Ekyamateeka Olwokubiri 22:1-30 LGCB2014 - Bible AI

¹Bwʼolabanga ente ya munno, oba endiga ye, ngʼebula okuva ewaabayo, togirekanga bulesi ne weesuulirayo ogwa nnaggamba naye ogikwatanga nʼogizzaayo ewa nnyiniyo.

²Nannyiniyo bwʼabanga tasula kumpi naawe, obanga nannyiniyo tomumanyi, ogireetanga mu maka go nʼobeeranga nayo okutuusa nannyiniyo lwʼalijja ngʼaginoonya; olwo nno nʼolyoka ogimuddiza.

³Okolanga bwʼotyo ngʼosanze endogoyi ya munno, obanga olonze ekyambalo kya munno, oba ekintu kyonna ekirala munno kyʼanaabanga abuliddwa kyokka ggwe nʼokironda. Tolemanga kuyamba munno ngʼali mu buzibu, ate nga wandisobodde okumuyamba. Obusobozi bwʼonoobanga nabwo okuyamba munno tobumukwekanga.

⁴Bwʼonoolabanga endogoyi ya munno, oba ente ye, ngʼegudde ku kkubo, togiyitangako buyisi, wabula omuyambanga okugiyimusa.

⁵Omukazi taayambalenga ngoye za kisajja, so nʼomusajja taayambalenga ngoye za kikazi; kubanga abakola ebyo Mukama Katonda wammwe abakyayira ddala.

⁶Temutwalanga Nnyonyi Nzadde. Bwe munaalabanga ekisu kyʼennyonyi ku muti, oba ku mabbali gʼekkubo, nga kirimu amagi oba obwana obuto, nga ne nnyina waabwo abumaamidde, oba atudde ku magi, bwe munaatwalanga obwana obuto, nnyina waabwo temumutwalirangako.

⁷Obwana obuto munaayinzanga okubutwala, kyokka nnyina waabwo mumulekanga nʼagenda, mulyoke mufunenga emirembe mu mutima awamu nʼobuwangaazi.

⁸Bwe muneezimbiranga enju empya eyʼakasolya akatereevu[9] akatali keesulifu, mukolangako akasenge waggulu okwebungulula akasolya ako, kalyoke kaziyizenga omuntu okuva eyo waggulu nʼagwa wansi, nʼaleeteranga ennyumba eyo omusango olwʼomusaayi ogunaabanga guyiise.

⁹Wakati wʼennyiriri zʼemizabbibu temusimbangamu mmere ya ngeri ndala, bwe munaakikolanga, ebibala byʼemizabbibu nʼebyʼemmere gye munaabanga musimbyemu, byombi munaabifiirwanga.

¹⁰Ente nʼendogoyi temuzigattanga wamu ne muzisibanga ku kikoligo kye kimu ekyʼekyuma kye munaabanga mulimisa.

¹¹Temwambalanga ngoye ezinaabanga zirukiddwa nʼewuzi zʼebyoya byʼendiga nga zigattiddwa wamu nʼewuzi eza linena.

¹²Mutunganga emijunga ku buli nsonda ennya ezʼeminagiro gyammwe gye munaayambalanga.

¹³Omusajja bwʼaneewasizanga omukazi, kyokka oluvannyuma lwʼokusula naye, nʼamukyawa,

¹⁴nʼamuwaayiriza ngʼamukonjera ngʼagamba nti, “Nawasa omukazi ono, naye bwe nasula naye saamusanga nga mbeerera,”

¹⁵Kitaawe wʼomuwala oyo ne nnyina banaaleeteranga abakulembeze abakulu abʼekibuga ekyo, nga bali ku wankaaki waakyo, obujulizi obunaalaganga ngʼomuwala waabwe yali mbeerera.

¹⁶Kitaawe wʼomuwala anaategeezanga abakulembeze abakulu nti, “Nagabira omusajja ono omwana wange omuwala amuwase, naye omusajja amukyaye.

