Isaaya 21:1-17 LGCB2014 - Bible AI

¹Obunnabbi obukwata ku Ddungu eririraanye ennyanja: Ngʼembuyaga bwe zikunta nga ziyita mu nsi eyʼobukiikaddyo, bwʼatyo alumba bwʼava mu ddungu eririraanye ensi etiisa.

²Nfunye okwolesebwa okwʼentiisa: alyamu olukwe akola omulimu gwe, nʼomunyazi anyaga. Eramu, lumba! Obumeedi zingiza! Ndikomya okusinda kwonna kwe yaleeta.

³Omubiri gwange kyeguvudde gulumwa, nʼobulumi bunkwata, ngʼomukazi alumwa okuzaala; nnyiize olwʼebyo bye mpulira, bye ndaba bimazeemu amaanyi.

⁴Omutima gwange gutya, Entiisa endetera okukankana; Akasendabazaana ke nnali njayaanira, kanfukidde ekikankano.

⁵Bateekateeka olujjuliro, bayalirira ebiwempe, ne balya, ne banywa! Mugolokoke mmwe abakulembeze, musiige engabo amafuta.

⁶Kino Mukama kyʼaŋŋamba nti, “Genda ofune omukuumi akuleetere amawulire ku ebyo byʼalaba.

⁷Bwʼalaba amagaali nʼebibinja byʼembalaasi, nʼabeebagazi ku ndogoyi oba abeebagazi ku ŋŋamira yeekuume, era yeegendereze.”

⁸Awo omukuumi nʼayogera mu ddoboozi eryʼomwanguka ngʼagamba nti, “Mukama wange, buli lunaku nnyimirira ku munaala, buli kiro mbeera ku mulimu gwange.

⁹ⓖ Laba omusajja wuuno ajjira mu ggaali, ngʼalina nʼekibinja kyʼembalaasi. Era ayanukula bwʼati nti, ‘Babulooni kigudde, weewaawo kigudde. Ebifaananyi bya bakatonda baakyo byonna bibetenteddwa wansi ku ttaka.’ ”

¹⁰Abantu bange, abasesebbuddwa ku gguuliro, mbategeeza kyempulidde okuva eri Mukama Katonda owʼEggye, Katonda wa Isirayiri.

¹¹Obunnabbi obukwata ku Duuma: Waliwo ankowoola okuva mu Seyiri ngʼayogera nti, “Omukuumi, bunaakya ddi? Omukuumi, bunaakya ddi?”

¹²Omukuumi ayanukula bwʼati nti, “Bulikya, era buliziba. Bwʼobaako ne kyʼobuuza kibuuze okomewo nate.”

¹³Obunnabbi obukwata ku Buwalabu: Mmwe Abadedeni abatambulira mu bibinja, abasiisira mu bisaka bya Buwalabu,

¹⁴muleetere abalumwa ennyonta amazzi; mmwe ababeera mu Teema, muleetere abanoonyi bʼobubudamu emmere.

¹⁵Badduka ekitala, badduka ekitala ekisowole, badduka omutego ogunaanuddwa, badduka nʼakabi kʼentalo.

¹⁶ⓗ Bwʼati Mukama bwʼaŋŋamba nti, “Mu mwaka gumu, ngʼendagaano gye bakolera omukozi bwʼeba, ekitiibwa kyonna ekya Kedali kirikoma.

¹⁷Ku bʼobusaale abaliwona, ne ku basajja abalwanyi abazira abʼe Kedali, walisigalawo batono.” Mukama Katonda wa Isirayiri ayogedde.