Ezeekyeri 27:1-36 LGCB2014 - Bible AI

¹Ekigambo kya Mukama Katonda ne kinzijira nʼaŋŋamba nti,

²“Kaakano, ggwe omwana wʼomuntu tandika okukungubagira Ttuulo,

³Oyogere eri Ttuulo, ekiri awayingirirwa mu nnyanja, omusuubuzi owʼamawanga agʼoku ttale eryʼennyanja, nti bwʼati bwʼayogera Mukama Katonda nti,

³‘Ggwe Ttuulo oyogera nti, Natuukirira mu bulungi.

⁴Amatwale go gakoma mu nnyanja wakati, era nʼabaakuzimba baakola omulimu ogwʼettendo.

⁵Baakola embaawo zo zonna mu miberosi gya Seniri, ne baddira emivule egyʼe Lebanooni ne bakolamu omulongooti.

⁶Ne bakola enkasi zo okuva mu myera egya Basani, nʼemmanga zo, bazikola mu nzo, ezʼoku bizinga ebya Kittimu, nga bazaaliiridde nʼamasanga.

⁷Ettanga lyo lyali lya linena aliko omudalizo eryava mu Misiri, era lyakozesebwanga ebendera; nʼengoye zo zaali za bbululu nʼezʼeffulungu ezaaba ku ttale erya Erisa ekyali ku mabbali gʼennyanja.

⁸Abasajja bʼe Sidoni ne Aluwadi be baakubanga enkasi, nʼabasajja bo abamanyirivu, ggwe Ttuulo, be baali abalunnyanja.

⁹Abasajja abazira abʼe Gebali nʼabagezigezi baaberanga mu ggwe, era ngʼomulimu gwabwe kunyweza emiguwa gyʼebyombo; ebyombo byonna ebyʼoku nnyanja nʼabagoba baabyo bajjanga okusuubula naawe; nga bagula ebyamaguzi byo.’ ”

⁹

¹⁰ⓐ “Abantu abʼe Buperusi, ne Luudi ne Puuti[2], baali mu ggye lyo, era be baawanikanga engabo nʼenkuufiira ku bisenge byo ne bakuwa ekitiibwa.

¹¹Abasajja ba Yaluradi nʼeggye lyabwe be baakuumanga bbugwe wo enjuuyi zonna; abasajja bʼe Gagammada baabanga mu mirongooti gyo nga bawanise engabo zaabwe okwetooloola bbugwe wo, era be baakulabisanga obulungi.”

¹²“Talusiisi yakolanga naawe obusuubuzi obwʼobugagga obwʼengeri zonna bwe walina, baawanyisanga effeeza, nʼebyuma, nʼamabaati nʼamasasi bafune ebyamaguzi byo.”

¹³“Buyonaani, Tubali, ne Meseki be baakusuubulangako, nga muwanyisaganya abaddu nʼebintu ebyʼebikomo bafune ebintu byammwe.”

¹⁴“Abʼomu Togaluma baawanyisaganya embalaasi ezʼemirimu egya bulijjo, nʼembalaasi ezʼentalo, nʼennyumbu bafune ebyamaguzi byo.”

¹⁵“Abasajja abʼe Dedani baasuubulanga naawe, era nʼabatuuze abʼoku lubalama lwʼennyanja baali katale ko, nga bakusasula nʼamasanga nʼemitoogo.”

¹⁶“Edomu baakolanga naawe ebyʼobusuubuzi olwʼobungi bwʼebintu byo; era baawanyisanga naawe amayinja aga nnawandagala, nʼengoye ezʼeffulungu, nʼemirimu egyʼeddalizo, ne linena omulungi ne kolali nʼamayinja amatwakaavu bafune ebyamaguzi byo.”

¹⁷“Yuda ne Isirayiri baakolanga naawe ebyʼobusuubuzi nga bawaanyisa naawe eŋŋaano eyavanga e Minnisi nʼebyakaloosa, nʼomubisi gwʼenjuki, nʼamafuta nʼenvumbo, bafune ebyamaguzi byo.”

