Isaaya 30:1-33 LGCB2014 - Bible AI

¹“Zibasanze abaana abajeemu, Abakola enteekateeka ezitali zange ne bazituukiriza ne batta omukago[22] awatali Mwoyo wange ne bongera ekibi ku kibi,” bwʼayogera Mukama.

²“Baserengeta e Misiri nga tebanneebuuzizzaako, ne banoonya obuyambi ewa Falaawo, nʼokuva eri ekisiikirize kya Misiri okuba obuddukiro.

³Naye obukuumi bwa Falaawo buliswazibwa, nʼekisiikirize kya Misiri kirikuswaza.

⁴ⓐ Newaakubadde nga balina abakungu mu Zowani nʼababaka baabwe batuuse e Kanesi,

⁵buli muntu aliswazibwa olwʼeggwanga eritabagasa, abataleeta buyambi newaakubadde okuba abʼomugaso, okuggyako ensonyi nʼekivume,” bwʼayogera Mukama.

⁶Obunnabbi obukwata ku nsolo za Negevu bwe buno: Ababaka bayita mu nsi nga balaba ennaku ne batawaanyizibwa mu nsi erimu empologoma ensajja nʼenkazi, erimu essalambwa nʼomusota ogwʼobusagwa nga batadde ebyʼobugagga byabwe ku ndogoyi, nʼebintu byabwe ebyʼomuwendo ku mabango gʼeŋŋamira nga boolekedde ensi etaliimu magoba.

⁷Bagenda e Misiri, eterina kyeyinza kubayamba nʼakatono. Kyenva muyita Lakabu ataliiko kyayinza kukola.

⁸ⓑ Genda kaakano, okibawandiikire ku kipande, okiwandiike ku mizingo, kibabeererenga obujulizi obwʼemirembe nʼemirembe mu nnaku ezigenda okujja.

⁹Weewaawo bano bantu bajeemu, baana balimba, baana abateetegese kuwulira biragiro bya Mukama.

¹⁰Bagamba abalabi nti, “Temuddayo kufuna kwolesebwa,” Nʼeri bannabbi boogera nti, “Temuddayo kututegeeza kwolesebwa kutuufu. Mututegeeze ebitusanyusa, mulagule ebituwabya.

¹¹Muve mu kkubo lino, mukyame muve ku luguudo luno, mulekeraawo okututegeeza ku Mutukuvu wa Isirayiri.”

¹²Noolwekyo bwʼati bwʼayogera Omutukuvu wa Isirayiri nti, “Olwʼokugaana obubaka buno, ne mwesiga okunyigirizibwa, ne mwesiga omulimba,

¹³ekibi kino kyekiriva kikufuukira bbugwe omuwanvu, alimu enjatika era azimbye, okutemya nʼokuzibula ngʼagudde.

¹⁴ⓒ Alimenyekamenyeka mu bitundutundu ngʼensumbi eyakolebwa mu bbumba, nʼasaasaanyizibwa awatali kusaasira, era tewaliba luggyo ku byamenyekamenyeka olulirabika okusobola okuyoozesa omuliro mu kyoto, oba okusenyesa amazzi mu kinnya.”

¹⁵Weewaawo bwʼati bwʼayogera Mukama Ayinzabyonna Omutukuvu wa Isirayiri nti, “Mu kwenenya ne mu kuwummula mwe muli obulokozi bwammwe, mu kusiriikirira ne mu kwesiga mwe muli amaanyi gammwe, naye temufuddeeyo.

¹⁶Wayogera nti, ‘Nedda tuliddukira ku mbalaasi.’ Kyoliva odduka. Wayogera nti, ‘Tuliddukira ku mbalaasi ezidduka ennyo.’ Ababagoba kyebaliva bawenyuka emisinde.

¹⁷Abantu olukumi balidduka olwʼokutiisibwatiisibwa kwʼomuntu omu; Olwʼokutiisibwatiisibwa kwʼabataano, olidduka, Okutuusa lwʼolisigala ngʼomulongooti okuwanikibwa bbendera oguli ku ntikko yʼolusozi, ngʼebendera eri ku kasozi.”

