Ezeekyeri 21:1-32 LGCB2014 - Bible AI

¹Awo ekigambo kya Mukama Katonda ne kinzijira, nʼaŋŋamba nti,

²“Omwana wʼomuntu tunuulira Yerusaalemi oyogere ku bifo ebitukuvu. Wa ekigambo kyʼobunnabbi eri ensi ya Isirayiri,

³oyogere nti, ‘Bwʼati bwʼayogera Mukama Katonda nti, nnina oluyombo naawe, era ndisowola ekitala kyange okuva mu kiraato kyakyo ne nzikiriza abatuukirivu nʼabatali batuukirivu abali mu ggwe.

⁴Kubanga ndiba nzikiriza abatuukirivu nʼabatali batuukirivu, kyendiva nnema okuzza ekitala kyange mu kiraato kyakyo, ne ntabaala buli muntu nakyo okuva Obukiikaddyo okutuuka Obukiikakkono.

⁵Awo abantu bonna balimanya nga nze Mukama nsowodde ekitala kyange okuva mu kiraato kyakyo, era tekiriddayo mu kiraato kyakyo nate.’ ”

⁶“Omwana wʼomuntu, kyonoova okaabira mu maaso gaabwe ngʼomutima gwo gujjudde ennaku nʼobuyinike.

⁷Bwe balikubuuza nti, ‘Okaabira ki?’ Oliddamu nti, ‘Olwʼamawulire ge nfunye, kubanga ebyo bwe birijja, buli mutima gulisaanuuka, na buli mukono ne gulemala, nʼemyoyo ne gizirika, nʼamaviivi gonna ne ganafuwa ne gafuuka ngʼamazzi.’ Bijja era birituukirira, bwʼayogera Mukama Katonda.”

⁸Ekigambo kya Mukama ne kinzijira, nʼaŋŋamba nti,

⁹“Omwana wʼomuntu, wa obunnabbi oyogere nti, ‘Bwʼati bwʼayogera Mukama nti,

⁹Ekitala, ekitala, kiwagaddwa era kiziguddwa,

¹⁰Kiwagaddwa okutta, kiziguddwa, era kimasamasa ngʼokumyansa kwʼeggulu! Tulisanyukira obuyinza bwʼomwana wange Yuda?’ ”

¹⁰Ekitala kinyooma buli muggo.

¹¹“ ‘Ekitala kiweereddwayo okuzigulwa kiryoke kinywezebwe mu mukono; kiwagaddwa era kiziguddwa, kiryoke kiweebwe omussi.

¹²Kaaba era wowoggana, omwana wʼomuntu, kubanga ekyo nkikola bantu bange, era nkikola abalangira bonna aba Isirayiri. Mbawaddeyo eri ekitala wamu nʼabantu bange, noolwekyo weekube mu kifuba.’ ”

¹³“ ‘Okugezesebwa kuteekwa okujja. Kiba kitya ngʼomuggo gwʼobufuzi bwa Yuda ekitala gwe kinyooma, tegulabika nate? bwʼayogera Mukama Katonda.’

¹⁴Kyonoova owa obunnabbi, omwana wʼomuntu, nʼokuba ne mu ngalo. Leka ekitala kisale emirundi ebiri oba emirundi esatu. Kitala kya kutta, okutta okunene, nga kibataayiza enjuuyi zonna,

¹⁵era nʼemitima gyabwe girisaanuuka, nʼabattiddwa baliba bangi. Ntadde ekitala ekitta ku miryango gyabwe gyonna. Kiwagaddwa era kimyansa ngʼokumyansa kwʼeggulu era kinywezebbwa olwʼokutta.

¹⁶Ggwe ekitala genda osale ku mukono ogwa ddyo ne ku gwa kkono, ne yonna obwogi bwo gye bunaakyukira.

¹⁷Nange ndikuba mu ngalo, nʼekiruyi kyange kirikkakkana. Nze Mukama njogedde.”

