Ekyamateeka Olwokubiri 5:1-33 LGCB2014 - Bible AI

¹Awo Musa nʼakuŋŋaanya Isirayiri yenna, nʼabagamba nti, Wulira, Ayi Isirayiri, amateeka nʼebiragiro bye nkutegeeza ngʼowulira ku lunaku lwa leero. Mubiyige era mubigobererenga nʼobwegendereza.

²Mukama Katonda waffe yakola naffe endagaano nga tuli e Kolebu.

³Endagaano eyo Mukama Katonda teyagikola ne bazadde baffe, naye yagikola naffe abali wano era abalamu ku lunaku lwa leero.

⁴Mukama Katonda yayogera nammwe nga mwolekaganye naye, ye ngʼasinziira mu muliro ku lusozi olunene.

⁵Mu kaseera ako nze nnali nnyimiridde wakati wa Mukama nammwe okubatuusaako ekigambo kya Mukama Katonda, kubanga mmwe mwali mutidde omuliro, noolwekyo ne mutalinnya ku lusozi olunene. Nʼabagamba nti,

⁶ⓒ “Nze Mukama Katonda wo, eyakuggya mu Misiri, mu nsi gye mwafuulibwa abaddu.”

⁷ⓓ “Tobeeranga na bakatonda balala wabula Nze nzekka.”

⁸ⓔ “Teweekoleranga kintu kyonna ekyole ekifaanana nʼekintu kyonna ekiri waggulu mu ggulu, oba wansi ku nsi, oba ekiri mu mazzi agali wansi wʼensi.

⁹ⓕ Ebyo tobivuunamiranga so tobisinzanga. Kubanga Nze Mukama Katonda wo ndi Katonda wa buggya; mbonereza abaana olwʼebibi bya bakitaabwe nʼebya bajjajjaabwe okutuusa ku mulembe ogwokusatu nʼogwokuna ogwʼabo abankyawa.

¹⁰ⓖ Naye abo enkumi nʼenkumi abanjagala era abakwata amateeka gange, mbalaga okwagala kwange okutaggwaawo.”

¹⁰

¹¹ⓗ “Tokozesanga linnya lya Mukama Katonda wo ngʼolayira ebitaliimu nsa: kubanga Mukama talirema kumusalira musango ne gumusinga omuntu oyo alayirira obwereere erinnya lye.”

¹¹

¹²ⓘ “Olunaku lwa Ssabbiiti lujjukirenga era olutukuzenga, nga Mukama Katonda wo bwe yakulagira.

¹³ⓙ Kolanga emirimu gyo, ofaabiine mu nnaku omukaaga,

¹⁴naye olunaku olwʼomusanvu ye Ssabbiiti ya Mukama Katonda wo. Ku lunaku olwo tokolerangako mulimu gwonna; ggwe, wadde mutabani wo, wadde muwala wo, wadde omuweereza wo omusajja, oba omuweereza wo omukazi, oba ente yo eya sseddume, oba endogoyi yo, oba ku nte zo endala zonna, oba omugenyi ali omumwo, abaweereza bo abasajja, nʼabaweereza bo abakazi, nabo balyoke bawummuleko nga ggwe.

¹⁵Ojjukiranga nga wali muweereza mu nsi eyʼe Misiri, Mukama Katonda wo nʼakuggyayo nʼomukono gwe omuwanvu era ogwʼamaanyi. Mukama Katonda wo kyeyava akulagira okuumenga olunaku olwa Ssabbiiti.”

¹⁵

¹⁶ⓚ “Kitaawo ne nnyoko obassangamu ekitiibwa, nga Mukama Katonda wo bwe yakulagira, olyoke owangaalenga, era obeerenga nʼemirembe, mu nsi Mukama Katonda wo gyʼakuwa.”

¹⁶

¹⁷ⓛ “Tottanga.”

¹⁷

¹⁸ⓜ “Toyendanga.”

¹⁸

¹⁹ⓝ “Tobbanga.”

¹⁹

²⁰ⓞ “Towaayirizanga muntu munno.”

²⁰

²¹ⓟ “Teweegombanga mukyala wa muntu munno. So teweegombanga nnyumba ya muntu munno, newaakubadde ennimiro ye, newaakubadde omuweereza we omusajja, newaakubadde omuweereza we omukazi, wadde ente ye, oba endogoyi ye, oba ekintu kyonna ekya muntu munno.”

²²Ago ge mateeka Mukama ge yalangirira eri ekibiina kyammwe kyonna, nga muli wansi wʼolusozi Sinaayi, ngʼayogera nʼeddoboozi eryʼomwanguka eryava mu muliro, nʼekire, nʼekizikiza ekikutte ennyo; teyayongerako birala. Bwʼatyo nʼagawandiika ku bipande bibiri ebyʼamayinja, nʼabinkwasa.

²³Bwe mwawulira eddoboozi nga liva mu kizikiza, ate ngʼolusozi lwaka omuliro, ne musembera gye ndi, nʼabakulembeze bonna abʼebika byammwe, nʼabakulu bammwe bonna.

²⁴Ne mugamba nti, “Laba, Mukama Katonda waffe atulaze ekitiibwa kye nʼobukulu bwe, era nʼeddoboozi lye ne tuliwulira nga lifuluma wakati mu muliro.

²⁵Kale, kaakano tufiira ki? Kubanga omuliro guno omungi bwe guti gujja kutusaanyaawo, tufe tuggweewo, singa twongera okuwulira eddoboozi lya Mukama Katonda waffe.

²⁶Kubanga, ani mu bantu omuntu eyali awulidde ku ddoboozi lya Katonda omulamu ngʼayogerera wakati mu muliro, nga ffe bwe tuliwulidde, nʼasigala ngʼakyali mulamu?

²⁷Ggwe, musemberere, owulirize bulungi byonna Mukama Katonda waffe byʼanaayogera. Olyoke otubuulire ebyo byonna Mukama Katonda waffe byʼanaakugamba. Tujja kubiwuliriza era tubigondere.”

²⁸Mukama yawulira ebigambo byammwe, bwe mwayogera nange, Mukama Katonda nʼaŋŋamba nti, “Ebigambo abantu abo bye bakugambye mbiwulidde. Byonna bye boogedde bibadde birungi.

²⁹Singa nno bulijjo emitima gyabwe gibeera bwe gityo; ne bantya, era ne bagonderanga amateeka gange gonna, ne balyoka balaba ebirungi awamu nʼabaana baabwe emirembe gyonna!

³⁰Genda obagambe baddeyo mu weema zaabwe.

³¹Naye ggwe sigala wano nange, ndyoke nkutegeeze amateeka gonna nʼebiragiro, byʼojja okubayigiriza babikolerengako nga bali mu nsi gye mbawa okubeera obutaka bwabwe obwʼenkalakkalira.”

³²“Noolwekyo mwegenderezenga nnyo, mukolenga nga Mukama Katonda wammwe bwʼabalagidde; mulemenga okukyama okulaga ku mukono ogwa ddyo oba ogwa kkono.

³³Mutambulirenga mu kkubo Mukama Katonda wammwe lyʼabalagidde, mulyoke mubenga balamu, mugaggawale, era muwangaalenga nga muli mu nsi ejja okubeera obutaka bwammwe obwʼenkalakkalira.”