Isaaya 34:1-17 LGCB2014 - Bible AI

¹Musembere mmwe amawanga muwulirize. Musseeyo omwoyo mmwe abantu. Ensi ewulirize, ne byonna ebigirimu, ensi ne byonna ebigivaamu.

²Mukama anyiigidde amawanga gonna, ekiruyi kye kiri ku magye gaabwe gonna. Alibazikiririza ddala, alibawaayo okuttibwa.

³Abantu baabwe abattibwa balisuulibwa ebweru, nʼemirambo gyabwe giriwunya, nʼensozi zirinnyikira omusaayi gwabwe.

⁴ⓙ Emmunyeenye zonna ezʼomu ggulu zirisaanuuka, nʼeggulu liryezingako ngʼomuzingo; nʼeggye eryʼomu ggulu lirigwa, ngʼebikoola ebiwotose ebiva ku muzabbibu, ngʼebirimba ebyayongobera ebiva ku mutiini.

⁵ⓚ Weewaawo ekitala kyange kinywedde ne kijjuzibwa mu ggulu, era laba, kikkira ku Edomu okusala omusango, abantu be mmaliddewo ddala.

⁶Ekitala kya Mukama kisaabye omusaayi, kiriko amasavu, omusaayi gwʼabaana bʼendiga nʼembuzi, amasavu agava mu nsingo za sseddume. Mukama alina ekiweebwayo mu Bozula, era waliyo nʼokuttibwa okwʼamaanyi mu Edomu.

⁷Embogo zirifiira wamu nazo, nʼobute obulume, ne ziseddume zirifiira wamu nazo. Ensi yaabwe erijjula omusaayi, nʼenfuufu erinnyikira amasavu.

⁷

⁸Mukama alina olunaku olwʼokuwalanirako eggwanga, omwaka ogwʼokwesasuza, olwʼensonga eya Sayuuni.

⁹Emigga gya Edomu girikalira ne gifuuka bulimbo,[24] nʼenfuufu ye erifuuka ngʼobuwunga bwa salufa ayokya. Ensi ye erifuuka ngʼobulimbo[25] obuggya omuliro.

¹⁰ⓛ Talizikizibwa emisana nʼekiro, nʼomukka gwe gulinyooka ennaku zonna. Edomu alisigala kifulukwa emirembe nʼemirembe, era tewaliba nʼomu ayita mu nsi eyo.

¹¹Ekiwuugulu ekyʼomu ddungu nʼekiwuugulu ekireekaana, birikibeeramu. Ekiwuugulu ekinene ne namuŋŋoona birizimbamu ebisu byabyo. Katonda aligololera ekipimo ekyʼokwewunika, nʼekipimo ekinaaleka Edomu nga njereere.

¹²Abakungu be tebalibaako kye bayita bwakabaka, nʼabalangira be bonna baliggwaawo.

¹³Amaggwa galimera ku minaala egyʼekibuga kye, nʼemyennyango nʼamatovu ne bimera mu bigo bye ebyanywezebwa. Aliyiggibwa ebibe, era ebiwuugulu birimufuula ekifo ekyʼokuwummulirangamu.

¹⁴Ensolo ezʼomu ddungu gye zirisisinkana empisi, nʼembuzi enkambwe ezʼomu nsiko gye ziriramusiganyiza. Era eyo ebisolo ebitambula ekiro nabyo biriwummula nga byefunidde ekifo ekyʼokuwummulirangamu.

¹⁵Ekiwuugulu kiribiikira eyo amagi, ne kigaalula, ne kirabirira abaana baakyo wansi wʼekisiikirize kyakyo. Era eyo ne kamunye gyʼalikuŋŋaanira, empanga nʼenseera.

¹⁶Tunula mu muzingo gwa Mukama osome. Tewali na kimu ku ebyo ekiribulayo, era ekirume kiriba nʼekikazi, nʼekikazi ne kiba nʼekirume. Akamwa ka Mukama ke kalagidde, era Omwoyo we yalibikuŋŋaanya.

¹⁷Agabira buli kimu omugabo gwakyo, era omukono gwe gubigabanyiza mu kigera. Birikibeeramu ennaku zonna, bibeere omwo emirembe nʼemirembe.