Isaaya 2:1-22 LGCB2014 - Bible AI

¹Kuno kwe kwolesebwa Isaaya omwana wa Amozi kwe yalaba ku Yuda ne Yerusaalemi.

²ⓓ Olulituuka mu nnaku ezʼoluvannyuma olusozi okuli ennyumba ya Mukama Katonda lulinywezebwa lusinge ensozi zonna okugulumira, luliyimusibwa lusukke ku ndala zonna, era amawanga gonna galilwolekera.

³Abantu bangi balijja bagambe nti, Mujje twambuke tulinnye ku lusozi lwa Mukama, mu nnyumba ya Katonda wa Yakobo, alyoke atuyigirize amakubo ge, tulyoke tutambulire mu mateeka ge. Kubanga Mukama aliteeka amateeka ngʼasinziira mu Sayuuni, era mu Yerusaalemi abayigirize ekigambo kye.

⁴ⓔ Alisala enkaayana zʼamawanga, aliramula emisango gyʼabantu bangi, era ebitala byabwe balibiwesaamu enkumbi, nʼamafumu gaabwe bagaweeseemu ebiwabyo. Eggwanga teririyimusa kitala ku ggwanga linnaalyo, so tebalyetegeka kulwana ntalo nate.

⁴

⁵Ggwe ennyumba ya Yakobo, mujje tutambulire mu kitangaala kya Mukama Katonda.

⁶Wayabulira abantu bo abʼennyumba ya Yakobo, kubanga eggwanga lijjudde obusamize obuva mu buvanjuba, nʼobulaguzi obuli nga obwʼomu Bafirisuuti, era basizza kimu ne bannamawanga.

⁷Ensi yaabwe ejjudde effeeza ne zaabu, nʼobugagga bwabwe tebuliiko kkomo: ensi yaabwe ejjudde embalaasi, era erimu nʼamagaali gʼembalaasi mangi nnyo.

⁸Ensi yaabwe ejjudde bakatonda ababumbe, basinza omulimu gwʼemikono gyabwe bo, engalo zaabwe gwe zeekolera.

⁹Kale omuntu wa kukkakkanyizibwa, omuntu wa kussibwa wansi. Mukama, tobasonyiwa!

⁹

¹⁰ⓕ Mugende mwekweke mu njazi, mwekweke mu binnya wansi mu ttaka, nga mudduka entiisa ya Mukama Katonda, nga mudduka entiisa yʼekitiibwa kyʼobukulu bwe.

¹¹Olunaku lujja okweyisa kwʼomuntu nʼamalala ge lwe birizikirizibwa, era Mukama Katonda yekka yaligulumizibwa ku olwo.

¹¹

¹²Kubanga Mukama Katonda owʼEggye alina olunaku lwʼategese eri abo bonna abʼamalala era abeewanise, eri ebyo byonna ebyʼegulumiza ebijjudde okwemanya nʼokwewulira.

¹³Alizikiriza emiti gyʼomu Lebanooni,[3] emiwanvu emigulumivu, nʼemivule gyonna egya Basani.

¹⁴Era nʼensozi zonna empanvu, nʼobusozi bwonna obugulumivu.

¹⁵Na buli mulongooti gwonna omuwanvu, na buli bbugwe gwe bakomese.

¹⁶Alizikiriza emmeeri zonna ezʼe Talusiisi, nʼebifaananyi byonna ebisiige ebyʼomuwendo omungi.

¹⁷Era okwegulumiza kwʼabantu kulijemulukuka, nʼamalala gʼabantu galissibwa; era Mukama Katonda yekka yaligulumizibwa ku lunaku olwo.

¹⁸Nʼebifaananyi bye basinza birizikiririzibwa ddala ku olwo.

¹⁸

¹⁹Abantu balidduka ne beekweka mu mpuku mu mayinja, ne mu binnya mu ttaka, nga badduka entiisa nʼekitiibwa kyʼobukulu bwa Mukama Katonda, bwaliyimuka okukankanya ensi nʼamaanyi.

²⁰Ku lunaku olwo abantu balisuulira ddala bakatonda baabwe abakole mu ffeeza, nʼabakole mu zaabu, be beekolera nga ba kusinzanga, ne babakanyuga eri emmese nʼeri ebinyira.

²¹Balidduka ne beekukuma mu mpuku ezʼamayinja amaatifu nga badduka entiisa nʼekitiibwa kyʼobukulu bwa Mukama Katonda, bwaliyimuka okukankanya ensi.

²¹

²²Mulekeraawo okwesiga omuntu alina omukka obukka mu nnyindo ze. Kiki ennyo kyali?