Ezeekyeri 12:1-28 LGCB2014 - Bible AI

¹Ekigambo kya Mukama ne kinzijira ngʼagamba nti,

²“Omwana wʼomuntu obeera mu bantu abajeemu. Balina amaaso okulaba, naye tebalaba, balina nʼamatu okuwulira naye tebawulira, kubanga bantu bajeemu.

³“Noolwekyo omwana wʼomuntu, sibako ebibyo ogende mu buwaŋŋanguse, ate kikole misana, nga balaba ogende mu kifo ekirala. Oboolyawo balitegeera, newaakubadde nga nnyumba njeemu.

⁴Fulumya ebibyo byʼotwala mu buwaŋŋanguse emisana, nga balaba. Ate akawungeezi, ofulume nga balaba, ogende ngʼabo abagenda mu buwaŋŋanguse.

⁵Botola ekituli mu bbugwe oyiseemu ebibyo, nga balaba.

⁶Biteeke ku kibegabega kyo nga balaba, obifulumye obudde nga buwungeera. Bikka ku maaso oleme okulaba ensi, kubanga nkufudde akabonero eri ennyumba ya Isirayiri.”

⁷Ne nkola nga bwe ndagiddwa. Emisana, ne nfulumya ebintu byange nga neetegese okugenda mu buwaŋŋanguse. Akawungeezi ne nkuba ekituli mu bbugwe nʼengalo zange, ne nfulumya ebyange nga mbitadde ku kibegabega kyange nga balaba, obudde nga buwungedde, enjuba ngʼebuliddeyo.

⁸Ku makya, ekigambo kya Mukama ne kinzijira ngʼagamba nti,

⁹“Omwana wʼomuntu, ennyumba ya Isirayiri enjeemu teyakubuuza nti, ‘Okola ki ekyo?’

¹⁰“Bagambe nti, ‘Bwʼati bwʼayogera Mukama Katonda nti, obubaka buno bukwata ku mufuzi ali mu Yerusaalemi, nʼabantu ba Isirayiri bonna abaliyo.’

¹¹Bagambe nti, ‘Ndi kabonero gye muli.’

¹¹“Nga bwe nkoze, nabo bwe balikibakola. Baliwaŋŋangusibwa ne batwalibwa nga bawambe.

¹²“Omufuzi ali mu bo aliteeka ebintu bye ku kibegabega kye agende ngʼobudde buwungedde, enjuba ngʼebuliddeyo, balibotola ekituli mu bbugwe ayitemu agende. Alibikka amaaso ge, aleme kulaba nsi.

¹³Ndimwanjuliriza ekitimba kyange, akwatibwe mu mutego gwange. Ndimutwala e Babulooni, mu nsi eyʼAbakaludaaya, naye taligiraba, era eyo gyʼalifiira.

¹⁴Ndisaasaanyiza eri empewo zonna, bonna abamwetoolodde, abakozi be nʼeggye lye lyonna era ndibawondera nʼekitala ekisowoddwa.

¹⁵“Balimanya nga nze Mukama bwe ndibasaasaanya mu mawanga, ne mbabunya mu nsi.

¹⁶Kyokka ndirekawo batono ku bo abaliwona ekitala, nʼabaliwona enjala nʼabaliwona kawumpuli, balyoke bejjuse olwʼebikolwa byabwe ebyʼemizizo, nga bali eyo mu mawanga. Olwo balitegeera nga nze Mukama.”

¹⁷Ekigambo kya Mukama ne kinzijira ngʼagamba nti,

¹⁸“Omwana wʼomuntu, lya emmere yo ngʼokankana, era nnywa amazzi go ngʼojugumira.”

¹⁹Tegeeza abantu abʼomu nsi nti, “Bwʼati bwʼayogera Mukama Katonda ku abo ababeera mu Yerusaalemi ne mu nsi ya Isirayiri nti, Balirya emmere yaabwe nga beeraliikirira, banywe nʼamazzi gaabwe nga batya, kubanga ensi yaabwe erinyagibwa mu buli kintu ekirimu, olwʼobukambwe bwʼabo bonna ababeera eyo.

²⁰Ebibuga ebituulwamu birizikirizibwa, nʼensi nʼefuuka amatongo, mulyoke mumanye nga nze Mukama.”

²¹Ekigambo kya Mukama ne kinzijira ngʼagamba nti,

²²“Omwana wʼomuntu, makulu ki agali mu lugero olukwata ku nsi ya Isirayiri, olugamba nti, ‘Ennaku ziggwaayo naye teri kwolesebwa kutuukirira?’

²³Bagambe nti, ‘Bwʼati bwʼayogera Mukama Katonda nti, ŋŋenda kukomya olugero luno, era tebaliddayo nate kulwogera, mu Isirayiri.’ Bagambe nti, ‘Ebiro binaatera okutuuka, okwolesebwa kwonna lwe kulituukirira.

²⁴Tewaliba nate kwolesebwa kwa bulimba newaakubadde obunnabbi obusavuwaze mu bantu ba Isirayiri.

²⁵Naye nze Mukama ndyogera kye ndisiima, era kirituukirira amangu ddala. Mu nnaku zo ggwe ennyumba enjeemu, ndyogera ekigambo era ndikituukiriza, bwʼayogera Mukama Katonda.’ ”

²⁶Ekigambo kya Mukama ne kinzijira ngʼagamba nti,

²⁷Omwana wʼomuntu, laba, ennyumba ya Isirayiri egamba nti, “Okwolesebwa kwalaba kwʼamyaka mingi okuva ne kaakano, era ayogera obunnabbi obulibaawo mu bbanga eryʼewala.”

²⁸“Noolwekyo bagambe nti, ‘Bwʼati bwʼayogera Mukama Katonda nti, tewalibaawo nate kigambo kyange na kimu ekirirwisibwa, buli kye njogera kirituukirira, bwʼayogera Mukama Katonda.’ ”