Ezera 1:1-11 LGCB2014 - Bible AI

¹ⓐ Awo mu mwaka ogwʼolubereberye ogwʼobufuzi bwa Kuulo kabaka wa Buperusi, ekigambo Mukama kye yayogerera mu Yeremiya ne kituukirira, Mukama nʼakoma ku mutima gwa Kuulo kabaka wʼe Buperusi okulangirira mu bwakabaka bwe bwonna, nʼokukiteeka mu buwandiike nti,

²ⓑ “Bwʼati bwʼayogera Kuulo[1] kabaka wʼe Buperusi nti, ‘Obwakabaka bwonna obwʼomu nsi Mukama Katonda wʼeggulu abumpadde, era annonze okumuzimbira yeekaalu e Yerusaalemi mu Yuda.

³Omuntu yenna mu mmwe abantu be, Katonda we abeere naye, agende e Yerusaalemi mu Yuda addaabirize yeekaalu ya Mukama, Katonda wa Isirayiri, Katonda ali mu Yerusaalemi.

⁴Na buli Muyisirayiri eyasigalawo gyʼali, abantu abo baabeeramu, banaamuwa ffeeza ne zaabu, nʼebintu nʼebisolo ebirundibwa, obutasaako ebiweebwayo bye bawaayo ku bwabwe ebya yeekaalu ya Katonda eri mu Yerusaalemi.’ ”

⁵Awo abakulu bʼennyumba za Yuda ne Benyamini, ne bakabona, nʼAbaleevi, na buli muntu Katonda gwe yakubiriza, ne beeteekateeka okwambuka okugenda okuddaabiriza yeekaalu ya Mukama eri mu Yerusaalemi[2].

⁶Baliraanwa baabwe bonna ne babawa ebintu ebya ffeeza ne zaabu, nʼebintu ebirala nʼebisolo ebirundibwa, nʼebirabo ebyʼomuwendo omungi, okwo nga kwe kuli ebiweebwayo bye baawaayo nga beeyagalidde.

⁷Ebintu ebyali mu yeekaalu ya Mukama, Nebukadduneeza bye yanyaga mu Yerusaalemi nʼabiteeka mu ssabo lya bakatonda be, Kabaka Kuulo, nʼabiggyayo.

⁸Kuulo kabaka wʼe Buperusi nʼabikwasa Misuledasi omuwanika, eyabikwasa Sesubazzali omulangira wa Yuda.

⁹Guno gwe gwali omuwendo gwabyo: Esowaani eza zaabu — amakumi asatu (30), Esowaani eza ffeeza — lukumi (1,000), Ebiso ebya ffeeza — amakumi abiri mu mwenda (29).

¹⁰Ebibya ebya zaabu — amakumi asatu (30), nʼebibya ebya ffeeza ebigenderako — ebikumi bina mu kumi (410), nʼebintu ebirala — lukumi (1,000).

¹¹Byonna awamu ebintu ebya zaabu ne ffeeza byali enkumi ttaano mu ebikumi bina (5,400). Sesubazzali nʼagenda nabyo byonna e Yerusaalemi okuva e Babulooni mu buwaŋŋanguse.