Isaaya 19:1-25 LGCB2014 - Bible AI

¹ⓔ Laba, Mukama yeebagadde ku kire ekidduka ennyo nʼajja mu Misiri. Ne bakatonda bʼe Misiri balijugumira mu maaso ge, nʼemitima gyʼAbamisiri girisaanuukira munda mu bo.

²Era ndiyimusa Abamisiri okulwana nʼAbamisiri, balwane buli muntu ne muganda we, na buli muntu ne muliraanwa we; ekibuga nʼekibuga, obwakabaka nʼobwakabaka.

³Abamisiri baliggwaamu omwoyo era entegeka zaabwe zonna ndizitta; era baliragulwa ebifaananyi ebibajje, nʼabasamize, nʼabaliko emizimu nʼabalogo.

⁴Era ndigabula Abamisiri mu mukono gwʼomufuzi omukambwe, era kabaka owʼentiisa alibafuga,[18] bwʼayogera Mukama, Mukama Katonda owʼEggye.

⁵Omugga gulikalira nʼentobo yʼomugga ekale ejjemu enjatika.

⁶Nʼemikutu giriwunya ekivundu, nʼemyala egiyiwa mu mugga omunene nagyo gikale; ebitoogo nʼessaalu nabyo biwotoke.

⁷Ebimera ebiri ku Kiyira, ku lubalama lwa Kiyira kwennyini, ne byonna ebyasimbibwa ku Kiyira, birikala, birifuumuulibwa ne biggweerawo ddala.

⁸Era nʼabavubi balisinda ne bakungubaga, nʼabo bonna abasuula amalobo mu Kiyira balijjula ennaku, abatega obutimba baliggweeramu ddala amaanyi.

⁹Era nate nʼabo abakozesa obugoogwa obusunsule balinafuwa, nʼabo abaluka engoye enjeru mu linena nabo bakeŋŋentererwe.

¹⁰Abakozi balikwatibwa ennaku, bonna abakolera empeera ne baggwaamu omwoyo.

¹¹Abakulu abʼe Zowani basiruwalidde ddala, nʼabagezigezi ba Falaawo bye boogera tebiriimu nsa. Mugamba mutya Falaawo nti, “Ndi mwana wʼabagezi, omwana wa bassekabaka abʼedda”?

¹²Kale nno abasajja bo abʼamagezi bali ludda wa? Leka bakubuulire bakutegeeze Mukama Katonda owʼEggye kyʼategese okutuusa ku Misiri.

¹³Abakungu abʼe Zowani basiriwadde, abakungu abʼe Noofu balimbiddwa, abo ababadde ejjinja eryʼoku nsonda eryʼebika byʼeggwanga bakyamizza Misiri.

¹⁴Mukama abataddemu omwoyo omubambaavu era baleetedde Misiri okutabukatabuka mu byonna byʼekola, ngʼomutamiivu atagalira mu bisesemye bye.

¹⁵Tewali mukulembeze newaakubadde afugibwa, agasa ennyo oba agasa ekitono mu Misiri alibaako kyʼakola.

¹⁶Ku lunaku luli Abamisiri balibeera ngʼabakazi. Balikankana nʼentiisa olwʼomukono gwa Mukama Katonda owʼEggye ogugoloddwa gye bali.

¹⁷Nʼensi ya Yuda erifuuka ntiisa eri Misiri, buli muntu anagibuulirwangako anatyanga, olwʼokuteesa kwa Mukama Katonda owʼEggye kwʼateesa ku yo.

¹⁸Ku lunaku olwo walibaawo ebibuga bitaano mu nsi yʼe Misiri ebyogera olulimi lwa Kanani, era birirayira okwekwata ku Mukama Katonda owʼEggye. Ekimu kiriyitibwa Ekibuga Ekyokuzikirira.

¹⁹Ku olwo waliteekebwawo ekyoto kya Mukama wakati mu nsi yʼe Misiri, era nʼekijjukizo kya Mukama Katonda kiteekebwe ku nsalo.

²⁰Kaliba kabonero era bujulizi eri Mukama Katonda owʼEggye mu nsi yʼe Misiri. Kubanga balikoowoola Mukama nga balumbiddwa, naye alibaweereza omulokozi, era abalwanirira, era alibalokola.

²¹Noolwekyo Mukama alimanyibwa mu Misiri, nʼAbamisiri balimanya Mukama era bamusinze ne ssaddaaka, nʼebirabo era balyeyama obweyamo eri Mukama ne babutuukiriza.

²²Era Mukama alibonereza Misiri, ngʼakuba, ate ngʼawonya. Nabo balidda gyʼali, balimwegayirira era alibawonya.

²³Ku olwo walibaawo oluguudo olugazi oluva mu Misiri olugenda mu Bwasuli, nʼOmwasuli alijja mu Misiri, nʼOmumisiri nʼagenda mu Bwasuli; nʼAbamisiri balisinziza wamu nʼAbaasuli.

²⁴Ku olwo Isirayiri eriba yakusatu wamu ne Misiri nʼObwasuli, baliweesa ensi omukisa.

²⁵Kubanga Mukama Katonda owʼEggye abawadde omukisa, ngʼayogera nti, “Baweebwe omukisa Misiri abantu bange, nʼObwasuli omulimu gwʼemikono gyange, ne Isirayiri obusika bwange.”