Isaaya 11:1-16 LGCB2014 - Bible AI

¹ⓗ Ensibuka erimera ngʼeva ku kikonge kya Yese, ne ku mirandira kulivaako omuti, ne ku muti kulivaako Ettabi eriribala ekibala.

²Mwoyo wa Mukama alibeera ku ye, Mwoyo owʼamagezi nʼokutegeera ne Mwoyo wʼokusala ensonga, nʼowʼamaanyi ne Mwoyo wʼokumanya era nʼokutya Mukama Katonda.

³Era nʼessanyu lye liribeera mu kutya Mukama Katonda. Taasalenga misango ngʼasinziira ku maaso ge gokka nga bwe galaba, oba okusalawo ngʼasinziira ku byawulira nʼamatu ge byokka,

⁴ⓘ Naye anaasaliranga abaavu emisango mu bwenkanya, era asalire mu bwenkanya abo abawombeefu abʼomu nsi; era alikuba ensi nʼomuggo ogwʼomu kamwa ke, era alitta omukozi wʼebibi nʼomukka ogwʼomu kamwa ke.

⁵ⓙ Obutuukirivu, bwe buliba olukoba lwe yeesibya, nʼobwesigwa, bwʼalyesiba mu kiwato kye.

⁵

⁶ⓚ Omusege gulisulanga wamu nʼomwana gwʼendiga, nʼengo egalamire wamu nʼomwana gwʼembuzi; Era ennyana nʼempologoma nʼennyana eyassava binaagalamiranga wamu; era omwana omuto yalizirabirira.

⁷Ente nʼeddubu biririira wamu, abaana baazo banaagalamiranga wamu. Empologoma erirya omuddo ngʼente.

⁸Nʼomwana ayonka alizannyira ku kinnya kyʼenswera, nʼomwana omuto aliteeka omukono gwe mu kinnya kyʼessalambwa.

⁹ⓛ Tewalibeera kukolaganako bulabe wadde okuttiŋŋana ku lusozi lwange olutukuvu. Kubanga ensi eribeera ejjudde okumanya Mukama Katonda, ngʼamazzi bwe gajjuza ennyanja.

¹⁰ⓜ Awo ku lunaku luli, Omulandira gwa Yese guliyimiririra ngʼebendera eri amawanga. Oyo amawanga gwe ganaanoonyanga, nʼekifo kye ekyʼokuwummuliramu, kiribeera kya kitiibwa.

¹¹Era ku lunaku olwo Mukama aligolola omukono gwe omulundi ogwokubiri[14] okununula abasigalawo ku bantu be, okubaggya mu Bwasuli ne mu Misiri ne mu Pasuloosi ne mu Kuusi ne mu Eramu ne mu Sinali ne mu Kamasi ne mu bizinga ebyʼomu nnyanja.

¹²Era aliwanikira amawanga bbendera, akuŋŋaanye abawaŋŋanguse ba Isirayiri; aleete wamu abantu ba Yuda abaali basaasaanye mu nsonda ennya ezʼensi.

¹³Olwo obuggya bwa Efulayimu bulyoke buggweewo, nʼabo abateganya Yuda balizikirizibwa. Efulayimu talikwatirwa Yuda buggya wadde Yuda okubeera omulabe wa Efulayimu.

¹⁴Bombi awamu balirumba ne bamalawo Abafirisuuti mu busozi bwʼebugwanjuba; Era bombiriri balinyaga abantu bʼomu buvanjuba. Baligolola omukono gwabwe ku Edomu ne Mowaabu; nʼabaana ba Amoni balibagondera.

¹⁵ⓝ Era Mukama Katonda alikaliza omukutu gwʼennyanja yʼAbamisiri; era aliwujira omukono gwe ku mugga Fulaati ne guleetawo omuyaga ogukaza, agwawulemu ebitundu musanvu abantu bye banaasomokanga ku bigere.

¹⁶Era abo abalisigalawo ku bantu be balibeera nʼekkubo eryʼokuyitamu eryʼeggwanga eryasigala ku Bwasuli nga bwe kyali eri Isirayiri ku lunaku lwe baaviirako mu Misiri.