Ekyamateeka Olwokubiri 32:1-52 LGCB2014 - Bible AI

¹Tega okutu ggwe eggulu, nange nnaayogera, wulira ebigambo byʼomu kamwa kange.

²Okuyigiriza kwange ka kutonnye ngʼenkuba, nʼebigambo byange bigwe ngʼomusulo, bigwe ngʼobufuuyirize ku muddo, ngʼoluwandagirize ku bisimbe ebito.

³Kubanga ndirangirira erinnya lya Mukama; mutendereze ekitiibwa kya Katonda waffe!

⁴Lwe lwazi, emirimu gye mituukirivu, nʼebikolwa bye byonna bya bwenkanya. Ye Katonda omwesigwa, ataliiko bukuusa, Omwenkanya era omutereevu mu byonna.

⁵Beeyisizza ngʼabagwenyufu gyʼali, baswavu era tebakyali baana be, wabula omulembe omukyamu era ogwʼamawaggali.

⁶Bwe mutyo bwe musasula Mukama Katonda, mmwe abantu abasirusiru era abatalina magezi? Si ye kitaawo eyakutonda, nʼakussaawo nʼakunyweza?

⁷Jjukira ebiseera ebyʼedda, fumiitiriza ku myaka egyayita edda. Buuza kitaawo ajja kukubuulira ne bakadde bo abakulembeze bajja kukutegeeza.

⁸ⓘ Ali Waggulu Ennyo bwe yagabanyiza amawanga ensi zaago abantu bonna bwe yabayawulayawulamu, yategeka ensalo zʼamawanga ngʼomuwendo gwʼabaana ba Isirayiri bwe gwali.

⁹Omugabo gwa Mukama Katonda be bantu be, Yakobo bwe busika bwe bwe yagabana.

¹⁰Yamuyisanga mu ddungu, mu nsi enkalu eya kikuŋŋunta, Yamuzibiranga, nʼamulabiriranga, nʼamukuumanga ngʼemmunye eyʼeriiso lye.

¹¹Ngʼempungu bwʼenyegenya ku kisu kyayo, nʼepaapaalira waggulu wʼobwana bwayo, era nga bwʼeyanjuluza ebiwaawaatiro byayo, nʼebusitula, nʼebutumbiiza ku biwaawaatiro byayo,

¹²Mukama Katonda yekka ye yamukulemberanga; so tewabangawo katonda mulala.

¹³Yamuteeka ku ntikko zʼensozi ezʼensi eyo, nʼamuliisanga ku bibala byʼomu nnimiro. Yamukulizanga ku mubisi gwʼenjuki ogwʼomu njatika zʼenjazi nʼamafuta agaavanga mu mayinja amagumu

¹⁴ne bbongo eyavanga mu biraalo, nʼamata okuva mu bisibo, nʼamasavu agʼendiga ento nʼennume, nʼembuzi ennume nʼenduusi ezʼe Basani, awamu nʼeŋŋaano esinga obulungi, wanywanga wayini owʼejjovu eyavanga mu mizabbibu.

¹⁴

¹⁵Yesuluuni yakkuta nʼagejja nʼasambagala; ngʼojjudde emmere nga weezitoowerera nʼoggwaamu amaanyi. Yava ku Katonda eyamukola, nʼalekulira Olwazi olwʼObulokozi bwe.

¹⁶Baamukwasa obuggya olwa bakatonda abalala ne bamusunguwaza ne bakatonda abalala.

¹⁷ⓙ Baawaayo ssaddaaka eri baddayimooni, so si eri Katonda, eri bakatonda be batamanyangako, bakatonda abaggya abaali baakatuuka bakatonda abo bajjajjammwe be bataatyanga.

¹⁸Weerabira Olwazi eyakuzaala, weerabira Katonda eyakuzaala.

¹⁹Mukama Katonda bwe yakiraba nʼabeegobako kubanga yasunguwazibwa batabani be ne bawala be.

²⁰Nʼagamba nti, Nzija kubakweka amaaso gange ndabe ebinaabatuukako; kubanga omulembe gwabwe mwonoonefu, abaana abatalinaamu bwesigwa.

²¹Bankwasa obuggya ne bakatonda abalala, ne banyiiza nʼebifaananyi byabwe omutali nsa. Ndibakwasa obuggya olwʼabo abatali ggwanga, ndibakwasa obusungu olwʼeggwanga eritategeera.

²²Kubanga obusungu bwange bukumye omuliro, ne gwaka okutuukira ddala wansi mu magombe, gusenkenya ensi nʼebibala byayo, ne gwokya amasozi okutandikira ku bikolo byago.

²²

²³Nzija kubatuumangako emitawaana ne mbayiwangako obusaale bwange.

²⁴Nnaabasindikiranga enjala namuzisa, nʼobulwadde obwokya, ne kawumpuli omuzikiriza; ndibaweereza ebisolo ebyʼamannyo amasongovu nʼebyewalula mu nfuufu ebyʼobusagwa.

²⁵ⓚ Ekitala kinaabamalangako abaana baabwe ne mu maka gaabwe eneebanga ntiisa njereere. Abavubuka abalenzi nʼabawala balizikirira abaana abawere nʼabasajja abʼenvi bonna batyo.

²⁶Nalowoozaako ku kyʼokubasaasaanya wabulewo akyabajjukiranga ku nsi.