¹⁸Songa Mukama ayagala nnyo okuba owʼekisa gyʼoli; era agolokoka okukulaga okusaasira. Kubanga Mukama Katonda wa bwenkanya, balina omukisa bonna abamulindirira.

¹⁹Mmwe abantu ba Sayuuni ababeera mu Yerusaalemi, temuliddayo kukaaba. Alikukwatirwa ekisa bwʼolimukaabira ngʼomusaba akuyambe. Amangwago ngʼawulidde, alikwanukula.

²⁰Newaakubadde nga Mukama akuwa omugaati ogwʼokulaba ennaku, nʼamazzi agʼokubonaabona,[23] abasomesa bo tebaliddamu kukwekebwa, era olibalaba nʼamaaso go.

²¹Bwʼolidda ku mukono ogwa ddyo oba ku gwa kkono, amatu go galiwulira eddoboozi emabega wo nga ligamba nti, “Lino lyʼekkubo, litambuliremu.”

²²Olwo olyonoonayonoona ebintu ebyakolebwa nʼemikono ebiriko ffeeza, nʼebifaananyi byo ebyabikkibwako zaabu, era olibisuula nga bwʼosuula ekiwero ekikozesebwa mu nsonga za bakyala era olibigamba nti, “Muveewo.”

²³Alibaweereza nʼenkuba olwʼensigo zʼosiga mu ttaka, nʼemmere eva mu ttaka eggimu nga nnyingi. Mu biro ebyo ente zo ziririira mu ddundiro eggazi.

²⁴Ente nʼendogoyi ezirima ettaka zirirya omuddo ogwaterekebwa nʼemmere ensotte, eyawewebwa nʼekitiiyo ekyʼamannyo.

²⁵Mu biro ebyʼokuttibwa okunene, emirongooti bwe girigwa, emigga gyʼamazzi girikulukuta ku buli lusozi oluwanvu na ku buli kasozi akagulumivu.

²⁶ⓓ Omwezi gulyaka ngʼenjuba, nʼomusana gulyaka emirundi musanvu okusinga ogwa bulijjo, ngʼekitangaala kyʼennaku omusanvu zonna awamu, Mukama bwʼalinyiga ekinuubule kyʼabantu be, nʼawonya ekiwundu kyʼabaakosebwa.

²⁷Laba, erinnya lya Mukama liva wala nʼobusungu obubuubuuka nʼomukka ogukutte ngʼekire; emimwa gye gijjudde ekiruyi, nʼolulimi lwe muliro ogusaanyaawo.

²⁸Omukka gwe guli ngʼomugga gwʼamazzi agakulukuta nʼamaanyi, agabimba okutuuka mu bulago. Anyeenyanyeenya amawanga mu kakuŋŋunta akʼokuzikirizibwa era mu mba zʼabantu ateekamu eddobo eryʼokubawabya.

²⁹Oluyimba luliba ngʼolwo lwoyimba mu kiro ngʼojaguza ku mbaga entukuvu; omutima gwo gulijaguza ngʼabantu bwe bajaguza nga bafuuwa endere ku lusozi lwa Mukama, ku lwazi lwa Isirayiri.

³⁰Mukama aliyamba abantu okuwulira eddoboozi lye eryʼekitiibwa, alibaleetera okulaba omukono gwe nga gukka mu busungu obungi ennyo ne mu muliro ogusaanyaawo, ne mu bire ebibwatuka, ne mu muzira.

³¹Weewaawo eddoboozi lya Mukama lirisesebbula Bwasuli, alibakuba nʼomuggo gwe ogwʼobwakabaka.

³²Buli muggo Mukama gwʼanakukubanga nʼoluga lwe olubonereza, guliba ngʼebivuga byʼebitaasa nʼentongooli, ngʼabalwanyisa nʼomukono gwe mu ntalo.

³³Weewaawo Tofesi amaze ebbanga ddene nga yeeteekateeka; kyʼateekebwateekebwa kabaka. Ekinnya kyakyo ekyʼomuliro kiwanvu era kigazi, kijjudde omuliro nʼenku; omukka gwa Mukama gugukoleeza ngʼomugga gwa salufa.