Eseza 9:1-32 LGCB2014 - Bible AI

¹Ku lunaku olwʼekkumi nʼebiri gwe mwezi Adali, ekiragiro kya Kabaka lwe kyali kigenda okutuukirizibwa. Ku lunaku olwo abalabe bʼAbayudaaya kwe baasuubirira okubafuga, naye ate Abayudaaya ne bafuga abo abaabakyawa.

²Abayudaaya ne bakuŋŋaana mu bibuga byabwe okubuna ebitundu byonna ebya Kabaka Akaswero, okukwata abo abaali baagala okubaleetako obulabe, so tewaali muntu eyayaŋŋanga okubayinza, kubanga entiisa yali egudde ku bantu bonna abamawanga gonna.

³Awo abakungu bonna abʼebitundu, nʼabaamasaza, ne bagavana nʼabasigire ba kabaka abaafuganga ne bayamba Abayudaaya, kubanga entiisa yali ebakutte olwa Moluddekaayi.

⁴Moluddekaayi yali akulaakulanye mu lubiri, era nʼettutumu lye ne lyatiikirira okubuna ebitundu byonna, ate era ne yeeyongera amaanyi nʼobuyinza.

⁵Awo Abayudaaya ne batta era ne bazikiriza abalabe baabwe bonna nʼekitala, era ne bakola nga bwe baayagala abo abaabakyawa.

⁶Mu lubiri olwʼe Susani, Abayudaaya batta ne bazikiriza abasajja ebikumi bitaano.

⁷Ate era batta Palusandasa, ne Dalufoni, ne Asupasa,

⁸Polasa, ne Adaliya, ne Alidasa,

⁹Palumasuta, ne Alisayi, ne Alidayi, ne Vaizasa

¹⁰abatabani ekkumi aba Kamani mutabani wa Kammedasa omulabe wʼAbayudaaya. Naye tebaakwata ku munyago.

¹¹Ku lunaku olwo, Kabaka nʼategeezebwa omuwendo gwʼabo abattibwa mu lubiri e Susani.

¹²Awo Kabaka nʼagamba Nnabagereka Eseza nti, “Abayudaaya basse era bazikirizza abasajja ebikumi bitaano, ate era ne batabani ba Kamani ekkumi nabo battiddwa. Kale kyenkana wa kye bakoze mu bitundu bya Kabaka ebirala? Kiki kyʼosaba kaakano? Onookiweebwa. Era kiki kye weegayirira? Kale nʼakyo kinaakolebwa.”

¹³Eseza nʼaddamu nti, “Kabaka bwʼanaasiima, enkya Abayudaaya baweebwe olukusa okukola nga ekiragiro ekya leero bwe kibadde era emirambo gya batabani ba Kamani ekkumi giwanikibwe ku miti.”

¹⁴Amangwago Kabaka nʼalagira kikolebwe. Ekiragiro ne kirangirirwa mu Susani, era emirambo gya batabani ba Kamani ekkumi ne giwanikibwa.

¹⁵Awo ku lunaku olwʼekkumi nʼenya mu mwezi ogwa Adali, Abayudaaya mu Susani ne beekuŋŋaanya, era ne batta abasajja ebikumi bisatu mu Susani, naye ne batakwata ku munyago.

¹⁶Mu kiseera kyekimu Abayudaaya abalala abaali mu bitundu bya Kabaka nabo ne bakuŋŋaana okwerwanirira, nʼokufuna ne bafuna okuwummula eri abalabe baabwe. Ne batta emitwalo nsanvu mu etaano ku bo naye ne batakwata ku munyago.

¹⁷Bino byabaawo ku lunaku olwʼekkumi nʼessatu mu mwezi ogwa Adali, ku lunaku olwʼekkumi nʼennya ne bawummula era ne balufuula lunaku lwa kuliirangako mbaga nʼolwʼokusanyukirangako.

¹⁸Abayudaaya abʼomu Susani ne bakuŋŋaananga ku lunaku olwʼekkumi nʼessatu ne ku lunaku olwʼekkumi nʼennya, ate ku lunaku olwʼekkumi nʼettaano ne bawummula, era ne balufuula olunaku olwʼokuliirangako embaga nʼokusanyukirangako.