¹⁸Ekigambo kya Mukama ne kinzijira nate, nʼaŋŋamba nti,

¹⁹“Omwana wʼomuntu, teekawo amakubo abiri ekitala kya kabaka wʼe Babulooni we kinaayita, gombi nga gava mu nsi emu. Oteeke ekipande, awo ekkubo we lyawukanira okudda mu kibuga.

²⁰Okole ekkubo erimu ekitala mwe kinaayita okulumba Labba ekyʼabaana ba Amoni, nʼeddala okulumba Yuda ne Yerusaalemi ekibuga ekiriko enkomera.

²¹Kabaka wʼe Babulooni aliyimirira mu kifo mu masaŋŋanzira, amakubo we gaawukanira, okutegeezebwa ebigambo bya Mukama; alisuula obusaale okukuba akalulu, ne yeebuuza ku bakatonda be, era alikebera nʼekibumba.

²²Mu mukono gwe ogwa ddyo mwe mulibeera akalulu ka Yerusaalemi, gyʼaliteeka ebitomera wankaaki, era gyʼaliyimusiza eddoboozi eririragira okutta kutandike, era gyʼaliyimusiza eddoboozi eririrangirira olutalo, era gyʼaliteeka ebitomera emiryango, nʼokuzimba ebitindiro nʼebigo ebikozesebwa okutaayiza.

²³Kulirabika ngʼobunnabbi obwʼobulimba eri abo aba mulayirira, naye alibajjukiza omusango gwabwe nʼabatwala nga bawambe.”

²⁴“Mukama Katonda kyava ayogera nti, ‘Olwʼokunzijjukiza omusango gwammwe, olwʼobujeemu bwammwe obwʼolwatu, ekiggyayo ebibi byammwe mu byonna bye mwakola, era olwʼokukola ebyo, kyemuliva mutwalibwa mu buwambe.’ ”

²⁵“Ggwe omulangira wa Isirayiri omwonoonefu, omukozi wʼebibi, olunaku gwe lutuukidde, ekiseera ekyʼokubonerezebwa kwo, bwe kituukidde ku ntikko esemberayo ddala,

²⁶bwʼati bwʼayogera Mukama Katonda nti, Ggyako ekitambala ku mutwe, oggyeko nʼengule, kubanga ebintu tebikyali nga bwe byali. Abakkakkamu baligulumizibwa, nʼabeegulumiza balikkakkanyizibwa.

²⁷Matongo, matongo, ndikifuula matongo, era tekirizzibwa buggya okutuusa nnyinikyo lwʼalijja, era oyo gwe ndikiwa.”

²⁸“Kaakano ggwe omwana wʼomuntu, wa obunnabbi, oyogere nti, ‘Bwʼati bwʼayogera Mukama Katonda ku baana ba Amoni nʼobujoozi bwabwe: Ekitala, ekitala, kisowoddwa okutta, Kiziguddwa okusaanyaawo era kimyansa ngʼokumyansa kwʼeggulu.

²⁹Newaakubadde nga baakubuulira ebirooto ebyʼobulimba, ne bakuwa obunnabbi obwʼobulimba, ekitala kiriteekebwa ku bulago bwʼabakozi bʼebibi abookuttibwa, olunaku be lutuukidde nʼekiseera ekyʼokubonerezebwa kwabwe be kituukidde ku ntikko esemberayo ddala.

³⁰Ekitala kizze mu kiraato kyakyo. Mu kifo mwe watondebwa, mu nsi eyʼobujjajja, eyo gye ndikusalirira omusango.

³¹Ndikufukako ekiruyi kyange, ne nkufuuwako omuliro ogwʼobusungu bwange, ne nkuwaayo mu mikono gyʼabasajja abakambwe abali ngʼensolo, abaatendekebwa mu byo kuzikiriza.

³²Oliba nku za muliro, nʼomusaayi gwo guliyiyibwa mu nsi yo, era tolijjukirwa nate, kubanga nze Mukama njogedde.’ ”