Engero 1:1-33 LGCB2014 - Bible AI

¹Engero za Sulemaani, mutabani wa Dawudi, kabaka wa Isirayiri.

²Yaziwandiika okuyigiriza abantu okuba nʼamagezi nʼokuyiga, era nʼokutegeera ebigambo ebyʼobulabufu; ebyʼobulamu ebyʼamagezi nʼempisa.

³Sulemaani yayagala abantu okuba nʼempisa, nʼobulamu obwʼamagezi, okukolanga ebituufu, nʼokubeera abenkanya nʼokugobereranga ensonga;

⁴okuyigiriza amagezi abatalina bumanyirivu, nʼabavubuka okufuna okumanya nʼokutegeera.

⁵Nʼabantu abʼamagezi nabo bwe bawulira beeyongere okuyiga nʼabategeevu beeyongere okubangulwa.

⁶Era engero zino zaawandiikibwa okutegeera engero, enjogera nʼebikokyo.

⁷Kale mu kutya Mukama amagezi mwe gasookera, naye abasirusiru banyooma amagezi nʼokulagirirwa.

⁷

⁸Mwana wange ossangayo omwoyo eri ebiragiro bya kitaawo, era tolekanga kukuutira kwa maama wo;

⁹bijja kuba ngule eneeweesanga omutwe gwo ekitiibwa, nʼemikuufu mu bulago bwo.

⁹

¹⁰Mwana wange abakozi bʼebibi bwe bakusendasendanga, tokkirizanga.

¹¹Bwe bakugambanga nti, “Tugende ffenna twesanyuse, tunyage, tubbe nʼokutta; tokkirizanga;

¹²ngʼentaana bwʼemira abantu, naffe tubamire tutyo nga bakyali balamu, era nga balamba, ngʼabagenda mu bunnya obuwanvu;

¹³nga twefunira ebyʼobugagga bye tutakoleredde, ne tujjuza amayumba gaffe obugagga obubbe;

¹⁴ngʼababi batuyita tubeegatteko, tugabane kyenkanyi ebibbe nʼebinyage.”

¹⁵Mwana wange totambuliranga wamu nabo, era ekigere kyo kiziyize okukwatanga ekkubo lyabwe:

¹⁶Kubanga ebigere byabwe bidduka bunnambiro okukola ebibi, era kibanguyira okuyiwa omusaayi.

¹⁷Nga kuba kumala biseera okutega omutego, ngʼekinyonyi kyʼoyagala okukwata kikulaba,

¹⁸naye abantu ngʼabo baba beetega bokka, baba beetega omutego ogunaabakwasa bo bennyini.

¹⁹Bwe lityo bwe libeera ekkubo lya buli muntu anoonya okugaggawalira mu bukyamu. Obugagga obwʼengeri eyo busaanyaawo obulamu bwʼabo ababufuna.

²⁰Amagezi galeekaanira waggulu mu nguudo; Gayimusa amaloboozi gaago, mu bifo ebigazi ebyʼomu bibuga.

²¹Ne galeekaanira waggulu, mu kifo enguudo ennene we zisisinkanira, era gasinzira mu miryango gyʼekibuga ne googera:

²²Mulituusa ddi mmwe abʼamagezi amatono obutayagala kweyongera kuyiga byʼamagezi, nammwe abʼamalala okunyoomanga ebyʼamagezi nʼabasirusiru okukyawanga okumanya?

²³Kale singa muwuliriza okunenya kwange, laba, ndifuka omutima gwange nʼebirowoozo byange mu mmwe.

²⁴Kubanga na bayita ne mugaana okuwuliriza, ne ngolola omukono ne wataba nʼomu afaayo,

²⁵era ne mutafaayo ku magezi ge nabawa, era ne mugaana okubuulirira kwange kwonna,

²⁶kale nange ndibasekerera nga muli mu nnaku, era mbakudaalire ngʼentiisa ebagwiridde.

²⁷Entiisa bwʼeribajjira ngʼomuyaga omungi, ennaku nʼokubonaabona, okulumwa nʼobubalagaze,

²⁷

²⁸kale balinkoowoola, naye siriyitaba; balinnoonya obutaweera naye ne batandaba.

²⁹Kubanga baakyawa okuyigirizibwa, nʼokumanya, era ne bamalirira obutatya Mukama.

³⁰Ne bagaana okuwuliriza amagezi gange; ne banyooma okunenya kwange kwonna.

³¹Kyebaliva balya ebibala ebyʼekkubo lyabwe ebbi, era ne bajjula ebibala ebyʼenkwe zaabwe.

³²Obusirusiru bulitta abʼamagezi amatono nʼobutafaayo bulizikiriza abasirusiru,

³³naye buli ampuliriza anaabeeranga mirembe, ngʼagumye nga talina kutya kwonna.