Isaaya 16:1-14 LGCB2014 - Bible AI

¹“Muweereze abaana bʼendiga eri oyo afuga ensi, okuva e Seera, ngʼoyita mu ddungu, okutuuka ku lusozi lwa Muwala wa Sayuuni.

²Ngʼennyonyi ezabulwako ekisu nʼezisaasaana nga zidda eno nʼeri, bwe batyo bwe baliba abawala ba Mowaabu awasomokerwa Alunooni.[16]

³Tuwe ku magezi, tubuulire, tukole tutya? Mutusiikirize mubeere ngʼekittuluze wakati mu ttuntu, Abajja bagobebwa mubakweke, abajja badaaga temubalyamu lukwe.

⁴Muleke aba Mowaabu abajja bagobebwa babeere nammwe. Mubataakirize oyo ayagala okubamalawo.”

⁴Omujoozi bwʼaweddewo, nʼokubetentebwa ne kuggwaawo; omulumbaganyi aliggwaawo mu nsi.

⁵Entebe eyʼobwakabaka eryoke etekebwewo mu kwagala, era ku yo kutuuleko omufuzi owʼomu nnyumba ya Dawudi alamula mu bwesigwa era anoonya obwenkanya era ayanguwa okukola ebyʼobutuukirivu.

⁶Tuwulidde amalala ga Mowaabu, nga bwʼajjudde okwemanya, nʼamalala ge nʼokuvuma; naye okwemanya kwe tekugasa.

⁶

⁷Noolwekyo leka Mowaabu akaabe, leka buli muntu akaabire ku Mowaabu. Mukungubage, musaalirwe obugaati bwʼemizabbibu egyʼe Kirukalesesi.

⁸Ennimiro ezʼe Kesuboni zikaze, nʼemizabbibu gyʼe Sibuma giweddewo. Abafuzi bʼamawanga batemeddewo ddala emiti gyabwe egyasinganga obulungi, egyabunanga ne gituuka e Yazeri nga giggukira mu ddungu nʼemitunsi nga gibuna nga gituukira ddala mu nnyanja.

⁹Noolwekyo kyenva nkaaba amaziga nga Yazeri bwʼakaaba olwʼomuzabbibu ogwʼe Sibuma. Nakufukirira nkutobye nʼamaziga gange, ggwe Kesuboni ne Ereyale: kubanga essanyu eryʼebibala byo nʼebyokukungula byo lizikiziddwa.

¹⁰Ennimiro engimu ziweddemu essanyu nʼokweyagala; ne mu nnimiro zʼemizabbibu temuliba ayimba wadde aleekaana; mu masogolero temulibaamu musogozi asogoleramu wayini; okuleekaana kwʼomusogozi ngʼasogola kukomye.

¹¹Omutima gwange kyeguva gukaabira Mowaabu mu ddoboozi ngʼeryʼennanga, emmeeme yange munda nʼekaabira Kirukeresi.

¹²Awo Mowaabu bwʼalyeyanjula, mu bifo ebigulumivu, alyekooya yekka; bwʼaligenda okusamira, tekirimuyamba.

¹³Ekyo kye kigambo Mukama kye yayogera ku Mowaabu mu biro ebyʼedda.

¹⁴Naye kaakano Mukama Katonda agamba nti, “Mu myaka esatu, ngʼomukozi gwe bapangisizza bwe yandigibaze, ekitiibwa kya Mowaabu kijja kuba nga kifuuse ekivume ekinyoomebwa, newaakubadde ngʼalina ekibiina ekinene; era walisigalawo abantu batono ate nga banafu ddala”.