukama Katonda wo, nʼogoberera nʼobwegendereza ebiragiro bino byonna bye nkuwa leero.

⁶Kubanga Mukama Katonda wo agenda kukuyiwako emikisa gye nga bwe yakusuubiza. Amawanga mangi onoogawolanga naye ggwe tojjanga kugeewolako. Onoofuganga amawanga mangi, naye go tegaakufugenga.

⁷Bwʼonoobanga oli mu bibuga byo mu nsi Mukama Katonda wo gyʼakuwa, mu mmwe bwe munaabangamu munno omwavu ali mu kwetaaga tokakanyazanga mutima gwo wadde okukodowaliranga muganda wo oyo omwavu.

⁸Omwanjululizanga engalo zo, nʼomuwolanga nʼokwagala kyonna kyʼanaabanga yeetaaga okumuwewulako obuzibu bwe.

⁹Weekuumenga nnyo olemenga kubeeranga na ndowooza eno embi mu mutima gwo nti, “Omwaka ogwʼomusanvu ogwʼokusonyiwa amabanja gusembedde,” muganda wo nʼomukwatirwa ettima nʼotobaako kyʼomuwa. Muganda wo ayinza okujulira eri Mukama nʼosangibwanga ngʼogudde mu kibi.

¹⁰Muwenga nʼokwagala nʼobutajuliriranga, kubanga olwʼomwoyo ngʼogwo, Mukama Katonda wo ajjanga kukuwanga omukisa mu mirimu gyo gyonna, ne mu buli kintu kyʼonootuusangako engalo zo.

¹¹Olwokubanga mu nsi temuubulengamu baavu abali mu kwetaaga, kyenva nkulagira nti Muganda wo omwavu era ali mu kwetaaga omwanjululizanga engalo zo bulijjo mu nsi yo.

¹²ⓣ Omusajja Omwebbulaniya oba omukazi Omwebbulaniya gwʼonoobanga oguze okukuweerezanga, bwʼanaamalangako emyaka omukaaga, mu mwaka ogwʼomusanvu onoomuddizanga eddembe lye.

¹³Era bwʼonoomutanga tomusiibulanga ngalo nsa.

¹⁴Omuwangako, nga teweebalira, ku magana go, ne ku mmere yo eyʼempeke, ne ku wayini wo. Omuwanga nga Mukama Katonda wo bwʼanaabanga akuwadde omukisa.

¹⁵Ojjukiranga nga wali muddu mu nsi yʼe Misiri, Mukama Katonda wo nʼakununulayo. Noolwekyo kyenva nkuwa ekiragiro kino leero.

¹⁶Naye omuddu bwʼanaakugambanga nti, “Sijja kuva wano,” kubanga akwagala nnyo ggwe nʼabali mu maka go, era nga bwʼabeera naawe aba bulungi;

¹⁷kale nno, onoomulazanga awali oluggi, nʼoddira olukato nʼolufumitanga[6] mu kutu kwe okwʼebweru ne luyingira ne mu luggi; olwo anaabanga afuuse muweereza wo ennaku zonna ezʼobulamu bwe bwonna. Nʼomuweereza wo omukazi naye onoomuyisanga bwʼotyo.

¹⁸Tolowoozanga nti omukwatiddwa ekisa kubanga akuweerezza okumala emyaka mukaaga, nga buli mulimu gwʼakola gwandikoleddwanga abaweereza abʼempeera babiri balamba. Era mu byonna byʼonookolanga, Mukama Katonda wo anaakuwanga omukisa.

¹⁹Buli bibereberye ebisajja ebinaazaalibwanga mu ggana lyo ne mu kisibo kyo, onoobitukuzanga era binaabanga bya Mukama Katonda wo. Ente zo ennume embereberye tozikozesanga mirimu, nʼendiga zo embereberye tozisalangako byoya.

²⁰Ebibereberye ebyo onoobiryanga buli mwaka, buli mwaka, ggwe nʼabʼomu nju yo bonna, nga mubiriiranga mu maaso ga Mukama Katonda wo, mu kifo Mukama kyʼanaabanga yeerondedde.

²¹Ekisolo bwe kinaabeerangako akamogo, gamba nga kirema, oba nga kizibe kya maaso, oba nga kiriko ekikyamu kyonna ekinene, tokireetanga ngʼekiweebwayo eri Mukama Katonda wo.

²²Onookiriiranga mu bibuga byo. Omulongoofu nʼatali mulongoofu mwenna munaabiryanga nga bwe munaalyanga empeewo oba enjaza.

²³Naye omusaayi togulyanga, oguyiwanga wansi ku ttaka ngʼayiwa amazzi.