Isaaya 17:1-14 LGCB2014 - Bible AI

¹ⓑ “Laba Ddamasiko tekikyali kibuga, kifuuse matongo.

²Ebibuga bya Aloweri babidduseemu: birirekerwa ensolo mwe zinaagalamiranga nga tewali azikanga.

³Ekigo ekyʼamaanyi kirisaanyizibwawo mu Efulayimu, nʼobwakabaka mu Ddamasiko bulimalibwawo; naye abalisigalawo mu Busuuli, baliba nʼekitiibwa ngʼekyʼabaana ba Isirayiri,” bwʼayogera Mukama Katonda owʼEggye.

³

⁴“Awo olulituuka ku lunaku luli, ekitiibwa kya Yakobo kirikendeera; era akoggere ddala.

⁵Ne kiba ngʼomukunguzi bwʼakuŋŋaanya eŋŋaano, nʼomukono gwe ne gukungula empeke; weewaawo kiriba ngʼomuntu bwʼalonda ebinywa byʼeŋŋaano mu Kiwonvu kya Lefayimu.

⁶Naye mulisigalamu ebinywa ebirondererwa ngʼomuzeyituuni bwe gubeera nga gukubiddwa, ne guleka ebibala bibiri oba bisatu waggulu ku busongezo, bina oba bitaano ku busongezo bwʼomuti omugimu,” bwʼayogera Mukama, Katonda wa Isirayiri.

⁶

⁷Ku lunaku luli abantu balirowooza ku Mutonzi waabwe, nʼamaaso gaabwe galikyukira Omutukuvu wa Isirayiri.

⁸So tebalirowooza ku byoto bya balubaale baabwe, emirimu gyʼemikono gyabwe, be beekolera, oba empagi za katonda wa Baasera oba ebyoto kwe bootereza obubaane.

⁹Mu biro ebyo ebibuga byabwe ebyʼamaanyi Abayisirayiri bye baabalesa, biriba ngʼebifo ebyameramu ebisaka ne kalandaluggo. Byonna birisigala matongo.

¹⁰ⓒ Weerabidde Katonda Omulokozi wo, so tojjukidde Lwazi lwa maanyi go; kyova osimbamu ebisimbe ebyʼokukusanyusa nʼosigamu omuzabbibu oguvudde ebweru.

¹¹Wadde obisimba bulungi nnyo ne bimera ku lunaku lwʼobisimbye, era ne bimerusa ensigo ku makya kwennyini kwe bisimbiddwa, tolibaako kyʼokungula wabula obulumi obutawonyezeka nʼennaku eyʼekitalo.

¹¹

¹²Woowe oluyoogaano olwʼamawanga amangi, bawuluguma ngʼokuwuluguma kwʼennyanja esiikuuse! Okuwuluguma kwʼabantu, bawuluguma ngʼamazzi agayiika nʼamaanyi amangi!

¹³Wadde amawanga galiwuuma nʼokuwulikika ne gawulikika ngʼamazzi agayiika nʼamaanyi amangi, Mukama bwʼaligagoba, galibulawo mbagirawo. Galiba ngʼebisusunku bwe bitwalibwa empewo; era ngʼenfuufu ekunta nga yeetooloola, enkuba ngʼeneetera okutonnya.

¹⁴Entiisa eyʼamaanyi eribagwako akawungeezi. Buliba tebunnakya ngʼabalabe bonna tewakyali. Guno gwe mugabo gwʼabo abatunyaga, era yʼempeera yʼabo abatunyagako ebyaffe.