²⁷Naye ne saagala abalabe baabwe kubasosonkereza, kubanga abaabalumbagana bandiremeddwa okukitegeera, ne beewaana nti, “Ffe tuwangudde, Mukama ebyo byonna si ye yabikoze.”

²⁷

²⁸Lye ggwanga omutali magezi, mu bo temuliimu kutegeera.

²⁹Singa baali bagezi ekyo bandikitegedde, ne balowooza ku biribatuukako ku nkomerero.

³⁰Omusajja omu yandisobodde atya okugoba abantu olukumi, oba ababiri okudumya omutwalo ne badduka, wabula nga Lwazi waabwe yʼabatunzeeyo, Mukama Katonda ngʼabawaddeyo?

³¹Kya mazima lwazi waabwe tali nga Lwazi waffe, abalabe baffe bakiriziganya naffe.

³²Wayini waabwe ava mu terekero lya wayini wa Sodomu, nʼennimiro zʼemizabbibu za Ggomola; ezzabbibu zaabwe zabbibu za butwa, ebirimba byazo bikaawa;

³³wayini waazo bwe butwa bwʼemisota obusagwa obukambwe obwʼamasalambwa.

³³

³⁴Ekyo saakyeterekera, nga kuliko nʼenvumbo mu mawanika gange?

³⁵Okuwoolera eggwanga kwange, nze ndisasula. Luliba lumu ebigere byabwe ne biseerera, obudde bwabwe obwʼokuzikirira busembedde, nʼokubonerezebwa kwabwe kubafubutukirako.

³⁶Mukama Katonda alisalira abantu omusango mu bwenkanya, alisaasira abaweereza be, bwʼaliraba ngʼamaanyi gonna gabaweddemu, omuddu nʼowʼeddembe nga tewasigadde nʼomu.

³⁷Nʼalyoka abuuza nti, Kale nno bakatonda baabwe bali ludda wa, olwazi mwe beekweka.

³⁸Baani abaalyanga amasavu ku ssaddaaka zaabwe, ne banywa wayini owʼekiweebwayo ekyokunywa? Basituke bajje babayambe, kale babawe obubudamo babakuume!

³⁸

³⁹Mulabe kaakano, nga nze kennyini, nze Ye! Tewali katonda mulala wabula Nze; nzita era ne nzuukiza, nfumita era ne mponya; era tewali atangira mukono gwange nga gukola.

⁴⁰Ngolola omukono gwange eri eggulu ne nangirira nti, ddala ddala nga bwʼendi omulamu emirembe gyonna

⁴¹bwe mpagala ekitala kyange ekimasamasa, nʼomukono gwange ne gukikwata nga nsala emisango, nnaawalananga abalabe bange, ne neesasuzanga eri abanaankyawanga.

⁴²Obusaale bwange ndibutamiiza omusaayi, nʼekitala kyange kirirya ennyama, nʼomusaayi gwʼabattiddwa nʼabawambiddwa, nʼogwʼemitwe egyʼabakulembeze bʼabalabe.

⁴³Mujaguze mmwe amawanga awamu nʼabantu be, kubanga aliwalanira omusaayi gwʼabaweereza be, aliwalana abalabe be, era alitangirira olwʼensi ye nʼabantu be.

⁴⁴Awo Musa nʼajja awamu ne Yoswa mutabani wa Nuuni, nʼaddamu ebigambo byonna ebyʼoluyimba olwo ngʼabantu bonna bawulira.

⁴⁵Musa bwe yamala okuddamu ebigambo ebyo byonna eri abaana ba Isirayiri,

⁴⁶nʼabagamba nti, “Mukwate ku mutima gwammwe ebigambo byonna bye mbategeezezza leero nʼobuwombeefu obungi, mulyoke mulagire abaana bammwe bagonderenga nʼobwegendereza ebigambo byonna ebyʼamateeka gano.

⁴⁷Ebigambo ebyo si bya kusaagasaaga, wabula bye bigambo ebikwatira ddala ku bulamu bwammwe bwennyini. Okusinziira ku bigambo bino, mugenda kuwangaala nga muli mu nsi gye mugenda okusomokera omugga Yoludaani okugifuna.”

⁴⁸Ku lunaku olwo lwennyini Mukama Katonda nʼagamba Musa bwʼati nti,

⁴⁹“Yambuka olinnyerinnye ku Lusozi Nebo oluli mu nsozi za Abalimu mu nsi ya Mowaabu, osusse amaaso Yeriko olengere ensi ya Kanani gyʼempa abaana ba Isirayiri okuba obutaka bwabwe obwʼenkalakkalira.

⁵⁰Ku lusozi olwo lwʼojja okulinnya kwʼolifiira okuŋŋaanyizibwe eri abantu bo, nga muganda wo Alooni bwe yafiira ku lusozi Koola, nʼakuŋŋaanyizibwa eri abantu be.

⁵¹Kubanga mwembi mwanziggyamu obwesige mu maaso gʼabaana ba Isirayiri ku mazzi gʼe Meriba-Kadesi mu ddungu lyʼe Zini, olwʼokulemwa okussa ekitiibwa ekituukiridde mu butukuvu bwange mu maaso gʼabaana ba Isirayiri.

⁵²Noolwekyo ensi ojja kugirengera bulengezi, so toligiyingiramu, ensi gye mpa abaana ba Isirayiri.”