Ezera 9:1-15 LGCB2014 - Bible AI

¹Oluvannyuma lwʼebintu ebyo okukolebwa,[11] abakulembeze ne bajja gye ndi ne boogera nti, “Abantu ba Isirayiri, omwo nga mwe muli bakabona nʼAbaleevi, tebeeyawudde ku mawanga agabaliraanye nʼebikolwa byabwe ebyʼemizizo. Tebeeyawudde ku Bakanani, ne ku Bakiiti ne ku Baperizi ne ku Bayebusi ne ku Bamoni ne ku Bamowaabu ne ku Bamisiri ne ku Bamoli.

²Bawasizza abamu ku bawala baabwe, nʼabawala ne bafumbirwa abamu ku batabani baabwe, bwe kityo eggwanga ettukuvu ne lyetabula nʼamawanga agabeetoolodde. Ku nsonga eyo abakulembeze nʼabakungu, be basinze okwonoona.”

³Awo bwe nawulira ebigambo ebyo, ne njuza ekkanzu yange nʼomunagiro gwange,[12] ne nkunyuula enviiri ku mutwe gwange ne mu kirevu kyange ne ntuula wansi nga nnakuwadde.

⁴Bonna abatya ebigambo bya Katonda wa Isirayiri ne bakuŋŋaanira we ndi, olwʼobutali bwesigwa obwʼabaawaŋŋangusibwa. Ne ntuula wansi nga nnakuwadde okutuusa ekiseera ekyʼekiweebwayo ekyʼakawungeezi bwe kyatuuka.

⁵Awo mu kiseera ekyʼekiweebwayo ekyʼakawungeezi ne ngolokoka okuva we nnali ntudde, nʼekkanzu yange enjulifu nʼomunagiro gwange omuyulifu, ne nfukamira ne ngolola emikono gyange eri Mukama Katonda wange,

⁶ne nsaba nti;

⁶“Ayi Katonda wange, nkwatiddwa ensonyi, era sisobola kuyimusa maaso gange eri gwe Katonda wange, kubanga obutali butuukirivu bwaffe busukiridde emitwe gyaffe, nʼomusango gwaffe gutuuse mu ggulu.

⁷Okuva mu biro bya bajjajjaffe nʼokutuusa leero, omusango gugenze gweyongera; era olwʼobutali butuukirivu bwaffe, bakabaka baffe, ne bakabona baffe baweereddwayo mu mukono gwa bakabaka abʼensi, nʼeri ekitala, nʼeri obusibe, nʼeri obunyazi, nʼeri obuswavu obungi, nga bwe kiri mu nnaku zino.”

⁸“Naye kaakano, akaseera katono, Mukama Katonda waffe atulaze ekisa nʼatulekawo ffe abatono, nʼatuwa ekifo ekisooka era ekinywevu mu watukuvu we, Katonda waffe nʼamulisa amaaso gaffe, nʼatuwa okuweeraweerako akatono mu busibe bwaffe.

⁹Newaakubadde nga tuli baddu,[13] Katonda waffe tatulekulidde mu busibe bwaffe, naye atulaze okusaasirwa mu maaso ga bakabaka bʼe Buperusi. Atuwadde obulamu obuggya okuzimba ennyumba ya Katonda waffe, nʼokuddaabiriza ebyo ebyayonooneka, era atutaddeko Bbugwe okutwetooloola okutukuuma mu Yuda ne mu Yerusaalemi.”

¹⁰“Kaakano Katonda waffe tunaayogera ki oluvannyuma lwʼebyo? Twaleka amateeka go

¹¹ge watuwa ngʼoyita mu baddu bo bannabbi, bwe wayogera nti, ‘Ensi gye mugenda okulya, nsi ejjudde obutali bulongoofu olwʼabantu baamu, era bagijjuzizza ebikolwa ebyʼobugwagwa enjuuyi zonna.

¹²ⓣ Noolwekyo temuwaayo bawala bammwe kufumbirwa batabani baabwe newaakubadde batabani bammwe okuwasa bawala baabwe. Temwongeranga ku bulungi bwabwe newaakubadde obugagga bwabwe, mulyoke mube nʼamaanyi mulye ebirungi byʼensi, ate era mubirekere nʼabaana bammwe okuba omugabo ogwʼemirembe nʼemirembe.’ ”

¹³“Bino byonna bitutuuseeko olwʼebikolwa byaffe ebitali bya butuukirivu nʼolwʼomusango omunene gwe tulina, ate nga Katonda waffe totubonerezza ngʼebikolwa byaffe bwe biri, naye otuleseewo nga bwe tuli kaakano.

¹⁴Tunaayinza nate okumenya ebiragiro byo ne tuwasa mu mawanga ago agakola ebitasaana? Tolitunyiigira nnyo nʼokusingawo nʼotuzikiriza obutalekaawo muntu yenna?

¹⁵Ayi Mukama Katonda wa Isirayiri oli mutuukirivu, era otuleseewo ffe ekitundu kino leero. Laba tuli mu maaso go nga tuzzizza omusango, newaakubadde nga tewali eyandisobodde okuyimirira mu maaso go.”