¹⁸“Olwʼobugagga bwo obungi, nʼebintu byo ebingi, Ddamasiko baasuubulanga naawe wayini owʼe Keruboni, nʼebyoya byʼendiga ebyeru ebyʼe Zakari.”

¹⁹“Aba Ddaani ne Yovani (Buyonaani) abaavanga e Wuzari baawanyisanga naawe ekyuma ekiyisiddwa mu muliro nʼembawo eza kasiya ne kalamo, ne bagula ebyamaguzi byo.”

²⁰“Dedani yakusuubulangako bulangiti ezakozesebwanga ne mu kwebagala embalaasi.”

²¹“Buwalabu nʼabalangira bonna abʼe Kedali baakusuubulangako era ne bakugulako abaana bʼendiga, nʼendiga ennume nʼembuzi.”

²²“Abasuubuzi abʼe Seeba ne Laama baakolagananga naawe, nga bakusuubulako ebyakaloosa ebisinga byonna obulungi, nʼamayinja gonna agʼomuwendo omungi ne zaabu, bafune ebyamaguzi byammwe.”

²³“Kalani, ne Kaane ne Adeni nʼabasuubuzi abʼe Seeba, Asuli, ne Kirumaadi baasuubulanga naawe.

²⁴Mu katale ko baasubulirangamu engoye ennungi, engoye eza bbululu, nʼengoye ezʼeddalizo, nʼebiwempe ebineekaneeka ebiriko emiguwa emiruke egyalukibwa obulungi.

²⁵‘Ebyombo ebyʼe Talusiisi bye byatambuzanga ebyamaguzi byo. Era wajjula nʼoba nʼebintu bingi wakati mu nnyanja.

²⁶Abakubi bʼenkasi bakutwala awali amayengo amangi. Naye omuyaga ogwʼEbuvanjuba gulikumenyeramenyera wakati mu nnyanja.

²⁷Obugagga bwo nʼebyamaguzi byo nʼebikozesebwa byo, nʼabalunnyanja bo, nʼabagoba bo, nʼabasuubuzi bo nʼabaserikale bo bonna na buli muntu ali ku kyombo balibbira wakati mu nnyanja ku lunaku kwʼoligwiira ku kabenje.

²⁸Eddoboozi lyʼokukaaba kwʼabalunnyanja bo, kulikankanya ebyalo ebiri ku lubalama lwʼennyanja.

²⁹Abakubi bʼenkasi bonna balyabulira ebyombo byabwe; nʼabagoba nʼabalunnyanja bonna baliyimirira ku lubalama lwʼennyanja.

³⁰Baliyimusa amaloboozi gaabwe ne bakukaabira nnyo; era baliteeka enfuufu ku mitwe gyabwe ne beevulunga mu vvu.

³¹Balikumwera emitwe gyabwe, era Balyambala ebibukutu. Balikukaabira nʼemmeeme ezennyamidde nga bakukungubaga nʼemitima egijjudde ennyiike.

³²Balikukungubagira nga bwe bakuba ebiwoobe nga boogera nti, Ani eyali asirisibbwa nga Ttuulo eyeetooloddwa ennyanja?

³³Bwe waweerezanga ebyamaguzi byo ku nnyanja, amawanga mangi gamalibwanga; era ne bakabaka bʼensi baagaggawazibwa ebyʼobugagga bwo ebingi nʼebyamaguzi byo.

³⁴Kaakano ennyanja ekumazeewo, mu buziba bwʼamazzi; ebyamaguzi byo nʼabʼomu kyombo kyo bonna babbidde naawe.

³⁵Abantu bonna abʼoku lubalama lwʼennyanja bafunye ensisi, era ne bakabaka baabwe bajjudde entiisa tebafaananika mu maaso olwʼentiisa.

³⁶Abasuubuzi abʼomu mawanga bakufuuyira empa; otuuse ku nkomerero embi, so tolibeerawo nate ennaku zonna.’ ”