1Minzaani eteri ya mazima ya muzizo eri Mukama, naye ebipimo ebituufu bye bimusanyusa.
2Amalala bwe gajja, ngʼobuswavu butuuse, naye obwetoowaze buleeta amagezi.
3Obwesimbu bwʼabatuukirivu bubaluŋŋamya, naye enkwe zʼabatali beesigwa zibazikirizisa.
4Obugagga tebugasa ku lunaku olwʼokusalirwako omusango, naye obutuukirivu buwonya okufa.
5Obutuukirivu bwʼabalongoofu bubatambuliza mu kkubo eggolokofu naye abakozi bʼebibi bagwa olwʼebikolwa byabwe ebibi.
6Obutuukirivu bwʼabagolokofu bubawonya, naye abatali beesigwa bagwa mu mutego olwʼokwegomba ebibi.
7Omukozi wʼebibi bwʼafa, essuubi lye libula, ne byonna bye yasuubira mu maanyi bikoma.
8Omutuukirivu aggyibwa mu mitawaana, naye jjijjira omukozi wʼebibi.
9Akamwa kʼoyo atatya Katonda, kazikiriza muliraanwa, naye olwʼokumanya, abatuukirivu bawona.
10Abatuukirivu bwe bakulaakulana ekibuga kijaguza; abakozi bʼebibi bwe bazikirira wawulirwawo amaloboozi agʼessanyu.
11Omukisa gwʼabatuukirivu gukulaakulanya ekibuga: naye olwʼakamwa kʼabakozi bʼebibi, ekibuga kizikirizibwa.
12Omuntu atalina magezi anyooma muliraanwa we, naye omuntu ategeera akuuma olulimi lwe.
13Aseetula olugambo atta obwesigwa, naye omuntu omwesigwa akuuma ekyama.
14Awatali kuluŋŋamizibwa eggwanga lidobonkana, naye abawi bʼamagezi abangi baleeta obuwanguzi.
15Eyeeyimirira omuntu gwʼatamanyiko alibonaabona, naye oyo akyawa okweyimirira aliba bulungi.
16Omukazi owʼekisa aweebwa ekitiibwa, naye abasajja abʼamawaggali bakoma ku bugagga bwokka.
17Omusajja alina ekisa aganyulwa, naye alina ettima yeereetako akabi.
18Omukozi wʼebibi afuna empeera eyʼobukuusa, naye oyo asiga ebyʼobutuukirivu akungula empeera eya nnama ddala.
19Omuntu omutuukirivu ddala alifuna obulamu, naye oyo akola ebitali bya butuukirivu alifa.
20Mukama akyawa abantu abalina emitima emikyamu, naye abʼamakubo amagolokofu be bamusanyusa.
21Mutegeerere ddala ngʼabakozi bʼebibi tebalirema kubonerezebwa, naye bazzukulu bʼabatuukirivu tebalibaako musango.
22Ngʼempeta ya zaabu mu nnyindo yʼembizzi, bwʼatyo bwʼabeera omukazi omulungi atalaba njawulo wakati wʼekirungi nʼekibi.
23Abatuukirivu bye beegomba bivaamu birungi byereere, naye abakozi bʼebibi bye bakola bisunguwaza.
24Omuntu agaba obuteerekereza, yeeyongera bweyongezi kugaggawala; naye akwatirira kye yandigabye, yeeyongera kwavuwala.
25Omuntu agaba anagaggawalanga, nʼoyo ayamba talibulako amuyamba.
26Abantu bakolimira oyo akweka eŋŋaano mu kiseera ekyʼobwetaavu, naye oyo agitunda mu kiseera ekyo afuna emikisa.
27Oyo anyiikira okukola obulungi afuna okuganja, naye oyo anoonya ekibi, kimujjira.
28Oyo eyeesiga obugagga bwe aligwa, naye abatuukirivu banaakulaakulananga ne baba ngʼamalagala amalamu.
29Omuntu aleeta emitawaana mu maka gʼewaabwe, alisikira mpewo; era nʼomusirusiru aliba muddu wʼoyo alina omutima ogwʼamagezi.
30Ekibala kyʼomutuukirivu muti gwa bulamu, era nʼoyo asikiriza emyoyo gyʼabantu ne balokoka wa magezi.
31Obanga omutuukirivu alifuna ekimusaanidde ku nsi kuno, oyo atatya Katonda nʼomwonoonyi balirema obutafuna ekibasaanidde?