Ezera 4:1-24 LGCB2014 - Bible AI

¹Awo abalabe ba Yuda ne Benyamini[7] bwe baawulira ngʼabaana ba Isirayiri abaali mu buwaŋŋanguse batandise okuddaabiriza yeekaalu ya Mukama, Katonda wa Isirayiri,

²ⓚ ne bagenda eri Zerubbaberi nʼabakulu bʼebika ne boogera nti, “Mutukkirize tubayambeko okuzimba, kubanga tuli nga mmwe, era tusinza Katonda wammwe, era okuva ku mirembe gya Esaludaddoni kabaka wʼe Bwasuli, eyatuleeta wano tuwaayo ssaddaaka eri Katonda wammwe.”

³Naye Zerubbaberi ne Yesuwa nʼabakulu bʼebika bya Isirayiri abalala ne babaddamu nti, “Temulina mugabo naffe mu kuddaabiriza yeekaalu ya Katonda waffe. Tuligizimbira Mukama Katonda wa Isirayiri ffekka, nga kabaka Kuulo kabaka wʼe Buperusi bwe yatulagira.”

⁴Awo abantu be baalimu ne bamalirira okulemesa abantu ba Yuda, ne babatiisatiisa okuzimba.

⁵Ne bagulirira abantu okubawakanya nʼokulemesa enteekateeka yaabwe, ebbanga lyonna Kuulo kabaka wʼe Buperusi lye yafuga, okutuusa Daliyo kabaka wʼe Buperusi lwe yalya obwakabaka.

⁶ⓛ Awo ku mirembe gya Akaswero[8] nga kyʼajje alye obwakabaka, abalabe baabwe ne baawandiika ebintu ebyʼobulimba ne baloopa abantu ba Yuda ne Yerusaalemi.

⁷Awo mu biro bya Alutagizerugizi, Bisulamu ne Misuledasi ne Tabeeri ne bannaabwe abalala ne bawandiikira Alutagizerugizi ebbaluwa mu nnukuta ezʼAramayika ne mu lulimi Olwaramayika.

⁸Lekumu owʼessaza, ne Simusaayi omuwandiisi ne bawandiikira Alutagizerugizi ebbaluwa ekwata ku Yerusaalemi.

⁹Lekumu owʼessaza ne Simusaayi omuwandiisi awamu ne bannaabwe abalala, abalamuzi nʼabakungu, nʼAbaperusi, nʼAbalukevi, nʼAbababulooni, nʼAbasusanuki, nʼAbaweramu,

¹⁰nʼamawanga amalala, omukungu Osunappali be yakomyawo, nʼabateeka mu bibuga bya Samaliya ne mu bitundu ebirala ebiri emitala wʼomugga Fulaati ne bawandiika nti:

¹¹Ebbaluwa gye baawandiikira kabaka yali egamba nti, Eri kabaka Alutagizerugizi, Okuva eri abaddu bo abasajja abʼomu ssaza eriri emitala wʼomugga Fulaati.

¹²Kabaka asaanye ategeere nti Abayudaaya abaava gyʼoli ne bajja gye tuli bagenze e Yerusaalemi okuddaabiriza ekibuga ekyo ekijeemu ekyʼabantu abakozi bʼebibi. Batandise okuddaabiriza emisingi nʼokuzaawo bbugwe.

¹³Ne nsonga endala, kabaka asaanye akimanye ngʼekibuga ekyo bwe kirizimbibwa ne bbugwe bwʼaliggwa okukola, tebalisasula misolo nate, newaakubadde okuwa empooza, era ekiriva mu ekyo bwe bwakabaka okufiirwa.

¹⁴Kale nno, olwʼokuba nga tulina obuvunaanyizibwa eri obwakabaka, ate nga tetwandiyagadde kulaba nga kabaka aswazibwa, kyetuvudde tuweereza obubaka buno eri kabaka,

¹⁵banoonye mu bitabo ebyʼokujjukiza ebya bajjajjaabo. Mu bitabo ebyo ojja kuzuula ngʼekibuga ekyo kibuga kijeemu, ekyalumya emitwe gya bakabaka nʼabaamasaza, era nga kifo ekimanyiddwa ngʼekijeemu okuva mu biro ebyʼedda. Era kyekyava kizikirizibwa.

¹⁶Tukakasa kabaka nti ekibuga kino bwe kirizimbibwa ne bbugwe waakyo nʼazzibwawo, tolibaako ne kyʼosigaza emitala wʼomugga Fulaati.

¹⁷Awo kabaka nʼabaddamu bwʼati nti: Eri Lekumu owʼessaza, ne Simusaayi omuwandiisi ne bannaabwe abalala abaabeeranga mu Samaliya, ne mu bifo ebirala ebiri mu ssaza eriri emitala wʼomugga Fulaati, Mbalamusizza.

¹⁸Ebbaluwa gye mwatuweereza esomeddwa mu maaso gange ne ngitegeera.

¹⁹Nalagira, okunoonyereza ne kukolebwa, era ne kizuulibwa ngʼekibuga ekyo, okuva edda kijeemera bakabaka[9], era ngʼobujeemu nʼekyejo byakolebwanga omwo.

²⁰Yerusaalemi kyalina bakabaka abʼamaanyi abaafuganga essaza lyonna eriri emitala wʼomugga Fulaati, era baaweebwanga emisolo, nʼempooza okuva mu kitundu ekyo.

²¹Kaakano muweereze ekiragiro eri abasajja abo bakomye omulimu ogwʼokuddaabiriza ekibuga ekyo okutuusa ate bwe ndibalagira.

²²Musseeyo nnyo omwoyo okulaba nga temutenguwa mu nsonga eyo. Lwaki tukkiriza ensonga eyo okugenda mu maaso, okuleeta okufiirwa eri obwakabaka?

²³Amangwago ebbaluwa eyava ewa kabaka Alutagizerugizi bwe yasomerwa Lekumu ne Simusaayi omuwandiisi ne bannaabwe, ne bayanguwa okugenda eri Abayudaaya e Yerusaalemi, ne babalekesaayo nʼamaanyi okugenda mu maaso.

²⁴ⓜ Awo omulimu ku nnyumba ya Katonda mu Yerusaalemi ne guyimirira okutuusa omwaka ogwokubiri ogwʼomulembe gwa Daliyo kabaka wʼe Buperusi.