Engero 31:1-31 LGCB2014 - Bible AI

¹Ebigambo bya kabaka Lemweri bye yayogera, nnyina bye yamuyigiriza.

²Ggwe mutabani wange, ggwe mutabani wʼenda yange, ggwe mutabani wʼobweyamo bwange.

³Tomaliranga maanyi go ku bakazi,[3] newaakubadde amaanyi go ku abo abazikiriza bakabaka.

³

⁴Ggwe Lemweri, si kya bakabaka, si kya bakabaka okunywanga omwenge, so si kya balangira okwegombanga omwenge,

⁵si kulwa nga bagunywa ne beerabira amateeka, ne batalamula mu bwenkanya abantu baabwe abatulugunyizibwa.

⁶Ekitamiiza mukiwenga oyo ayagala okufa, nʼomwenge oyo alina emmeeme eriko obuyinike.

⁷Mumuleke anywenga yeerabire obwavu bwe, alemenga kujjukira nate buyinike bwe.

⁷

⁸Yogereranga abo abatasobola kweyogerera, otunulenga mu nsonga zʼabo bonna abaasigala ettayo.

⁹Yogera olamulenga nʼobwenkanya, olwanirirenga abaavu nʼabali mu bwetaavu.

¹⁰Omukazi omwegendereza ani ayinza okumulaba? Wa muwendo nnyo okusinga amayinja agʼomuwendo ennyo.

¹¹Bba amwesiga nʼomutima gwe gwonna, era bba talina kyonna kya muwendo kyʼabulwa.

¹²Aleetera bba essanyu so tamukola kabi, obulamu bwe bwonna.

¹³Anoonya ebyoya byʼendiga nʼanoonya ne ppamba, nʼakola emirimu gye mu ssanyu eritayogerekeka.

¹⁴Ali ngʼebyombo byʼabasuubuzi, aleeta emmere okuva mu nsi ezeewala.

¹⁵Agolokoka tebunnakya, nʼawa abʼomu nnyumba ye ebyokulya, nʼagabira abaweereza be abawala be abaweereza emirimu egyʼokukola.

¹⁶Alowooza ku nnimiro nʼagigula; asimba ennimiro eyʼemizabbibu nʼebibala byʼemikono gye.

¹⁷Omukazi oyo akola nʼamaanyi omulimu gwe, emikono gye gikwata nʼamaanyi emirimu gye.

¹⁸Ayiiya ebyamaguzi ebirimu amagoba nʼabisuubula, era nʼettabaaza ye ekiro tezikira.

¹⁹Anyweza omuti oguluka ppamba mu mukono gwe, engalo ze ne zikwata akati akalanga.

²⁰Ayanjululiza abaavu omukono gwe, nʼagololera omukono gwe oyo ali mu bwetaavu.

²¹Mu biseera byʼobutiti taba na kutya, kubanga abʼomu nnyumba ye bonna baba nʼengoye ezʼokwambala.

²²Yeekolera ebibikka obuliri bwe, era engoye ze za linena omulungi, za ffulungu.[4]

²³Bba amanyibbwa, yʼomu ku bakulu abakulembera ensi, era ateeseza mu nkiiko enkulu.

²⁴Omukazi atunga ebyambalo ebya linena nʼabitunda, nʼaguza abasuubuzi enkoba.

²⁵Amaanyi nʼekitiibwa bye byambalo bye, era tatya ebiro ebigenda okujja.

²⁶Ayogera nʼamagezi, era ayigiriza ebyekisa.

²⁷Alabirira nnyo empisa zʼabʼomu nnyumba ye, era talya mmere ya bugayaavu.

²⁸Abaana be bagolokoka ne bamuyita wa mukisa, ne bba nʼamutendereza ngʼayogera nti,

²⁹“Abakazi bangi abakola ebyʼekitiibwa naye bonna ggwe obasinga.”

³⁰Obubalagavu bulimba nʼendabika ennungi teriiko kyegasa, naye omukazi atya Mukama anaatenderezebwanga.

³¹Mumusasule empeera gyʼakoleredde, nʼemirimu gye gimuweesenga ettendo ku miryango gyʼekibuga.