Ekyamateeka Olwokubiri 21:1-23 LGCB2014 - Bible AI

¹Bwʼolimala okuyingira mu nsi Mukama Katonda gyʼakuwa okugirya, omuntu nʼasangibwa mu nsiko ngʼattiddwa, kyokka ngʼeyamusse tamanyiddwa,

²bakadde bo, abakulembeze, nʼabalamuzi bo banaafulumanga ne bagenda bapima obuwanvu bwʼebbanga okuva ku mulambo okutuuka ku bibuga ebinaabanga bigwebulunguludde.

³Kale nno abakadde abakulembeze bʼekibuga ekinaabanga kisinga okuliraana nʼomulambo ogwo, banaaddiranga ente enduusi etakozesebwangako mulimu gwonna, etassibwangamu kikoligo,

⁴ne bagiserengesa mu kiwonvu ekirimu akagga akakulukuta; ekitalimwangamu wadde okusimbwamu emmere. Mu kiwonvu omwo mwe banaanyoleranga ensingo yʼente eyo ne bagimenya.

⁵Kale nno batabani ba Leevi, bakabona, banaavangayo ne basembera, kubanga Mukama Katonda wo yabalonda okumuweerezanga, nʼokusabiranga emikisa mu linnya lya Mukama nʼokutereezanga empaka zonna nʼobulumbaganyi.

⁶Awo abakadde abakulembeze bonna abʼomu kibuga ekinaasinganga okuliraana omulambo ogwo, banaanaabiranga engalo zaabwe ku nte eri enduusi eyamenyebbwa ensingo mu kiwonvu[8],

⁷ne boogera nti, “Emikono gyaffe si gye gyayiwa omusaayi guno, ne bwe gwali guyiyibwa amaaso gaffe tegaagulaba, tetwaliwo nga guyiyibwa.

⁸Osonyiwe abantu bo, Isirayiri, be wanunula Ayi Mukama Katonda, oleme kuleka wakati mu bantu bo, Isirayiri, omusango ogwʼokuyiwa omusaayi, gwe batazzanga.” Bwe batyo banaasonyiyibwanga omusango gwʼomusaayi ogwo.

⁹Bwʼotyo bwʼonoggyangawo omusango wakati wammwe ogwʼokuyiwa omusaayi ogutaliiko nsonga, kubanga onoobanga okoze ekituufu mu maaso ga Mukama Katonda.

¹⁰Bwʼogendanga okutabaala balabe bo, Mukama nʼabagabula mu mikono gyo nʼonyagayo abantu,

¹¹mu abo abanyagiddwa bwʼonoolabangamu omukazi alabika obulungi nʼomwagala, nʼoyagala okumuwasa,

¹²omutwalanga mu maka go, nʼomulagira okumwa omutwe gwe, nʼokusalako enjala ze,

¹³nʼengoye ze mwe yawambirwa azeeyambulangamu. Bwʼanaamalanga mu nju yo omwezi mulamba ngʼakungubagira kitaawe ne nnyina, onoogendanga gyʼali nʼobeera bba, naye anaabeeranga mukazi wo.

¹⁴Kyokka bwʼanaabanga takusanyusizza, omuwanga eddembe nʼagenda so tomutundanga nsimbi. Tomuyisanga nga muddu, kubanga ggwe wamumalamu ekitiibwa kye.

¹⁵Omusajja bwʼanaabanga nʼabakazi babiri, omu nga muganzi naye omulala nga mukyawe, bombi ne bamuzaalira abaana aboobulenzi, naye ngʼomwana omubereberye ye wʼomukyawe;

¹⁶bwʼanaabanga agabira batabani be abo ebintu bye mu ddaame lye, takkirizibwenga kuyisa mwana wa muganzi ngʼomubereberye, singa omwana wʼomukyawe ye mubereberye.

¹⁷Anaasaaniranga okukkiriza nti Omwana wʼomukyawe ye mubereberye, era anaamuwanga emiteeko ebiri egyʼebintu bye byonna byʼalina, kubanga oyo ge maanyi ga kitaawe amabereberye. Ye nannyini ddembe eryʼobwebange eryʼomwana omubereberye.

¹⁸Omuntu bwʼanaabanga ne mutabani we omukakanyavu omujeemu atagondera biragiro bya kitaawe wadde ebya nnyina, atabafaako bwe bamubonerezaamu olwʼobutawulira,

¹⁹kitaawe ne nnyina banaamukwatanga ne bamuleeta eri abakulu abakulembeze abʼomu kibuga kye waabwe nga bali wabweru wʼomulyango gwʼekibuga ekyo.

²⁰Banaategeezanga abakulu abakulembeze bʼomu kibuga kye waabwe nti, “Mutabani waffe ono mukakanyavu era mujeemu. Tatuwulira. Wa mulugube nnyo era mutamiivu.”

²¹Kale nno abasajja bʼomu kibuga ekyo banaamukubanga amayinja ne bamutta. Bwʼotyo bwʼonoomalangawo ekibi wakati wo. Isirayiri yenna anaakiwuliranga, nʼatya.

²²Omuntu bwʼanaasingibwanga ogwʼokufa nʼattibwa, nʼawanikibwa ku muti,

²³omulambo gwe teguulekebwenga ku muti ne gusulako ekiro kyonna; onoomuziikanga ku lunaku olwo lwennyini, kubanga omuntu awanikibwa ku muti, Katonda aba amukolimidde. Togwagwawazanga nsi Mukama Katonda wo gyʼakuwa okugirya okubeera obusika bwo obwʼenkalakkalira.