Ezeekyeri 18:1-32 LGCB2014 - Bible AI

¹Ekigambo kya Mukama Katonda ne kinzijira, nʼaŋŋamba nti,

²“Mutegeeza ki bwe mugerera olugero luno ensi ya Isirayiri nti,

²‘Bakitaabwe balidde ezabbibu ezikaawa, nʼamannyo gʼabaana ganyenyeera?’ ”

³“Nga bwe ndi omulamu, bwʼayogera Mukama Katonda, temuliddayo kugera lugero olwo mu Isirayiri.

⁴Buli kiramu, kyange; obulamu bwʼomuzadde nʼobwʼomwana bwonna nabwo bwange.

⁵Emmeeme eyonoona ye erifa, omuntu bwʼabeera omutuukirivu nʼakola ebyalagirwa era ebituufu;

⁶nga talya mu masabo agali ku nsozi newaakubadde okusinza bakatonda abalala abʼennyumba ya Isirayiri; nʼatayenda ne mukazi wa muliraanwa we, newaakubadde okwebaka nʼomukazi ali mu biseera bye ebyʼabakyala;

⁷omuntu atalyazaamaanya muntu yenna, naye asasula ebbanja lye lyonna, atanyaga muntu yenna, naye emmere ye agigabira abayala, nʼayambaza nʼabali obwereere;

⁸atawola lwa magoba newaakubadde okutwala ensimbi ezisukkamu mu ezo ze yawola. Yeewala okukola ekibi, era asala emisango egyʼensonga.

⁹Agoberera ebiragiro byange, nʼakuuma amateeka gange nʼobwesigwa, oyo ye muntu omutuukirivu era aliba mulamu,”

⁹bwʼayogera Mukama Katonda.

¹⁰“Bwʼaba nʼomwana omulalu, ayiwa omusaayi, oba akola ebifaanana ngʼebyo,

¹¹newaakubadde nga kitaawe ebyo tabikola:

¹¹Nʼalya mu masabo agali ku nsozi, nʼayenda ku mukazi wa muliraanwa we,

¹²nʼanyigiriza omwavu nʼomunaku, nʼokubba nʼabba, nʼatasasula kye yeeyama, nʼasinza bakatonda abalala, nʼakola ebyʼekivve,

¹³nʼawola ngʼasuubira amagoba, oba nʼokutwala ensimbi ezisukka mu ezo ze yawola;

¹³omuntu ngʼoyo aliba mulamu? Taliba mulamu. Kubanga akoze ebintu ebyo byonna ebyʼekivve, kyaliva attibwa, nʼomusaayi gwe guliba ku mutwe gwe ye.”

¹⁴Naye bwʼaba nʼomuzzukulu, alaba ebibi byonna kitaawe byʼakola, nʼatakola bya ngeri eyo;

¹⁵“nʼatalya mu masabo agali ku nsozi newaakubadde okusinza bakatonda abalala abʼennyumba ya Isirayiri, nʼatayenda na mukazi wa muliraanwa we,

¹⁶atanyigiriza muntu yenna newaakubadde okusaba amagoba ku bbanja lye yawola, atabba, naye agabira emmere abayala nʼabali obwereere nʼabambaza.

¹⁷Yeekuuma obutakola kibi, nʼatalya magoba ku bbanja newaakubadde okutwala ensimbi ezisukiridde, era akuuma amateeka gange nʼagoberera nʼebiragiro byange.

¹⁷Talifa olwʼebibi bya kitaawe, naye aliba mulamu.

¹⁸Naye kitaawe alifa olwʼebibi bye ye kubanga yalyazaamanya, nʼanyaga muliraanwa we, nʼakola ebitaali birungi mu bantu banne.”

¹⁹“Mubuuza nti, ‘Lwaki omwana tabonaabona olwʼebibi bya kitaawe? Omwana bwʼaba akoze ebyʼensonga era ebituufu, ngʼagoberedde ebiragiro byange, aliba mulamu.

²⁰Emmeeme eyonoona ye erifa. Omwana talibonaabona olwʼebibi bya kitaawe, so ne kitaawe talibonaabona olwʼebibi ebyʼomwana we. Obutuukirivu bwʼomuntu omutuukirivu bulibalirwa ye, nʼobutali butuukirivu bwʼoyo atali mutuukirivu bulibalirwa ye.’

²¹“Naye omuntu atali mutuukirivu bwʼalikyuka nʼalekeraawo okukola ebibi byonna, nʼakuuma ebiragiro byange byonna nʼakola ebyʼensonga era ebituufu, aliba mulamu, talifa.

²²Tewaliba kyonoono na kimu ku ebyo bye baakola ebirijjukirwa, naye olwʼebyʼobutuukirivu bye baliba bakoze, baliba balamu.

²³Mulowooza nga nsanyukira okufa kwʼatali mutuukirivu? Bwʼayogera Mukama. Sisinga kusanyuka nnyo bwe ndaba ngʼakyuse okuva mu ngeri ze nʼaba omulamu?”

²⁴“Naye omuntu omutuukirivu bwʼalekeraawo okukola ebyʼobutuukirivu, nʼakola ebyʼekivve bye bimu nʼebyʼomuntu atali mutuukirivu, aliba mulamu? Tewaliba ne kimu ku ebyo ebyʼobutuukirivu bye yakola, ebirijjukirwa: Olwʼobutaba mwesigwa aliba nʼomusango, era nʼolwʼebibi bye yakola, alifa.”

²⁵“Mugamba nti, ‘Mukama si mwenkanya.’ Kaakano muwulire mwe ennyumba ya Isirayiri, enkola yange yʼetali ya bwenkanya oba mmwe mutali benkanya?

²⁶Omuntu omutuukirivu bwʼaleka okukola ebikolwa bye ebyʼobutuukirivu nʼakola ebibi, mwʼalifiira, kubanga ebibi byʼakoze bye birimuleetera okufa.

²⁷Naye bwʼalikyuka okuva mu butali butuukirivu bwe bwʼakoze, nʼakola ebyʼensonga era ebituufu, alirokola obulamu bwe.

²⁸Era bwʼalirowooza ku bibi byonna byʼakoze, nʼakyuka nʼalekeraawo okubikola, mazima ddala aliba mulamu, talifa.

²⁹Naye oluvannyuma ennyumba ya Isirayiri ne mwogera nti, ‘Ekkubo lya Mukama si lya bwenkanya.’ Mmwe ennyumba ya Isirayiri, engeri zange ze zitali za bwenkanya? Engeri zammwe si ze zitali za bwenkanya?

³⁰“Kyendiva mbasalira omusango, mmwe ennyumba ya Isirayiri, buli muntu ngʼebikolwa byammwe bwe biri, bwʼayogera Mukama. Mwenenye, muleke ebikolwa ebitali bya butuukirivu, oba nga ssi weewaawo ebibi byammwe biribaleetera okuzikirira.

³¹Mweggyeeko ebikolwa byonna ebitali bya butuukirivu, bye mukoze, mufune omutima omuggya nʼomwoyo omuggya. Kiki ekibaleetera okufa, mmwe ennyumba ya Isirayiri?

³²Sisanyukira kufa kwa muntu yenna, bwʼayogera Mukama Katonda. Mwenenye mube balamu.”