Isaaya 23:1-18 LGCB2014 - Bible AI

¹ⓚ Obunnabbi obukwata ku Tuulo: Mukube ebiwoobe, mmwe ebyombo byʼe Talusiisi, kubanga Tuulo kizikirizibbwa ne mutasigala nnyumba newaakubadde ebyombo we biyinza okugobera. Ekigambo kyababikulirwa okuva mu nsi ya Kittimu.

²Musirike mmwe abʼoku kizinga nammwe abasuubuzi bʼe Sidoni abagaggawalidde ku nnyanja.

³Ku nnyanja ennene kwajjirako ensigo za Sikoli, nʼebyamakungula bya Kiyira bye byali amagoba ga Tuulo, era yafuuka akatale kʼamawanga.

⁴Okwatibwe ensonyi ggwe Sidoni naawe ggwe ekigo kyʼennyanja, kubanga ennyanja eyogedde nti,

⁴“Sirumwangako kuzaala wadde okuzaalako. Sirabiriranga baana babulenzi newaakubadde okukuza abaana aboobuwala.”

⁵Ekigambo bwe kirijja eri Misiri, balinakuwalira ebigambo ebiva e Tuulo.

⁶Muwunguke mugende e Talusiisi, mukube ebiwoobe mmwe abantu abʼoku kizinga.

⁷Kino kye kibuga kyammwe ekyʼamasanyu, ekibuga ekikadde, ekyagenda okusenga mu nsi eyeewala?

⁸Ani eyateekateeka kino okutuuka ku Tuulo, Tuulo ekitikkira engule, ekibuga ekirina abasuubuzi abalangira, ekirina abasuubuzi abamanyifu mu nsi?

⁹Mukama Katonda owʼEggye yakiteekateeka, amuggyemu amalala nʼekitiibwa kyonna, akkakkanye nʼabo bonna abamanyifu ku nsi.

¹⁰Ne bwʼotambula ku lukalu lwonna olwʼomugga Kiyira, tokyalina kifo ebyombo we bituukira ggwe muwala wa Talusiisi.

¹¹Mukama Katonda agolodde omukono gwe eri ennyanja, nʼakankanya obwakabaka bwayo. Awadde ekiragiro ekikwata ku Kanani nti ebigo byakyo birizikirizibwa.

¹²Yayogera nti, “Tokyaddayo kukola bya masanyu nate, ggwe muwala wa Sidoni embeerera obetenteddwa. Yambuka osomoke ogende e Kittimu, naye nayo tolifunirayo kuwummula.”

¹³Laba ensi eyʼAbakaludaaya abantu abo abatakyaliwo. Omwasuli agifudde ekifo ekibeeramu ensolo ezʼomu ddungu. Baayimusa eminaala gyabwe, ne bamenya ebigo byabwe, era nʼabazikiriza.

¹⁴Mukube ebiwoobe mmwe ebyombo byʼe Talusiisi, ekigo kyo kizikiriziddwa.

¹⁵Mu biro ebyo Tuulo kiryerabirwa okumala emyaka nsanvu, gyʼemyaka kabaka gyʼawangaala. Naye oluvannyuma lwʼemyaka egyo ensanvu, ekirituuka ku Tuulo kiriba ngʼekiri mu luyimba olwʼomwenzi.

¹⁶“Kwata ennanga, otambulire mu kibuga, ggwe omwenzi eyeerabiddwa. Ennanga gikube bulungi, oyimbe ennyimba nnyingi olyoke ojjukirwe.”

¹⁷Oluvannyuma lwʼemyaka ensanvu, Mukama alikyalira Tuulo. Aliddayo ku mulimu gwe ogwʼobwʼamalaaya, era alibukola mu bwakabaka bwonna obuli ku nsi.

¹⁸Wabula amagoba ge ne byalifunamu biriyawulibwako bibe bya Mukama, tebiriterekebwa newaakubadde okukwekebwa, omuntu okubikozesa byʼayagala. Amagoba ge galigenda eri abo ababeera mu maaso ga Mukama, basobole okuba nʼemmere emala, nʼokuba nʼebyambalo ebirungi.