Isaaya 27:1-13 LGCB2014 - Bible AI

¹ⓢ Mu biro ebyo, Mukama Katonda alibonereza nʼekitala kye, ekitala kye ekyʼamaanyi, ekikambwe era ekinene, alibonereza Lukwata omusota ogwekulungula, Lukwata omusota ogwezinga, atte nʼogusota gwʼennyanja.

²Mu biro ebyo “Yimba oluyimba ku bibala ebyʼennimiro eyʼemizabbibu ebaze ebibala.

³Nze Mukama Katonda, ennimiro nze ngirabirira era nze ngifukirira buli kiseera. Ngikuuma emisana nʼekiro Waleme kubaawo nʼomu agikola akabi.

⁴Siri munyiivu. Singa katazamiti nʼamaggwa binnumba, nandibitabadde mu lutalo? Byonna nandibyokezza omuliro.

⁵Oba si weewaawo ajje gye ndi afune obuddukiro, tutabagane, weewaawo tutabagane.”

⁶Mu biro ebijja Yakobo alisimba emirandira, Isirayiri aliroka nʼamulisa nʼajjuza ensi yonna ebibala.

⁶

⁷Mukama amukubye omuggo ngʼakuba abo abaamukuba? Attiddwa nga be yatta, bwe battibwa?

⁸Olwanagana naye nʼomusobola, nʼomuwaŋŋangusa, omugoba nʼokuwuuma okwʼamaanyi, ngʼembuyaga eyʼebuvanjuba bwʼefuuwa ku lunaku lwayo.

⁹Ekyo kye kiriggyawo omusango gwa Yakobo, era ekyo kye kiriba ekibala ekijjuvu ekiriggyawo ekibi kye. Bwʼaliddira amayinja gonna agʼekyoto okuba amayinja agʼennoni agayasiddwayasiddwa, tewaliba Baasera newaakubadde ebyoto ebyʼokwoterezaako obubaane ebirisigala biyimiridde.

¹⁰Ddala ddala ekibuga ekyaliko enkomera kaakano matongo, ekirekeddwa awo ngʼeddungu. Eyo ennyana gyʼeriira era gyʼegalamira, nʼerya amalagala gonna ku matabi gaago.

¹¹Amatabi gaakyo bwe gakala, gamenyebwako, abakazi ne bagakuŋŋaanya ne bagakumisa omuliro. Bano bantu abatategeera, eyamukola tamusaasira, nʼeyamutonda tamukwatirwa kisa.

¹²Mu biro ebyo Mukama alikusengejja okuva mu mazzi agakulukuta agʼOmugga Fulaati okutuuka ku mugga gwʼe Misiri we guyiwa, era mmwe abaana ba Isirayiri mulikuŋŋaanyizibwa kinnoomu.

¹³Era mu biro ebyo ekkondeere eddene lirivuga, nʼabo abaali boolekedde okuzikiririra mu nsi yʼe Bwasuli, nʼabo abaali baawaŋŋangusizibbwa mu Misiri balikomawo ne basinza Mukama ku lusozi olutukuvu e Yerusaalemi.