Eseza 6:1-14 LGCB2014 - Bible AI

¹Ekiro ekyo Kabaka teyayinza kwebaka; era nʼalagira ekitabo ekyʼebijjukizo ekyʼebigambo ebya buli lunaku, bisomebwe mu maaso ge.

²ⓓ Awo ne kisangibwa mu byafaayo nti Moluddekaayi yamanya olukwe lwa Bigusani ne Teresi babiri ku balaawe ba Kabaka abaali bakuuma omulyango nga baali bagezaako okutta Kabaka Akaswero, era nga Moluddekaayi ye yabaloopayo.

³Kabaka nʼabuuza nti, “Kitiibwa ki na bukulu ki Moluddekaayi bye yaweebwa olwʼekyo?” Awo abaweereza ba Kabaka ne baddamu nti, “Tewali kintu kye yali aweereddwa.”

⁴Awo Kabaka nʼabuuza nti, “Ani ali mu luggya?” Mu kiseera ekyo Kamani yali yakayingira mu luggya olwʼebweru olwʼoku lubiri lwa Kabaka, nga azze okwogera ne Kabaka ku kigambo ekyʼokuwanika Moluddekaayi ku kalabba Kamani ke yali amuzimbidde.

⁵Amangwago abaweereza ne baddamu nti, “Kamani wuuno waali ayimiridde mu luggya.” Kabaka nʼayogera nti, “Mumukkirize ayingire.”

⁶Awo Kamani nʼayingira, Kabaka nʼamubuuza nti, “Anaakolebwa ki omusajja Kabaka gwʼasanyukira era gwʼayagala okuwa ekitiibwa?” Kamani nʼalowooza mu mutima gwe nti, “Ani Kabaka gwe yandisanyukidde okumuwa ekitiibwa okusinga nze?”

⁷Kamani nʼaddamu Kabaka nti, “Omusajja Kabaka gwʼasanyukira okumuwa ekitiibwa,

⁸bamuleetere ebyambalo Kabaka bye yali ayambaddemu, nʼembalaasi Kabaka gye yali yeebagadde atikkirweko engule eyʼobwakabaka ku mutwe.

⁹Ebyambalo ne mbalaasi bikwasibwe omu ku bakungu kabaka basinga okuwa ekitiibwa, nʼoluvannyuma omusajja oyo kabaka gwʼayagala okuwa ekitiibwa ayambazibwe ebyambalo ebyo era yeebagale nʼembalaasi, era omulangira Kabaka gwʼanaalonda amukulembere mu nguudo zʼekibuga ngʼalangirira waggulu nti, ‘Bwʼatyo bwʼanaakolebwa omusajja Kabaka gwʼasiima okuwa ekitiibwa!’ ”

¹⁰Awo Kabaka nʼalagira Kamani nti, “Yanguwa ofune ebyambalo nʼembalaasi nga bwʼoyogedde, okolere ddala bwʼotyo Moluddekaayi Omuyudaaya atuula ku wankaaki wa Kabaka, ate waleme okubulako nʼekimu ku ebyo byonna byʼoyogedde.”

¹¹Awo Kamani nʼaddira ebyambalo, nʼayambaza Moluddekaayi, nʼamwebagaza ku mbalaasi, era nʼamukulembera mu nguudo zʼekibuga ngʼalangirira mu maaso ge nti, “Bwʼatyo bwʼakoleddwa omusajja Kabaka gwʼasiima okuwa ekitiibwa.”

¹²Oluvannyuma Moluddekaayi nʼakomawo ku wankaaki wa Kabaka, naye Kamani nʼayanguwa nʼaddayo ewuwe, ngʼanakuwadde era ngʼabisse ku mutwe gwe,

¹³nʼategeeza Zeresi mukazi we ne mikwano gye bonna byonna ebimutuuseeko.

¹³Awo abamuwa amagezi ne mukazi we Zeresi ne bamugamba nti, “Engeri Moluddekaayi gwʼotanulidde okugwa mu maaso ge, nga bwʼava mu ggwanga lya Bayudaaya, tojja kumusinga, era tolirema kuzikirira mu maaso ge.”

¹⁴Awo bwe baali nga bakyayogera naye, abalaawe ba Kabaka ne batuuka, ne banguwa okutwala Kamani ku mbaga Eseza gye yali afumbye.