Eseza 1:1-22 LGCB2014 - Bible AI

¹ⓐ Kino kye kyabaawo ku mirembe gya Akaswero, eyafuga amasaza kikumi mu abiri mu musanvu (127) okuva e Buyindi okutuuka e Buwesiyopya.

²ⓑ Mu kiseera ekyo Kabaka Akaswero we yafugira mu lubiri e Susani,[1]

³mu mwaka ogwokusatu ogwʼobufuzi bwe, yagabula abakungu nʼabaami be abakulu embaga. Abaduumizi ba magye aga Buperusi ne Bumeedi, nʼabalangira nʼabakungu bʼamasaza bonna baagiriko.

⁴Yayolesa obugagga nʼekitiibwa nʼettendo ebyʼobwakabaka bwe okumala emyezi mukaaga.

⁵Ennaku ezo bwe zaggwaako, Kabaka nʼagabula abantu bonna okuva ku asemberayo ddala okutuuka ku asingirayo ddala ekitiibwa embaga endala eyali mu luggya, mu lubiri e Susani okumala ennaku musanvu.

⁶Oluggya lwalimu entimbe ezʼengoye enjeru nʼeza bbululu, nga zisibiddwa nʼemiguwa egya linena omulungi nʼolugoye olwa kakobe nga lusibiddwa nʼempeta eza ffeeza ku mpagi ezʼamayinja aganyirira. Waaliwo nʼebitanda[2] ebya zaabu nʼeffeeza ku lubalaza olwaliire nʼamayinja aganyirira, amamyufu, nʼameeru, nʼaga kyenvu nʼamaddugavu.

⁷Mu kugabula kwa kabaka, wayini yaweerezebwa mu bikopo bya zaabu, nga buli kimu tekifanagana na kinnaakyo, ne wayini wa Kabaka yali mungi ddala.

⁸Buli mugenyi yanywanga nga bwe yayagala kubanga kabaka yalagira nti, “Buli mugenyi anywe nga bwʼayagala.”

⁹Ne Nnabagereka Vasuti naye nʼagabula abakyala embaga mu lubiri lwa Kabaka Akaswero.

¹⁰Awo ku lunaku olwomusanvu, Kabaka Akaswero mu ssanyu lingi olwa wayini gwe yali anywedde, nʼalagira abalaawe musanvu, abaamuweerezanga: Mekumani, ne Bizusa, ne Kalubona, ne Bigusa, ne Abagusa, ne Zesali ne Kalukasi,

¹¹okugenda okuyita Nnabagereka Vasuti ajje mu maaso ge ngʼatikkiddwa engule eya Nnabagereka, asobole okulaga obubalagavu bwe eri abantu nʼabakungu, kubanga yali mulungi, mubalagavu okukamala.

¹²Naye abaweereza bwe baatuusa ekiragiro kya kabaka, Nnabagareka Vasuti nʼagaana okugenda. Era ekyavaamu kabaka nʼasunguwala, era obusungu bwe ne bubuubuuka.

¹³Naye Kabaka yalina empisa eyʼokwebuuzanga ku bakugu mu byʼamateeka, era nʼateesa nʼabasajja abagezigezi abategeera ebifa ku nsonga eyo.

¹⁴Amannya ga bakungu abo abakulu omusanvu mu bwakabaka bwe Buperusi ne Bumeedi ge gano: Kalusena, ne Sesali, ne Adumasa, ne Talusiisi, ne Meresi, ne Malusema ne Memukani. Bano be baamubeeranga ku lusegere.

¹⁵Awo Kabaka nʼababuuza nti, “Okusinziira ku mateeka, Nnabagereka Vasuti agwanidde kibonerezo ki olwʼobutagondera kiragiro kya Kabaka Akaswero ekimutuusibbwako abalaawe?”

¹⁶Memukani nʼaddamu Kabaka nʼabakungu nti, “Nnabagereka Vasuti asobezza nnyo, ate si eri Kabaka yekka, naye nʼeri abakungu nʼabantu bonna abʼomu bitundu byonna Kabaka Akaswero byʼafuga.

¹⁷Era olwʼenneeyisa Nnabagereka gye yeeyisizaamu, bwe kinaamanyibwa abakyala, nabo bajja kunyoomanga ba bbaabwe nga bagamba nti, ‘Nga Kabaka Akaswero yalagira Nnabagereka Vasuti okuleetebwa gyʼali, nʼajeema.’

¹⁸Era olunaku lwa leero abakyala bonna mu Buperusi ne Bumeedi aba bakungu abawulidde ku nneeyisa ya Nnabagereka bajjanga kweyisa mu ngeri yʼemu eri abakungu ba Kabaka. Era obunyoomi wamu nʼobutabanguko tebuggwengawo mu maka.

¹⁹Noolwekyo Kabaka bwʼanaasiima, awe ekiragiro, era kiwandiikibwe mu mateeka ga Buperusi ne Bumeedi agatakyuka, nti Vasuti aleme okujja nate mu maaso ga Kabaka Akaswero. Ate nʼekifo kye ekyʼObwannabagereka, kiweebwe omukazi omulala amusinga.

²⁰Awo ekiragiro kya kabaka bwe kinaabuna mu bwakabaka bwonna, abakyala bonna banassangamu ba bbaabwe ekitiibwa okuva ku wawagulu okutuukira ddala ku wawansi asembayo.”

²¹Ekigambo ekyo kyasanyusa nnyo Kabaka nʼabakungu be, era Kabaka nʼakola ngʼekiteeso kya Memukani bwe kyali.

²²Nʼaweereza obubaka eri ebitundu byonna ebyʼobwakabaka buli ssaza ebbaluwa yaayo, era buli bantu mu lulimi lwabwe nga bugamba nti buli musajja afugenga mu nnyumba ye.