Ekyamateeka Olwokubiri 34:1-12 LGCB2014 - Bible AI

¹Awo Musa nʼayambuka okuva mu nsenyi za Mowaabu, nʼalinnyalinnya Olusozi Nebo, nʼatuukira ddala ku ntikko eyitibwa Pisuga, eyolekedde Yeriko. Mukama Katonda nʼasinziira awo nʼamulengeza ensi yonna ensuubize: okuva ku Giriyaadi okutuuka ku Ddaani,

²ne Nafutaali yonna, nʼensi ya Efulayimu ne Manase, nʼensi yonna eya Yuda okutuuka ku Nnyanja eyʼEbugwanjuba,

³ne Negebu nʼolusenyi olwʼekiwonvu omuli Ekibuga kyʼEnkindu ekiyitibwa Yeriko okutuukira ddala ku Zawaali.

⁴ⓜ Mukama Katonda nʼagamba Musa nti, “Eyo yʼensi gye nalayirira Ibulayimu, ne Isaaka, ne Yakobo, nga ngibasuubiza nti, ‘Ndigiwa ezzadde lyo.’ Ngikulaze nʼogiraba nʼamaaso go, naye tojja kusomoka kugituukamu.”

⁵Awo Musa, omuweereza wa Mukama, nʼafiira awo mu nsi ya Mowaabu, ngʼekigambo kya Mukama Katonda bwe kyali.

⁶Mukama nʼaziika Musa mu nsi ya Mowaabu, mu kiwonvu ekyolekedde Besupyoli, naye tewali nʼomu amanyi malaalo ge we gali ne ku lunaku lwa leero.

⁷Musa we yafiira yali nga yakamaze emyaka kikumi mu abiri egyʼobukulu; kyokka ngʼamaaso ge galaba bulungi, era nʼamaanyi ge nga tegakendeddeeko.

⁸Abaana ba Isirayiri ne bakaabira Musa mu nsenyi za Mowaabu okumala ennaku amakumi asatu, okutuusa ennaku ezo ezʼokukaaba nʼokukungubagira Musa bwe zaggwaako.

⁹Yoswa, mutabani wa Nuuni, yali ajjudde omwoyo ogwʼamagezi, kubanga Musa yali yamuteekako emikono gye. Abaana ba Isirayiri ne bamuwulira, ne bakola nga Mukama Katonda bwe yali alagidde Musa.

¹⁰Okuva olwo tewayimukangawo nnabbi mulala mu Isirayiri afaanana nga Musa, Mukama Katonda gwe yamanyagana naye amaaso nʼamaaso.

¹¹Tewaaliwo yamwenkana olwʼobubonero nʼebyamagero Mukama Katonda bye yamutuma okukola mu nsi yʼe Misiri ku Falaawo ne ku baweereza be bonna, ne ku nsi ye yonna,

¹²era nʼolwʼekitiibwa kye ekyʼamaanyi amangi, nʼobuyinza obwʼentiisa bwe yayoleka mu Isirayiri yenna.