¹⁹Abayudaaya abʼomu byalo abaabeeranga mu bibuga ebitaaliiko bbugwe kyebaava bafuula olunaku olwʼekkumi nʼennya olwʼomwezi Adali okuba olunaku okuliirangako embaga nʼolwʼokusanyukirangako, era olunaku olwʼokuweerazaganirako ebirabo.

²⁰Awo Moluddekaayi nʼawandiika ebyabaawo byonna, era nʼaweereza Abayudaaya bonna abaali mu bitundu byonna ebya Kabaka Akaswero ebbaluwa, mu matwale agʼokumpi nʼagewala,

²¹ngʼabalagira okukuumanga olunaku olwʼekkumi nʼennya nʼolwʼekkumi nʼettaano mu mwezi ogwa Adali nga lwa mbaga,

²²era nga kye kiseera Abayudaaya kye baafunirako eddembe eri abalabe baabwe, ate era nga gwe mwezi obuyinike bwabwe lwe bwafuulibwa essanyu, nʼokunakuwala kwabwe ne kukoma. Moluddekaayi nʼabiwandiika okujjukira ennaku ezo ngʼennaku ezʼokuliirangako embaga nʼokusanyukirangako, ate era nʼokuweerezaganya ebyokulya ebirungi, era nʼokugabiranga abaavu ebirabo.

²³Awo Abayudaaya ne basuubiza okukola nga bwe baatandika, nga Moluddekaayi bwe yabawandiikira.

²⁴ⓔ Kamani mutabani wa Kammedasa Omwagaagi omulabe wʼAbayudaaya bonna, yali asalidde Abayudaaya olukwe okubazikiriza, era ngʼakubye akalulu Puli, okubasaanyaawo nʼokubazikiriza.

²⁵Naye Eseza bwe yakimanyisa Kabaka, Kabaka nʼawa ekiragiro mu buwandiike nti olukwe olubi Kamani lwe yali asalidde Abayudaaya ludde ku mutwe gwe, era ye ne batabani be ne bawanikibwa ku kalabba.

²⁶Ennaku ezo kyebaava baziyita Pulimu ngʼerinnya lya Puli bwe liri. Awo olwʼebigambo byonna ebyawandiikibwa mu bbaluwa, nʼolwʼebyo bye baalaba, nʼebyabatuukako,

²⁷Abayudaaya kyebaava balagira ne basuubiza, era ne basuubiriza ezzadde lyabwe nʼabo bonna abanaabeegattangako, nti awatali kwekwasa nsonga yonna, bateekwa okukwatanga ennaku ezo zombi buli mwaka ngʼekiwandiiko kyazo bwe kyali era ngʼebiro byazo bwe byali.

²⁸Ennaku ezo zijjukirwenga ku mirembe gyonna, na buli kika, na buli ssaza era na buli kibuga, era ennaku zino eza Pulimu, Abayudaaya tebalekangayo okuzijagulizaangako, wadde okuzeerabira.

²⁹Awo Nnabagereka Eseza muwala wa Abikayiri ne Moluddekaayi Omuyudaaya ne bawandiika nʼobuyinza bwonna okunyweza ebbaluwa eyo eyookubiri eya Pulimu.

³⁰Ebbaluwa ne ziweerezebwa, mu bitundu ekikumi mu abiri mu omusanvu (127) ebyʼobwakabaka bwa Akaswero,

³¹nʼokuwa ebiragiro nti Ennaku ezo eza Pulimu zikuumibwenga mu biro byazo nga Omuyudaaya Moluddekaayi ne Nnabagereka Eseza bwe baabalagira, era nga bwe beeyama bo bennyini nʼezzadde lyabwe okusinziira ku biseera byabwe bye baayitamu ebyʼokusiiba nʼokukungubaga.

³²Awo ekiragiro kya Eseza ne kinyweza ebigambo ebyo ebya Pulimu, era ne kiwandiikibwa mu byafaayo.