Ezeekyeri 24:1-27 LGCB2014 - Bible AI

¹Awo olwatuuka mu mwaka ogwʼomwenda, mu mwezi ogwʼekkumi ku lunaku olwʼekkumi, ekigambo kya Mukama Katonda ne kinzijira nʼaŋŋamba nti,

²“Omwana wʼomuntu wandiika ennaku zʼomwezi eza leero, kubanga kabaka wʼe Babulooni azingizza Yerusaalemi olwaleero.

³Gerera ennyumba eyo enjeemu olugero obagambe nti, ‘Bwʼati bwʼayogera Mukama Katonda nti,

³“Muteeke entamu ku kyoto, musseemu amazzi.

⁴Mugiteekemu ebifi ebyʼennyama, ebifi byonna ebirungi, ekisambi nʼomukono. Mugijjuze nʼamagumba agasinga obulungi,

⁵mulonde endiga esinga obulungi okuva mu kisibo, Oteeke ebisiki wansi wʼentamu, mweseze ebigirimu, era ofumbe nʼamagumba agalimu.”

⁶Kubanga bwʼati bwʼayogera Mukama Katonda nti, Zikusanze ggwe ekibuga ekiyiwa omusaayi, ggwe entamu eriko enziro, eteereddwamu ebintu ebitaaveemu. Gyamu ekifi kimu kimu awatali kukuba kalulu.’ ”

⁷“Omusaayi gwe yayiwa guli wakati mu ye, yaguyiwa ku lwazi olwereere; teyaguyiwa wansi enfuufu ereme okugubikka.

⁸Okusiikula ekiruyi kyange nsobole okuwalana eggwanga nʼateeka omusaayi gwe ku lwazi olwereere, guleme okubikkibwako.”

⁹Mukama Katonda kyava ayogera nti, “Zikusanze ggwe ekibuga ekiyiwa omusaayi! Nange ndituuma enku nnyingi ddala.

¹⁰Mutuume ebisiki, mukume omuliro, ennyama mugifumbe bulungi, mugiteekemu ebirungo, nʼamagumba gasiriire.

¹¹Oluvannyuma muddire entamu enkalu mugiteeke ku masiga, okutuusa lwʼeneeyokya ennyo nʼekikomo mwe yakolebwa ne kyengerera, ebitali birongoofu ebigirimu ne bisaanuuka, nʼebyateekebbwamu ne byokebwa.

¹²Okufuba kwonna kubadde kwa bwereere, kubanga ebyateekebbwamu ebingi tebiggiddwamu, nʼomuliro nagwo tegubyokeza.”

¹³“Kaakano mu kwonoona kwo wagwenyuka, kubanga nagezaako okukutukuza ggwe, naye ne kitasoboka kukutukuza, era tolitukuzibwa okutuusa ekiruyi kyange bwe kirikkakkana.”

¹⁴“Nze Mukama njogedde. Ekiseera kituuse okubaako ne kyenkola. Siritunula butunuzi so sirisaasira newaakubadde okwejjusa. Ndikusalira omusango nga nsinziira ku neeyisaayo ne ku bikolwa byo, bwʼayogera Mukama Katonda.”

¹⁵Ekigambo kya Mukama ne kinzijira nʼaŋŋamba nti,

¹⁶“Omwana wʼomuntu, luliba lumu oliba oli awo ne nkuggyako ekyo amaaso go kye gasinga okwegomba, naye tokungubaganga newaakubadde okukuba ebiwoobe newaakubadde okukaaba.

¹⁷Osindanga mu kasirise naye tokungubagiranga mufu. Ekiremba ku mutwe gwo okinywezanga, era osigalanga oyambadde engatto zo; tobikkanga wansi wʼamaaso go wadde okulya emmere eyʼomulumbe.”

¹⁸Awo ne njogera eri abantu ku makya, akawungeezi mukazi wange nʼafa. Enkeera ne nkola nga bwe nalagiddwa.

¹⁹Abantu ne bambuuza nti, “Bino bitegeeza ki?”

²⁰Awo ne mbaddamu nti, “Ekigambo kya Mukama kyanzijira nʼaŋŋamba nti,

²¹Tegeeza ennyumba ya Isirayiri nti, ‘Bwʼati bwʼayogera Mukama Katonda nti, nnaatera okwonoona awatukuvu wange, ekigo kye mwegulumiririzangamu, amaaso gammwe kye geegombanga, nʼemitima gyammwe kye gyayagalanga, ne batabani bammwe ne bawala bammwe abaasigala emabega, balifa nʼekitala.

²²Mulikola nga nze bwe nkoze, so temulibikka wansi wʼamaaso gammwe newaakubadde okulya emmere eyʼomulumbe.

²³Mulisigala nga mwesibye ebiremba ku mitwe gyammwe, era mulisigala nga mwambadde engatto zammwe. Temulikuba biwoobe newaakubadde okukaaba naye muliyongobera olwʼebibi byammwe, buli muntu nʼasindira munne ennaku.

²⁴Era Ezeekyeri aliba kabonero gye muli, era mulikola nga bwʼakoze. Ebyo bwe biribaawo, mulimanya nga nze Mukama Katonda.’ ”

²⁵“Ate ggwe, omwana wʼomuntu, olunaku lwe ndibaggyako ekigo kyabwe, nʼessanyu lyabwe nʼekitiibwa kyabwe, nʼokwegomba okwʼamaaso gaabwe, nʼokwegomba okwʼemitima gyabwe, ne batabani baabwe ne bawala baabwe,

²⁶ku lunaku olwo aliba awonyeewo yʼalikuwa amawulire.

²⁷Mu kiseera ekyo olyasamya akamwa ko, era olyogera eri kaawonawo so toliddayo kusirika. Era oliba kabonero gye bali, bamanye nga nze Mukama.”