1Ekigambo kya Mukama Katonda ne kinzijira, nʼaŋŋamba nti,
2“Omwana wʼomuntu, omuti gwʼomuzabbibu gusinga gutya ettabi eryʼomuti ku miti egyʼomu kibira?
3Guvaamu omuti ogukolebwamu ekintu kyonna ekyʼomugaso? Kiyinzika ogukolamu eŋŋango eyʼokuwanikako ekintu kyonna?
4Bwe gusuulibwa mu muliro okuba enku, omuliro ne gugwokya eruuyi nʼeruuyi, ne wakati ne wasiriira guba gukyaliko kye gugasa?
5Bwe guba nga tegwali gwa mugaso nga mulamba, olwo guyinza okubaako kye gugasa nga gwokebbwa mu muliro ne gusiriira?”
6Mukama Katonda kyava ayogera nti, “Nga bwe njogedde ku muzabbibu mu miti egyʼomu kibira, gwe ntadde mu muliro okuba enku, bwe ntyo bwe ndyokya abatuuze ba Yerusaalemi.
7Ndikyusa amaaso gange ne mbatunuulira, era ne bwe balidduka, omuliro gulibookya, era mulimanya nga nze Mukama Katonda.
8Ndizisa ensi, kubanga tebabadde beesigwa, bwʼayogera Mukama Katonda.”