1ⓖ Laba, Kabaka alifuga mu butuukirivu, nʼabafuzi balifuga mu bwenkanya.
2Buli muntu aliba ngʼekifo ekyʼokwekwekamu empewo, ngʼekiddukiro okuva eri kibuyaga, ngʼemigga gyʼamazzi mu ddungu, ngʼekisiikirize ekyʼolwazi olunene mu nsi eyʼennyonta.
3Olwo amaaso gaabo abalaba tegaliziba, nʼamatu gʼabo abawulira galiwuliriza.
4Omutima gwʼabatali bagumiikiriza gulimanya era gulitegeera, nʼolulimi olwʼabanaanaagira lulitereera ne boogera bulungi.
5Omusirusiru taliddayo kuyitibwa wa kitiibwa, newaakubadde omuntu omwonoonyi okuteekebwamu ekitiibwa.
6Omusirusiru ayogera bya busirusiru, nʼomutima gwe gwemalira ku kukola ebitali bya butuukirivu. Akola ebyʼobutatya Katonda, era ayogera bya bulimba ku Mukama, nʼabayala abaleka tebalina kintu, nʼabalumwa ennyonta abamma amazzi.
7Empisa zʼomwonoonyi si za butuukirivu. Akola entegeka ezitali za butuukirivu, alyoke azikirize abaavu nʼebigambo ebyʼobulimba, ensonga yʼabali mu kwetaaga ne bwʼeba nga ntuufu.
8Naye omuntu owʼekitiibwa akola entegeka za kitiibwa, era ku bikolwa bye ebyʼekitiibwa kwʼanywerera.
9Mmwe abakazi abateefiirayo, mugolokoke muwulirize eddoboozi lyange; mmwe abawala abawulira nga muli wanywevu, muwulire bye ŋŋamba.
10Mu mwaka gumu oba nʼokusingawo, mmwe abawulira nga muli wanywevu, mulitya, amakungula gʼemizabbibu galifa, nʼamakungula gʼebibala tegalijja.
11Mutye mmwe abakazi abateefiirayo, mukankane mmwe abawala abawulira nga muli wanywevu. Muggyeko engoye zammwe, mwesibe ebibukutu mu biwato byammwe.
12Munakuwalire ennimiro ezaali zisanyusa, olwʼemizabbibu egyabalanga,
13nʼolwʼensi eyʼabantu bange, ensi eyamerangamu amaggwa ne katazamiti. Weewaawo mukaabire ennyumba zonna ezaali ezʼamasanyu, na kino ekibuga ekyali ekyʼamasanyu.
14Weewaawo ekigo kirirekebwawo, ekibuga ekirimu oluyoogaano kirifuuka kifulukwa. Ebigo nʼeminaala birifuuka ebitagasa ennaku zonna, ekifo ekisanyusa endogoyi, eddundiro lyʼebisibo,
15okutuusa Omwoyo lwʼalitufukibwako okuva waggulu, nʼeddungu ne lifuuka ennimiro engimu, nʼennimiro engimu nʼerabika ngʼekibira.
16Obwenkanya bulituula mu ddungu, nʼobutuukirivu bulibeera mu nnimiro engimu.
17Ekibala kyʼobutuukirivu kiriba mirembe, nʼekiriva mu butuukirivu kiriba kusiriikirira na bwesige emirembe gyonna.
18Abantu bange balibeera mu bifo ebyʼemirembe, mu maka amateefu mu bifo ebyʼokuwummuliramu ebitatawaanyizibwa.
19Omuzira ne bwe guligwa ne gukuba ekibira okukimalawo, nʼekibuga ne kiggirwawo ddala,
20ggwe oliraba omukisa, ngʼosiga ensigo yo ku migga gyonna, nʼente zo nʼendogoyi zo ne zirya nga zeeyagala.