Ezeekyeri 28:1-26 LGCB2014 - Bible AI

¹Awo ekigambo kya Mukama Katonda ne kinzijira, nʼaŋŋamba nti,

²“Omwana wʼomuntu, gamba omufuzi wʼe Ttuulo nti,

²Bwʼati bwʼayogera Mukama Katonda nti, Kubanga olina amalala mu mutima gwo kyova oyogera nti, ‘Ndi katonda, era ntuula ku ntebe eyʼobwakabaka eya Katonda wakati mu nnyanja,’ songa oli muntu buntu, so si katonda, newaakubadde ngʼolowooza nga oli mugezi nga katonda.

³Oli mugezi okusinga Danyeri? Tewali kyama kikukwekeddwa?

⁴Mu magezi go ne mu kutegeera kwo weefunidde ebyʼobugagga, nʼokuŋŋaanya ezaabu nʼeffeeza nʼobitereka mu mawanika go.

⁵Olwʼobukujjukujju bwo mu byʼobusuubuzi oyongedde okugaggawala, era nʼomutima gwo gwenyumiririza mu byobugagga bwo.”

⁶Mukama Katonda kyava ayogera nti, “Kubanga olowooza ngʼoli mugezi, ngʼoli mugezi nga katonda,

⁷kyendiva nkuleetera bannaggwanga ne bakulumba, abʼomu mawanga agasinga obukambwe, ne basowola ebitala byabwe eri obulungi nʼamagezi go, ne boonoona okumasamasa kwo.

⁸Balikusuula mu bunnya nʼofiira eyo okufa okubi wakati mu gayanja.

⁹Olyogera nate nti, ‘Ndi katonda,’ mu maaso gaabo abakutta? Oliba muntu buntu so si katonda mu mikono gyʼabo abakutta.

¹⁰Olifa okufa okwʼabatali bakomole, mu mikono gya bannaggwanga, nze nkyogedde, bwʼayogera Mukama Katonda.”

¹¹Ekigambo kya Mukama ne kinzijira, nʼaŋŋamba nti,

¹²“Omwana wʼomuntu kungubagira kabaka wʼe Ttuulo, omutegeeze nti, Bwʼati bwʼayogera Mukama Katonda nti,

¹²‘Ggwe wali ekyokulabirako ekituukiridde ngʼojjudde amagezi era nga watuukirira mu bulungi.

¹³Wali mu Adeni, ennimiro ya Katonda; buli jjinja eryʼomuwendo nga likubikako, sadio, topazi, alimasi, berulo, sokamu, yasepi, safiro, ejjinja erya nnawandagala. Okuteekebwateekebwa kwo nʼebikunyweza byakolebwa mu zaabu. Era ku lunaku lwe watondebwa, byategekebwa.

¹⁴Wali kerubi omukuumi eyafukibwako amafuta, nakwawula lwa nsonga eyo. Wabeeranga ku lusozi olutukuvu olwa Katonda, nʼotambulira wakati mu mayinja agʼomuliro.

¹⁵Tewaliiko kya kunenyezebwa kyonna okuva ku lunaku lwe watondebwa, okutuusa obutali butuukirivu bwe bwalabika mu ggwe.

¹⁶Mu bikolwa byo ebingi, wajjula empisa embi, era nʼokola ebibi. Kyennava nkugoba ku lusozi lwa Katonda, mu buswavu obungi ne nkugoba ggwe kerubi eyakuumanga okuva mu mayinja agʼomuliro.

¹⁷Omutima gwo gwalina amalala olwʼobulungi bwo, ne weelimbalimba olwʼekitiibwa kyo. Kyennava nkukanyuga ku nsi ne nkufuula ekyʼokusekererwa mu maaso ga bakabaka.

¹⁸Olwʼebibi byo ebingi nʼolwʼobukumpanya bwo oyonoonye ebifo byo ebitukuvu. Kyenava nziggya omuliro mu ggwe ne gukusaanyaawo, ne nkufuula evvu ku nsi wakati mu abo bonna abaakulabanga.

¹⁹Amawanga gonna agaakumanya gaatya nnyo; otuuse ku nkomerero embi, so tolibeerawo nate ennaku zonna.’ ”

²⁰Ekigambo kya Mukama ne kinzijira, nʼaŋŋamba nti,

²¹“Omwana wʼomuntu kyuka otunuulire Sidoni, obawe obunnabbi,

²²oyogere nti, Bwʼati bwʼayogera Mukama Katonda nti,

²²“ ‘Nkulinako ensonga, ggwe Sidoni, era ndyegulumiza mu ggwe. Balimanya nga nze Mukama bwe ndimubonereza, ne neeraga mu ye okuba omutukuvu.

²³Ndiweereza kawumpuli ku ye, era ndikulukusa omusaayi mu nguudo ze. Abafu baligwa wakati mu ye, ekitala kimulumbe enjuuyi zonna. Olwo balimanya nga nze Mukama.

²⁴“ ‘Tewalibaawo nate eri ennyumba ya Isirayiri omweramannyo ogufumita newaakubadde eriggwa eribafumita okuva mu baliraanwa abalina ettima. Era balimanya nga nze Katonda Ayinzabyonna.

²⁵“ ‘Bwʼati bwʼayogera Mukama Katonda nti, Bwe ndikuŋŋaanya abantu ba Isirayiri okubaggya mu mawanga gye baasaasaanyizibwa, nditukuzibwa mu bo mu maaso gʼamawanga, era balituula mu nsi eyaabwe gye nawa omuddu wange Yakobo.

²⁶Balituula omwo mirembe, era balizimba amayumba ne basimba nʼennimiro ezʼemizabbibu. Bwe ndibonereza baliraanwa baabwe bonna abaabayisa obubi, bo baliba batudde mirembe. Olwo balimanya nga nze Mukama Katonda waabwe.’ ”