Isaaya 10:1-34 LGCB2014 - Bible AI

¹Nga zibasanze abo abateeka amateeka agatali ga bwenkanya, nʼabo abawa ebiragiro ebinyigiriza,

²okulemesa abaavu ne batafuna nsala ebagwanidde; era nʼokunyaga ku bantu bange abaavu ebyabwe, ne bafuula bannamwandu omunyago gwabwe, nʼabatalina ba kitaabwe omuyiggo gwabwe!

³Mulikola mutya ku lunaku Mukama lwalisalirako omusango ne mu kuzikirira okuliva ewala? Muliddukira wʼani alibayamba? Obugagga bwammwe mulibuleka wa?

⁴Muliba temusigazza kya kukola kirala wabula okutwalibwa nga mukutaamiridde mu busibe oba okuba mu abo abattiddwa. Naye wadde nga biri bityo, obusungu bwe buliba tebunnaggwaawo, era nʼomukono gwe guliba gukyagoloddwa.

⁵ⓕ “Zikusanze Bwasuli, omuggo gwʼobusungu bwange, era omuggo gwʼekiruyi kyange.

⁶Mmutuma okulumba eggwanga eritatya Mukama, era mmusindika eri abantu abansunguwazizza, abanyage, ababbire ddala, nʼokubasambirira abasambirire ngʼebitoomi ebyʼomu nguudo.

⁷Naye kino si kye kigendererwa kye, kino si kyʼalowooza. Ekigendererwa kye kwe kuzikiriza, okumalirawo ddala amawanga mangi.

⁸‘Abaduumizi bange bonna tebenkana bakabaka?’ bwʼatyo bwʼayogera.

⁹‘Kalino tetwakizikiriza nga Kalukemisi, ne Kamasi nga Alupaadi, ne Samaliya nga Ddamasiko?

¹⁰Ngʼomukono gwange bwe gwawamba obwakabaka obusinza bakatonda ababajje, abasinga nʼabo abʼomu Yerusaalemi ne Samaliya,

¹¹nga bwe nakola Samaliya ne bakatonda baabwe abalala si bwe nnaakola Yerusaalemi ne bakatonda baabwe ababajje?’ ”

¹²Mukama bwʼalimaliriza omulimu gwe ku lusozi Sayuuni era ne ku Yerusaalemi nʼalyoka abonereza kabaka wʼe Bwasuli olwʼokwewaana nʼokuduula kwe nʼentunula ye eyʼamalala.

¹³Kubanga yayogera nti,

¹³“ ‘Bino byonna mbikoze olwʼamaanyi gʼomukono gwange, era nʼolwʼamagezi gange, kubanga ndi mukalabakalaba: Najjulula ensalo zʼamawanga ne nnyaga obugagga bwabwe, ngʼowʼamaanyi omuzira ne nzikakkanya bakabaka baabwe.

¹⁴Ngʼomuntu bwʼakwata mu kisu, omukono gwange gwʼakunuukiriza ne gukwata mu bugagga bwʼamawanga; ngʼabantu bwe balondalonda amagi agalekeddwawo, bwe ntyo bwe nakuŋŋaanya amawanga gonna, tewali na limu lyayanjuluza ku kiwaawaatiro, newaakubadde eryayasamya akamwa kaalyo okukaaba.’ ”

¹⁴

¹⁵Embazzi eyinza okweyita eyʼekitalo okusinga oyo agitemesa? Omusumeeno gulyekuza okusinga oyo agusazisa? Gyʼobeera nti oluga luyinza okuwuuba omuntu alukozesa, oba omuggo okusitula oyo atali muti.

¹⁶Noolwekyo Mukama, Mukama Katonda Ayinzabyonna, kyaliva aweereza obukovvu bulye abasajja be abaagejja, era wansi wʼokujaganya nʼekitiibwa kye akoleeze wo omuliro ogwokya ngʼoluyiira.

¹⁷Ekitangaala kya Isirayiri kirifuuka omuliro, nʼOmutukuvu waabwe abeere olulimi lwʼomuliro, mu lunaku lumu kyokye kimalirewo ddala amaggwa ge nʼemyeramannyo gye.

¹⁸Era kiryokya ne kimalirawo ddala ekitiibwa kyʼebibira bye, nʼennimiro ze, engimu, ngʼomusajja omulwadde bwaggweerawo ddala.

¹⁹Nʼemiti egyʼomu kibira kye egirisigalawo giriba mitono nnyo nga nʼomwana ayinza okugibala.

²⁰Awo olulituuka ku lunaku olwo, abaliba bafisseewo ku Isirayiri, nʼabo abaliba bawonye ku nnyumba ya Yakobo nga tebakyeyinulira ku oyo[13] eyabakuba naye nga beesigama ku Mukama Katonda, omutukuvu wa Isirayiri mu mazima.

²¹Ekitundu ekirifikkawo kirikomawo, ekitundu kya Yakobo kirikomawo eri Katonda owʼamaanyi.

²²ⓖ Kubanga wadde abantu bo bangi ngʼomusenyu gwʼennyanja, abalikomawo nga balamu baliba batono. Okuzikirira kwo kwa kubaawo kubanga kusaanidde.

²³Kubanga Mukama, Mukama Katonda owʼEggye alireeta enkomerero eteriiko kubuusabuusa nga bwe yateekateeka entuuko mu nsi yonna.

²⁴Noolwekyo Mukama, Mukama Katonda owʼEggye kyava ayogera nti, “Mmwe abantu bange ababeera mu Sayuuni, temutyanga Abasuli, newaakubadde nga babakuba nʼoluga era nga babagololera omuggo nga Abamisiri bwe baakola.

²⁵Kubanga mu kaseera katono nnyo obusungu bwange gyʼoli bujja kukoma era ekiruyi kyange kiribazikiriza.”

²⁵

²⁶Mukama Katonda owʼEggye alibakuba nʼakaswanyu nga bwe yakuba aba Midiyaani ku lwazi lwʼe Olebu. Era aligololera oluga lwe ku nnyanja nga bwe yakola e Misiri.

²⁷Ku lunaku olwo, omugugu gwe guliggyibwa ku bibegabega byo, nʼekikoligo kye kive ku nsingo yo; ekikoligo kirimenyebwa olwʼobugevvu bwo.

²⁷

²⁸Laba eggye lyʼomulabe lituuse liwambye Yagasi, liyise mu Miguloni, era mu Mikumasi gye balireka emigugu gyabwe.

²⁹Bayise awavvuunukirwa, e Geba ne basulayo ekiro kimu, Laama akankana, Gibea wa Sawulo adduse.

³⁰Kaaba nʼeddoboozi eryʼomwanguka ggwe omuwala wa Gallimu! Ggwe Layisa wuliriza! Ngʼolabye Anasosi!

³¹Madumena adduse, abantu bʼe Gebimu beekukumye.

³²Olwa leero bajja kusibira Nobu, balyolekeza ekikonde kyabwe eri olusozi lwa Muwala wa Sayuuni, akasozi ka Yerusaalemi.

³³Laba, Mukama, Mukama Katonda owʼEggye, alitema amatabi nʼentiisa nʼemiti emiwanvu nʼemiwagguufu giritemerwa ddala, nʼemiti emiwanvu girikkakkanyizibwa.

³⁴Era alitemera ddala nʼembazzi ebisaka byʼomu kibira; Lebanooni aligwa mu maaso gʼoyo Ayinzabyonna.