Ezeekyeri 47:1-23 LGCB2014 - Bible AI

¹Awo omusajja nʼankomyawo ku mulyango ogwa yeekaalu, ne ndaba amazzi nga gava wansi wʼomulyango gwa yeekaalu ku luuyi olwʼebuvanjuba kubanga yeekaalu yali etunudde ku luuyi olwʼebuvanjuba. Amazzi gaali gakulukuta nga gava wansi ku luuyi olwa ddyo olwa yeekaalu, ku luuyi olwʼObukiikaddyo obwʼekyoto.

²Nʼanfulumiza mu mulyango gwʼObukiikakkono, nʼankulembera nʼanneetoolooza ebweru eri oluggi olwʼebweru olutunuulidde Ebuvanjuba, era laba amazzi gaali gakulukuta okuva ku luuyi olwʼObukiikaddyo.

³Awo omusajja eyalina olupimo mu mukono gwe, nʼalaga ku luuyi olwʼebuvanjuba yapima mita ebikumi bina mu ataano, nʼalyoka ampisa mu mazzi, agaali gakoma mu bukongovvule.

⁴Nʼapima mita endala ebikumi bina mu ataano, nʼampisa mu mazzi agaali gankoma mu maviivi. Nʼapima mita endala ebikumi bina mu ataano, nʼampisa mu mazzi agaali gankoma mu kiwato.

⁵Nʼapima mita endala ebikumi bina mu ataano, naye kati amazzi gaali gafuuse mugga gwe nnali sisobola kusomoka kubanga amazzi gaali gatumbidde era nga mangi agawugibwamu obuwugirwa, omugga ogwali gutasoboka kusomokebwa.

⁶Nʼambuuza nti, “Omwana wʼomuntu, kino okiraba?”

⁶Nʼanzizaayo ku lubalama lwʼomugga.

⁷Awo bwe natuuka eyo, laba ne ndaba ku lubalama lwʼomugga emiti mingi nnyo eruuyi nʼeruuyi wʼomugga.

⁸Nʼaŋŋamba nti, “Amazzi gano gakulukuta gadda mu nsi ekyʼEbuvanjuba, ne gaserengeta mu ddungu, ne gayingira mu Nnyanja.[7] Omugga bwe guyiwa mu Nnyanja[8] amazzi ne galongooka.

⁹Buli kiramu tekirifa yonna omugga gye guyita, era mulibeeramu ebyennyanja bingi nnyo, kubanga amazzi gano agakulukutirayo gafuula amazzi agʼomu Nnyanja eyʼOmunnyo okuba amalungi, noolwekyo omugga gye guyita, ebintu byonna binaabeeranga biramu.

¹⁰Abavubi banaayimiriranga ku lubalama lwagwo okuva mu Engedi okutuuka e Negalayimu; walibeerayo ebifo ebyokwanikamu obutimba. Buli byannyanja biriba mu bika byabyo, era nga bingi nnyo nnyini ngʼebyennyanja ebyʼomu Nnyanja Ennene, ye Meditereeniya.

¹¹Naye ebifo ebyʼettosi nʼebisaalu tebirilongooka, birisigala nga bya munnyo.

¹²Emiti egyʼebibala ebya buli kika girimera eruuyi nʼeruuyi wʼomugga, nʼebikoola byagyo tebiriwotoka era tegiibulengako bibala. Buli mwezi ginaabeerangako ebibala, kubanga amazzi gaagyo agava mu Watukuvu gagifukirira. Ebibala byagyo biriba mmere, nʼebikoola byagyo biriba ddagala eriwonya.”

¹³Bwʼati bwʼayogera Mukama Katonda nti, “Bwe muti bwe munaasala ensalo nga mugabanya ensi mu bika bya Isirayiri ekkumi nʼebibiri, ngʼekika kya Yusufu kiweebwa emigabo ebiri.

¹⁴Muligibagabanyizaamu mu bwenkanya, kubanga nagirayirira bajjajjammwe, era ettaka liriba mugabo gwabwe.

¹⁵“Ensalo zʼensi eyo ziriba bwe ziti: Ku luuyi olwʼObukiikakkono, eriva ku Nnyanja Ennene ku mabbali gʼekkubo eryʼe Kesulooni okutuuka awayingirirwa e Kamasi, ngʼogenda e Zedadi,

¹⁶ⓓ Berosa, Sibulayimu ekiri ku nsalo wakati wʼe Ddamasiko nʼe Kamasi, okutuukira ddala e Kazerukattikoni ekiri ku nsalo yʼe Kawulaani.

¹⁷Era ensalo eriva ku nnyanja okutuuka e Kazalenooni ekiri ku nsalo yʼe Ddamasiko eyʼObukiikakkono, okuliraana Kamasi mu Bukiikakkono. Era eyo yʼeriba ensalo eyʼObukiikakkono.

¹⁷

¹⁸Ku luuyi olwʼebuvanjuba ensalo eriva e Kazalenooni ekiri wakati wa Kawulaani ne Ddamasiko ku lubalama lwa Yoludaani wakati wa Gireyaadi nʼensi ya Isirayiri era nʼokutuuka ku nnyanja eyʼEbuvanjuba. Eyo yʼeriba ensalo eyʼEbuvanjuba.

¹⁸

¹⁹Ku luuyi olwʼObukiikaddyo eriva e Tamali okutuukira ddala ku mazzi agʼe Meribosukadesi, ne ku kagga akʼe Misiri okutuuka ku Nnyanja Ennene. Eyo yʼeriba ensalo eyʼObukiikaddyo.

¹⁹

²⁰Ku luuyi olwʼebugwanjuba, Ennyanja Ennene, ye Meditereeniya yʼeriba ensalo okutuuka awayolekera awayingirirwa e Kamasi, era eyo yʼeriba ensalo eyʼEbugwanjuba.”

²¹“Muligabana ensi eno ngʼebika bya Isirayiri bwe biri.

²²Muligigabana ngʼomugabo wakati wammwe ne bannaggwanga abali nammwe, abazaalidde abaana mu mmwe. Mulibatwala ngʼabazaaliranwa ba Isirayiri, era baligabana omugabo mu bika bya Isirayiri.

²³Era mu buli kika munnaggwanga mwʼanaabeeranga, eyo gye mulimuwa omugabo gwe,” bwʼayogera Mukama Katonda.