Isaaya 24:1-23 LGCB2014 - Bible AI

¹Laba Mukama alifuula ensi amatongo, agimalirewo ddala, era azikirize nʼobwenyi bwayo era asaasaanye nʼabagibeeramu.

²Bwe kityo bwe kiriba, ekiriba ku kabona kye kiriba ne ku bantu, ekiriba ku mwami kye kiriba ne ku muweereza omusajja, ekiriba ku mugole we kye kiriba ne ku muweereza we omukazi, ekiriba ku atunda kye kiriba ne ku muguzi, ekiriba ku awola kye kiriba ne ku yeewola, ekiriba ku abanja kye kiriba ne ku abanjibwa.

³Okumalibwamu ensa, ensi erimalibwamu ddala ensa, nʼokunyagibwa, erinyagibwa.

³Mukama Katonda yʼakyogedde.

⁴Ensi ekala nʼeggwaamu obulamu, ensi ekala nʼewuubaala, abantu abʼekitiibwa baggwaamu amaanyi.

⁵Ensi eyonooneddwa abantu baayo, bajeemedde amateeka, bamenye ebiragiro, ne bamenyawo nʼendagaano eyʼemirembe nʼemirembe.

⁶ⓛ Noolwekyo ekikolimo kimalawo ensi; nʼabantu baayo bateekwa okusasula olwʼomusango ogwabasinga. Abatuuze bʼensi bayidde, Era abatono be basigaddewo.

⁷Wayini omusu aggwaamu, nʼomuzabbibu gukala, abʼamasanyu bonna bakaaba olwʼobulumi.

⁸Okujaguza kwʼebitaasa kusirise, nʼoluyoogaano lwʼabo ababeera mu masanyu lusirise, entongooli esanyusa esirise.

⁹Tebakyanywa wayini nga bwe bayimba, nʼomwenge gukaayira abagunywa.

¹⁰Ekibuga ekyazikirizibwa kisigadde nga matongo, na buli mulyango oguyingira mu nnyumba guzibiddwa.

¹¹ⓜ Bakaabira wayini mu nguudo, nʼessanyu lyonna liweddewo, nʼokujaguza kwonna tekukyaliwo mu nsi.

¹²Ekibuga kizikiridde wankaaki waakyo amenyeddwamenyeddwa.

¹³Bwe kityo bwe kiriba ku nsi ne mu mawanga ngʼomuzeyituuni bwe gunyeenyezebwa oba ngʼebinywa ebisigaddewo bwe bibeera oluvannyuma lwʼokukungula kwʼezabbibu.

¹⁴Bayimusa amaloboozi gaabwe, baleekaana olwʼessanyu, batendereza ekitiibwa kya Mukama Katonda okuva mu bugwanjuba.

¹⁵Noolwekyo abo abali mu buvanjuba mugulumize Mukama, mutendereze erinnya lya Mukama Katonda wa Isirayiri, mu bizinga ebyʼennyanja.

¹⁶Tuwulira okuyimba okuva ku nkomerero yʼensi, “Ekitiibwa kibeere eri Omutuukirivu.”

¹⁶Naye ne njogera nti, “Nsanawo, nsanawo. Zinsaze. Abʼolukwe balya mu bannaabwe olukwe, Abʼenkwe bakozesa enkwe okulya mu bannaabwe olukwe.”

¹⁷Entiisa nʼobunnya nʼomutego bibalindiridde, mmwe abantu bʼensi.

¹⁸Buli alidduka eddoboozi eryʼentiisa, aligwa mu kinnya, na buli alirinnya nʼava mu kinnya alikwatibwa mu mutego. Enzigi zʼeggulu ziguddwawo, Nʼemisingi gyʼensi gikankana.

¹⁹Ensi emenyeddwamenyeddwa, ensi eyawuliddwamu, ensi ekankanira ddala.

²⁰Ensi etagala ngʼomutamiivu, eyuugayuuga ngʼakasiisira bwe kayuugayuuga mu kibuyaga, omusango gwe gumulumiriza nnyo olwʼobujeemu bwe, era ensi egwa nʼetaddamu kuyimuka.

²¹Ku lunaku olwo Mukama Katonda alibonereza abʼamaanyi abali waggulu mu bwengula, ne bakabaka abali wansi ku nsi.

²²Balikuŋŋaanyirizibwa wamu ngʼabasibe bwe bakuŋŋanyirizibwa mu kkomera, era baliweebwa ekibonerezo ekyʼokuggalirwa mu kkomera ennaku ennyingi.

²³Omwezi gulitabulwatabulwa, nʼenjuba eriswazibwa; Mukama Katonda owʼEggye alifugira mu kitiibwa ku Lusozi Sayuuni ne mu Yerusaalemi, ne mu maaso gʼabakadde.