Isaaya 22:1-25 LGCB2014 - Bible AI

¹Obunnabbi obukwata ku Kiwonvu kyʼOkwolesebwa: Kiki ekikutawanya kaakano, nʼokulinnya nʼolinnya waggulu ku busolya,

²ggwe ekibuga ekijjudde oluyoogaano, ggwe ekibuga ekyʼamasanyu era ekyʼebinyumu? Abantu bo abattibwa, tebaafa kitala newaakubadde okufiira mu lutalo.

³Abakulembeze bo bonna baddukidde wamu; bawambiddwa awatali kulwana. kubanga badduka.

³Bonna baakwatibwa ne batwalibwa wamu nga basibe,

⁴Kyenava njogera nti, “Munveeko, mundeke nkaabire ddala nnyo. Temugezaako kunsaasira olwʼokuzikirizibwa kwʼomuwala wʼabantu bange.”

⁵Mukama, Mukama Katonda owʼEggye alina olunaku olwʼakatabanguko, olwʼokulinyirirwa nʼentiisa mu Kiwonvu kyʼOkwolesebwa; olunaku olwʼokumenya bbugwe, nʼokukaabirira ensozi.

⁶Eramu ayambalidde omufuko gwʼobusaale, nʼatwala nʼabavuzi bʼamagaali ge nʼembalaasi, Kiri[19] asabuukulula engabo.

⁷Ebiwonvu byo ebisinga obulungi bijjudde amagaali, nʼabeebagala embalaasi bassibbwa ku wankaaki;

⁸okwerinda kwa Yuda kuggyiddwawo.

⁸Ku lunaku olwo watunuulira ebyokulwanyisa ebyʼomu Lubiri olwʼEkibira;

⁹walaba amabanga agaali mu kwerinda kwʼEkibuga kya Dawudi, wakuŋŋaanya amazzi mu Kidiba ekyʼEmmanga.

¹⁰Wabala ebizimbe mu Yerusaalemi nʼomenya amayumba okusobola okunyweza bbugwe.

¹¹Wasima ekidiba omuterekebwa amazzi wakati wʼebisenge ebibiri, nʼokuŋŋaanya agʼekidiba ekikadde, naye tewatunuulira Oyo eyakisima, wadde okussaamu ekitiibwa Oyo eyakiteekateeka mu biro ebyʼedda.

¹²Ku lunaku olwo Mukama Katonda owʼEggye yalangirira okukaaba nʼokukuba ebiwoobe, nʼokwemwako enviiri nʼokwambala ebibukutu.

¹³ⓘ Naye laba, ssanyu na kujaguza, okubaaga ente nʼokutta endiga, okulya ennyama nʼokunywa wayini. Mwogere nti, “Leka tulye, era tunywe kubanga enkya tunaafa.”

¹⁴Mukama owʼEggye akimbikulidde nʼaŋŋamba nti, “Ekibi kino tekirisonyiyibwa wadde okuggyibwawo okutuusa lwʼolifa,” bwʼayogera Mukama Katonda owʼEggye.

¹⁵Bwʼati bwʼayogera Mukama Katonda owʼEggye nti, “Genda eri omuwanika oyo, eri Sabuna avunaanyizibwa olubiri omugambe nti,

¹⁶Okola ki wano era ani yakuwadde olukusa okwetemera entaana wano, nʼotema nʼamaanyi entaana yo waggulu mu lwazi, ne weerongoosereza eyo ekifo ekyʼokuwummuliramu?

¹⁶

¹⁷“Weegendereze Mukama Katonda anaatera okukuvumbagira, akuggyewo ggwe omusajja owʼamaanyi.

¹⁸Alikuzingazingako, nʼakukanyuga mu nsi engazi, nga bwe yandikanyuze omupiira ogusambwa. Eyo gyʼolifiira, era eyo amagaali go agʼekitiibwa gye galisigala, ggwe ensonyi ezʼennyumba ya Mukama wo.

¹⁹Ndikuggya ku ntebe yo, era oliggyibwa mu kifo kyo.

²⁰“Mu biro ebyo nditumya omuweereza wange Eriyakimu mutabani wa Kirukiya.

²¹Ndimwambaza ekyambalo kyo, ne munyweza nʼolukoba lwo, ne mukwasa obuyinza bwo. Aliba kitaawe wʼabo ababeera mu Yerusaalemi, nʼeri ennyumba ya Yuda.

²²ⓙ Ndimukwasa ekisumuluzo kyʼennyumba ya Dawudi; bwʼaliggulawo tewaliba aggalawo, bwʼaliggalawo tewaliba aggulawo.

²³Ndimunyweza mu kifo ngʼenkondo ennene, era aliba ntebe ya kitiibwa eri ennyumba ya kitaawe.

²⁴Ekitiibwa kyʼennyumba ye kiribeera ku nnyumba ye, ne ku zadde lye ne ku nda ye yonna, ne ku bintu bye ebinywerwamu, okuva ku bibya okutuuka ku nsumbi.”

²⁵Bwʼati bwʼayogera Katonda owʼEggye nti, “Ku lunaku olwo, enkondo ennene eyakomererwa mu kifo nʼenywera erisalibwa, nʼeneguka, nʼegwa, nʼomugugu gwʼekutte gulisarwako.” Mukama ayogedde.