¹⁷Kaakano wuuno amuwaayiriza ngʼamukonjera ngʼamwogerako nti, Muwala wo namusanga nga si mbeerera.” Naye obujulizi buubuno obulaga ngʼomwana wange ono omuwala yali mbeerera. Abazadde bʼomuwala banaayanjululizanga essuuka yʼobuliri mu maaso gʼabakulembeze abakulu abʼekibuga ekyo.

¹⁸Abakulembeze abakulu bʼekibuga ekyo banaatwalanga bba wʼomuwala, banaasookanga okumukubamu.

¹⁹Ate ne bamusalira omutango gwa sekeri za ffeeza kikumi[10]; banaaziwanga kitaawe wʼomuwala; kubanga omusajja oyo anaabanga aleese erinnya ebbi ku muwala wa Isirayiri embeerera. Omuwala oyo anaabeeranga mu maka gʼomusajja oyo ebbanga lyonna, era omusajja takkirizibwenga kugoba mukazi we oyo ebiro byonna omusajja oyo byʼalimala nga mulamu.

²⁰Naye singa omusajja nga byʼanaabanga ayogedde bya mazima, nga nʼobujulizi obukakasa ngʼomuwala yali mbeerera bunaabanga bubuze,

²¹kale nno omuwala oyo anaaleetebwanga ku muzigo gwʼennyumba ya kitaawe, era abasajja abʼomu kibuga kyʼomuwala oyo banaamukubiranga awo amayinja nʼafa. Kubanga anaabanga akoze ekikolwa kya bugwenyufu nnyo ekyʼokumanya abasajja ngʼakyali mu luggya lwa kitaawe. Ekibi musaananga mukimalemu mu Isirayiri.

²²Omusajja bwʼanaakwatibwanga nga yeebase nʼomukyala wʼomusajja omulala, kale, omusajja akwatiddwa nʼomukyala gwʼanaabanga yeebase naye, bombi baakuttibwanga. Ekibi musaana mukimalengamu mu Isirayiri.

²³Bwe wanaabangawo omuwala embeerera ayogerezebwa afumbirwe, omusajja nʼamusanga mu kibuga ne yeebaka naye,

²⁴munaabaleetanga bombi ku wankaaki wʼekibuga ekyo ne mubakuba amayinja ne bafa; omuwala, bwe kibanga nga yali munda mu kibuga naye nʼatakuba nduulu kufuna buyambi; omusajja, kubanga yayonoona omuwala ajja okufumbirwa omusajja we. Bwe mutyo bwe munaamalangamu ekibi mu mmwe.

²⁵Naye omusajja bwʼanaasanganga omuwala ayogerezebwa ku ttale nʼamukwata ne yeebaka naye olwʼempaka, kale nno omusajja anaabanga yeebase nʼomuwala oyo yʼanattibwanga.

²⁶Omuwala oyo temumukolangako kintu kyonna, kubanga anaabanga talina kibi kyonna kyʼakoze ekinaamusaanyizanga okufa. Ensonga ezo zifaanana ngʼezʼomuntu anaabanga alumbaganye muliraanwa we nʼamutemula.

²⁷Olwokubanga omuwala ono anaabanga ayogerezebwa okufumbirwa yasangibwa omusajja ku ttale etali bantu, anaayinzanga okuba nga yeekubira enduulu naye ne watabaawo amudduukirira okumuyamba.

²⁸Omusajja bwʼanasisinkananga omuwala embeerera naye nga taliiko amwogereza, nʼamukwata ne yeebaka naye, ne bakwatibwa nga bali mu kikolwa ekyo,

²⁹omusajja anaabanga yeebase nʼomuwala oyo anaasasulanga kitaawe wʼomuwala sekeri eza ffeeza amakumi ataano[11]. Omusajja anaawasanga omuwala oyo okuba mukazi we, kubanga anaabanga amaze okumusobyako. Era taamugobenga okumala ebbanga lyonna omusajja oyo nga mulamu.

³⁰Omusajja taawasenga mukyala wa kitaawe aleme kuweebuulanga kitiibwa kya buliri bwa kitaawe.