Ekyamateeka Olwokubiri 33:1-29 LGCB2014 - Bible AI

¹Guno gwe mukisa, Musa musajja wa Katonda gwe yasabira abaana ba Isirayiri nga tannafa.

²Yagamba nti,

²“Mukama Katonda yajja gye tuli ngʼava ku Sinaayi nʼatutuukako ngʼava ku Seyiri; yamasamasa ngʼava ku Lusozi Palani. Yajja nʼobufukunya bwʼabatukuvu okuva ku bukiika obwaddyo obwʼensozi ze.

³Mazima gwʼoyagala abantu, abatukuvu bonna bali mu mikono gyo. Bavuunama wansi ku bigere byo ne bawulira ebiragiro byʼobawa.

⁴Ge mateeka Musa ge yatuwa ngʼekyokufuna ekyʼekibiina kya Yakobo.

⁵Waasitukawo kabaka mu Yesuluuni abakulembeze bʼabantu bwe baakuŋŋaana nga bye bika bya Isirayiri ebyegasse.

⁵

⁶“Lewubeeni abenga mulamu; alemenga kuggwaawo nʼomuwendo gwʼabasajja be gulemenga kukendeera.”

⁷Kino kye yayogera ku Yuda: “Wulira, Ayi Mukama Katonda okukaaba kwa Yuda; omuleete eri abantu be. Yeerwaneko nʼemikono gye. Omuyambenga ngʼalwanyisa abalabe be!”

⁸ⓛ Bino bye yayogera ku Leevi: “Sumimu wo ne Ulimu wo biwe omusajja oyo gwʼoyagala ennyo. Wamukebera e Masa nʼomugezesa ku mazzi agʼe Meriba.

⁹Yayogera ku kitaawe ne nnyina nti, ‘Abo sibafaako.’ Baganda be teyabategeeranga wadde okusembeza abaana be; baalabiriranga ekigambo kyo ne bakuumanga endagaano yo.

¹⁰Banaayigirizanga Yakobo ebiragiro byo ne Isirayiri amateeka go. Banaanyookezanga obubaane mu maaso go, nʼebiweebwayo ebyokebwa ku kyoto kyo.

¹¹Ayi Mukama Katonda owe omukisa byonna byʼakola, era okkirize emirimu gyʼemikono gye. Okubirenga ddala abo abamugolokokerako okubenga abalabe be balemenga kwongera kumulumbanga.”

¹²Bye yayogera ku Benyamini: “Omwagalwa wa Mukama Katonda abeerenga wanywevu, Katonda Ali Waggulu ngʼamwebulungudde bulijjo, omwagalwa anaagalamiranga wakati ku bibegabega bye.”

¹³Yayogera bwʼati ku Yusufu: “Ettaka lye Mukama Katonda aliwe omukisa, nʼomusulo omulungi ennyo ogunaavanga waggulu mu ggulu nʼamazzi mu nzizi empanvu mu ttaka wansi,

¹⁴nʼebibala ebigimu ennyo ebinaavanga mu musana, nʼamakungula aganaasinganga mu myezi gyonna;

¹⁵nʼebibala ebinaakiranga obulungi ku nsozi ezʼedda, nʼokwala kwʼebirime ku nsozi ezʼemirembe gyonna;

¹⁶nʼebirabo ebisinga byonna mu nsi nʼokujjula kwayo, nʼobuganzi obunaavanga eri oyo owʼomu kisaka ekyaka. Ebyo byonna ka bijjenga ku mutwe gwa Yusufu, mu kyenyi kyʼomulangira mu baganda be.

¹⁷Mu kitiibwa anaabanga ente ennume embereberye amayembe ge, ngʼamayembe ga sseddume endalu; anaagatomezanga amawanga nʼagayuzaayuza, nʼagagoberanga ku nkomerero yʼensi. Obwo bwe bunaabanga obukumi bwa Efulayimu nga ze nkumi za Manase.”

¹⁸Yayogera bwʼati ku Zebbulooni: “Jaguzanga, ggwe Zebbulooni, bwʼonoofulumanga; ne Isakaali ngʼali mu weema zo.

¹⁹Banaakoowoolanga amawanga okwambuka ku nsozi ne baweerangayo eyo ssaddaaka ezʼobutuukirivu, banaalyanga ebyʼobugagga ebya mayanja, nga beeyambisa nʼebyobugagga ebikweke mu musenyu.”

²⁰Yayogera bwʼati ku Gaadi: “Alina omukisa oyo agaziya ensalo zʼomugabo gwa Gaadi, Gaadi omwo mwʼabeera ngʼempologoma ngʼayuza omukono nʼomutwe.

²¹Yeerondera omugabo gwʼettaka erisinga obulungi, omugabo gwʼomukulembeze gwe gwamukuumirwa. Abakulembeze bʼabantu bwe baakuŋŋaana ye yabasalira emisango gya Mukama, nʼokukwasa Isirayiri amateeka ga Mukama Katonda.”

²²Yayogera bwʼati ku Ddaani: “Ddaani mwana gwa mpologoma, ogubuuka nga guva mu Basani.”

²³Yayogera bwʼati ku Nafutaali: “Ggwe Nafutaali ajjudde obuganzi bwa Mukama Katonda era ngʼojjudde emikisa gye, onoosikira obukiikaddyo okutuuka ku nnyanja.”

²⁴Yayogera bwʼati ku Aseri: “Asinga okuweebwa omukisa mu batabani ye Aseri, ku baganda be gwe babanga basinga okwagala era emizabbibu[15] gigimuke nnyo mu ttaka lye.

²⁵Enzigi zʼebibuga byo zinaasibwanga nʼeminyolo egyʼekyuma nʼekikomo nʼamaanyi go ganenkananga nʼobuwangaazi bwo.

²⁵

²⁶“Tewali afaanana nga Katonda wa Yesuluuni eyeebagala waggulu ku ggulu ngʼajja okukuyamba ne ku bire mu kitiibwa kye.

²⁷Katonda ataggwaawo bwe buddukiro bwo, era akuwanirira nʼemikono gye emirembe gyonna. Anaagobanga abalabe bo nga naawe olaba, nʼagamba nti, ‘Bazikirize!’

²⁸Bwʼatyo Isirayiri anaabeeranga mu mirembe yekka, ezzadde lya Yakobo linaabeeranga wanywevu, mu nsi erimu emmere yʼempeke ne wayini, eggulu mwe linaatonnyezanga omusulo.

²⁹Nga weesiimye, Ayi Isirayiri! Ani akufaanana, ggwe eggwanga Mukama Katonda lye yalokola? Ye ngabo yo era omubeezi wo, era kye kitala kyo ekisinga byonna. Abalabe bo banaakuvuunamiranga, era onoobalinnyiriranga.”