Ekyamateeka Olwokubiri 25:1-19 LGCB2014 - Bible AI

¹Abantu babiri bwe banaabanga nʼenkaayana, ensonga zaabwe ne bazitwala mu mbuga zʼamateeka, abalamuzi ne babasalirawo, banaalangiriranga asinze nʼoyo gwe gusinze.

²Singa oyo gwe gunaasiŋŋanga anaabanga asaanira okukubwangamu obuga, omulamuzi anaamugalamizanga wansi nʼakubirwa mu maaso ge omuwendo gwʼobuga obuggya mu musango gwʼanaabanga azzizza,

³ⓧ naye nga tebusukka buga amakumi ana. Bwe bunaasukkanga omuwendo ogwo munnammwe anaabanga aswazibbwa nnyo mu maaso gammwe.

⁴ⓨ Ente[12] temugisibanga mimwa bwe munaabanga mugikozesa okuwuula emmere eyʼempeke.

⁵ⓩ Abooluganda bwe banaabanga babeera wamu, omu nʼafa nga talina mwana wabulenzi, nnamwandu we tafumbirwanga musajja atali wa mu luggya lwa bba. Muganda wa bba anaatwalanga nnamwandu oyo nʼamuwasa, nʼatuukiriza obuvunaanyizibwa bwa muganda we omugenzi eri nnamwandu oyo.

⁶Omwana owoobulenzi gwʼanaasookanga okuzaala yʼanaasikiranga erinnya lya muganda we omugenzi, bwe lityo erinnya lyʼomugenzi ne litasangulwawo mu Isirayiri.

⁷Naye omusajja bwʼanaabanga tayagala kuwasa nnamwandu wa muganda we, nnamwandu oyo anaagendanga eri abakulembeze abakulu abʼomu kibuga kye, ku wankaaki, nʼabagamba nti, “Muganda wa baze agaanye okuwangaaza erinnya lya muganda we mu Isirayiri. Kubanga agaanye okutuukiriza gye ndi obuvunaanyizibwa bwʼalina ku muganda we.”

⁸Abakulembeze abakulu bʼomu kibuga banaayitanga omusajja oyo ne boogera naye. Bwʼanaakakanyalanga nʼagamba nti, “Saagala kumuwasa,”

⁹kale, nnamwandu wa muganda we anaatambulanga nʼalaga awali omusajja oyo mu maaso gʼabakulembeze abakulu bʼomu kibuga, anaamwambulangamu engatto mu kigere kye ekimu, era anaamuwandiranga amalusu mu maaso nʼayogera nti, “Bwe kityo bwe kinaakolebwanga ku musajja atazimba lunyiriri lwa luggya lwa muganda we.”

¹⁰Oluggya lwʼomusajja oyo lunaamanyibwanga mu Isirayiri ngʼOluggya lwʼOmwambule Engatto.

¹¹Bwe wanaabangawo abasajja babiri abalwana, mukazi wʼomu bwʼanajjanga okutaasa bba ku mulabe we nʼamukwata ebitundu bye ebyʼekyama,

¹²omutemangako omukono gwe. Tomusaasiranga.

¹³Tossanga mu nsawo zo mayinja gapima ga ngeri bbiri ezʼenjawulo, ngʼerimu lizitowa, kyokka nga linnaalyo liwewuka.

¹⁴Tobeeranga na bipima bya ngeri bbiri ebyʼenjawulo, ngʼekimu kinene, kyokka nga kinnaakyo kitono.

¹⁵Kikugwanira obeerenga nʼamayinja agapima obuzito obutuufu, era nʼebipima ebirala ebya mazima era ebituufu, olyoke owangaalenga ngʼoli mu nsi Mukama Katonda wo gyʼakuwa.

¹⁶Kubanga Mukama Katonda wo akyayira ddala abo bonna abakola ebyo ebitali bya bwesigwa.

¹⁷Teweerabiranga Abamaleki bye baakukola bwe wali mu lugendo lwo ngʼova mu Misiri.

¹⁸Bwe wali okooye nnyo nga nʼamaanyi gakuweddemu, baakusanga mu lugendo lwo olwo, ne balumba abo bonna abaali basembyeyo emabega wo ne babatta; Katonda nga tebamutya.

¹⁹Bwʼolimala okutuuka mu nsi Mukama Katonda wo gyʼakuwa okubeera obusika bwo obwʼenkalakkalira, ngʼakumazeeko nʼabalabe bo bonna ku njuyi zonna, ngʼowummudde, ozikiririzanga ddala Abamaleki nʼobamalirawo ddala bonna wansi wʼeggulu, ne watabaawo baliddayo kubajjukira nti baali babaddewo. Ekyo tokyerabiranga.