Ezeekyeri 26:1-21 LGCB2014 - Bible AI

¹Awo olwatuuka mu mwaka ogwʼekkumi nʼogumu ku lunaku olwʼolubereberye mu mwezi, ekigambo kya Mukama Katonda ne kinzijira nʼaŋŋamba nti,

²“Omwana wʼomuntu, kubanga Ttuulo yakuba mu ngalo nʼayogera ku Yerusaalemi nti, ‘Otyo! Omulyango ogwʼamawanga gumenyeddwa, era nʼenzigi zinzigguliddwa kaakano nga bwʼafuuse amatongo, ndigaggawala,’

³Mukama Katonda kyava ayogera nti, Nkuvunaana ggwe Ttuulo, ndiyimusa amawanga mangi gakulumbe, ngʼennyanja bwʼesitula amayengo gaayo.

⁴Balimenya bbugwe wa Ttuulo, ne basuula nʼemirongooti gye, era ndiggyawo ebifunfugu bye byonna ne mmufuula olwazi olwereere.

⁵Wakati mu nnyanja alibeera ekifo ekyʼokwanjulurizangamu obutimba obwʼebyennyanja, kubanga nze njogedde bwʼayogera Mukama Katonda. Alifuuka omunyago ogwʼamawanga,

⁶era ebifo bye ebyʼoku lukalu kwʼabeera birimalibwawo ekitala. Olwo balimanya nga nze Mukama.”

⁷“Era Mukama Katonda agamba nti, ‘Ndiweereza Nebukadduneeza kabaka wʼe Babulooni kabaka wa bakabaka, eri Ttuulo okuva mu bukiikakkono, ngʼalina embalaasi nʼamagaali, nʼabeebagala embalaasi nʼeggye eddene.

⁸Alitta nʼekitala abatuuze bo ababeera ku lukalu, era alizimba ebigo okukwolekera, nʼateekawo nʼebitindiro okutuuka ku bbugwe wo nʼakwolekeza nʼengabo.

⁹Alitunuza ebintu bye ebitomera eri bbugwe wo, nʼamenyaamenya emirongooti gyo nʼebyokulwanyisa bye.

¹⁰Embalaasi ze ziriba nnyingi nnyo, nʼenfuufu yaazo erikubikka era ne bbugwe wo alinyeenyezebwa olwʼamaloboozi gʼembalaasi ennwanyi, nʼolwʼebiwalulibwa nʼamagaali bwʼaliyingira mu wankaaki wo, ngʼabasajja bwe bayingira mu kibuga, nga bbugwe waakyo abotoddwamu ekituli.

¹¹Embalaasi ze ziririnyirira enguudo zo; nʼabantu bo alibatta nʼekitala era nʼempagi zo ezʼamaanyi zirisuulibwa ku ttaka.

¹²Balinyaga obugagga bwo ne babba nʼebyamaguzi byo; balimenya bbugwe wo ne basaanyaawo nʼennyumba zo ennungi, nʼamayinja go nʼembaawo zo era nʼebifunfugu birisuulibwa wakati mu nnyanja.

¹³Ndikomya okuyimba kwo, era nʼamaloboozi agʼennanga zo tegaliwulirwa nate.

¹⁴Ndikufuula olwazi olwereere, era olibeera ekifo ekyʼokwanjulurizangamu obutimba obwʼebyennyanja. Tolizimbibwa nate, kubanga nze Mukama njogedde, bwʼayogera Mukama Katonda.’ ”

¹⁵“Bwʼati bwʼayogera Mukama Katonda eri Ttuulo nti, Ebifo ebiri ku lubalama lwʼennyanja tebirikankana olwʼokubwatuka olwʼokugwa kwo, abaliba balumizibbwa bwe balisinda, nʼabalala ne battibwa wakati mu ggwe?

¹⁶Olwo abalangira bonna abʼoku lukalu lwʼennyanja baliva ku ntebe zaabwe ezʼobwakabaka ne bambulamu ebyambalo byabwe ne baggyako nʼengoye zaabwe ezʼemiddalizo. Mu kutya okungi, balituula wansi ku ttaka, nga bakankana buli kaseera nga basamaaliridde.

¹⁷Balikukungubagira ne bakugamba nti,

¹⁷‘Ngʼozikiriziddwa, ggwe ekibuga ekyatutumuka, ekyabeerangamu abantu abalunnyanja. Wali wa maanyi ku nnyanja, ggwe nʼabantu bo, watiisatiisanga bonna abaabeeranga ku lubalama lwʼennyanja.

¹⁸Kaakano olubalama lwʼennyanja lukankana ku lunaku olwʼokugwa kwo, era nʼebizinga ebiri mu nnyanja bitidde olwʼokugwa kwo.’ ”

¹⁹“Bwʼati bwʼayogera Mukama Katonda nti, Bwe ndikufuula ekibuga ekirimu ebifulukwa, ngʼebibuga ebitakyabaamu bantu era bwe ndikuyimusizaako obuziba bwʼennyanja, nʼamazzi gaayo ne gakubikka,

²⁰kale ndikussa wansi ngʼabo abagenda mu bunnya eri abaafa edda. Olibeera wansi mu ttaka, mu bifo ebyazika edda ennyo, nʼabo abaserengeta mu bunnya, so tojja kudda wadde okufuna ekifo mu nsi ya balamu.

²¹Ndikutuusa ku nkomerero embi, so toliwulirwa nate. Balikunoonya, naye toliddayo kulabika,” bwʼayogera Mukama Katonda.