Eseza 4:1-17 LGCB2014 - Bible AI

¹Awo Moluddekaayi bwe yategeera byonna ebyakolebwa, nʼayuza ebyambalo bye nʼayambala ebibukutu ne yeesiiga evvu, nʼafuluma nʼagenda mu kibuga wakati, nʼakaaba nʼeddoboozi ddene olwʼennaku ennyingi:

²naye nʼakoma ku wankaaki wa kabaka, kubanga tewali eyakirizibwanga okuyingira mu mulyango gwa Kabaka ngʼayambadde ebibukutu.

³Mu buli kitundu ekiragiro kya Kabaka nʼetteeka lye gye byatuukanga ne waba okukuba ebiwoobe bingi nʼokusiiba nʼokukaaba amaziga mangi mu Bayudaaya era bangi ku bo ne bambala ebibukutu.[5]

⁴Awo abaweereza ba Eseza abakazi nʼabalaawe be ne bajja gyali okumutegeeza ku bibadde wo, era Nnabagereka nʼanakuwala nnyo: nʼaweereza Moluddekaayi ebyambalo yeyambulemu ebibukutu bye yali ayambadde naye Moluddekaayi nʼatabikkiriza.

⁵Eseza nʼatumya Kasaki omu ku balaawe ba Kabaka, gwe yali ataddewo okumuweereza nʼamukuutira okugenda okumanya ekizibu ekyali kituuse ku Moluddekaayi era nʼensonga.

⁶Awo Kasaki nʼafuluma nʼagenda ebweru mu kifo ekigazi ekyʼekibuga ekyayolekera omulyango gwa Kabaka, Moluddekaayi gye yali.

⁷Moluddekaayi nʼamutegeeza byonna ebyamutuukako, nʼomuwendo gwʼensimbi Kamani gwe yali asuubizza okuteeka mu ggwanika lya Kabaka olwʼokuzikiriza Abayudaaya.

⁸Era nʼamuwa nʼebyaggyibwa mu kiwandiiko ekyʼetteeka eryalaalikibwa mu Susani, okuliraga Eseza nʼokulimunnyonnyola ate era nʼokukuutira Eseza okugenda amwegayiririre ye nʼabantu be eri Kabaka.

⁹Amangwago Kasaki nʼagenda nʼabuulira Eseza ebigambo Moluddekaayi bye yali amutegeezezza.

¹⁰Awo Eseza nʼalagira Kasaki okuzzaayo obubaka ewa Moluddekaayi nti,

¹¹“Abakungu ba kabaka bonna nʼabantu bonna abʼomu bitundu byonna ebyʼobwakabaka bakimanyi nti Tewali musajja oba mukyala eyeeyanjula mu maaso ga Kabaka mu luggya olwʼomunda ngʼatayitiddwa kabaka. Era waliwo nʼetteeka nti akolanga bwʼatyo attibwenga, wabula nga Kabaka amugololedde omuggo gwe ogwa zaabu, nʼaba omulamu. Naye wayiseewo ennaku amakumi asatu kasookedde mpitibwa kugenda wa kabaka.”

¹²Ebigambo ebyo bwe byatuuka ku Moluddekaayi,

¹³Moluddekaayi nʼamuddamu nti, “Tolowooza nti olwʼokuba oli mu lubiri lwa Kabaka, gwe onowonawo wekka mu Bayudaaya bonna.

¹⁴Kubanga ggwe bwʼonoosirika mu kiseera kino, okubeerwa nʼokulokolebwa kwa Bayudaaya kuliva awalala, naye ggwe nʼennyumba ya Kitaawo mulizikizibwa. Ate ani amanyi obanga wafuulibwa Nnabagereka lwa kiseera kino?”

¹⁵Awo Eseza nʼaweereza obubaka eri Moluddekaayi nti,

¹⁶“Genda okuŋŋaanye Abayudaaya bonna abali mu Susani, musiibe ku lwange, so temulya wadde okunywa ekintu emisana nʼekiro okumala ennaku ssatu. Nze nʼabaweereza bange abakyala tunaasiibira wamu nammwe. Ekyo nga kiwedde, ndigenda eri Kabaka, newaakubadde nga tekikkirizibwa mu mateeka. Bwe ndiba owʼokuzikirira, nzikirira.”

¹⁷Amangwago Moluddekaayi nʼagenda, era nʼakola byonna Eseza bye yamulagira.