Isaaya 37:1-38 LGCB2014 - Bible AI

¹ⓡ Awo kabaka Keezeekiya bwe yabiwulira nʼayuza engoye ze nʼayambala ebibukutu nʼayingira mu nnyumba ya Mukama.

²Nʼatuma Eriyakimu eyali akulira olubiri ne Sebuna omuwandiisi ne bakabona abakulu, nga bambadde ebibukutu, eri nnabbi Isaaya mutabani wa Amozi.

³Ne bamugamba nti, “Keezeekiya atutumye okukugamba nti, Olunaku luno lunaku lwa kulabiramu nnaku era lwa kuvumirwamu era lwa kujoogebwa; kubanga abaana batuuse okuzaalibwa naye nga tewali maanyi ga kubazaala.

⁴Oboolyawo Mukama Katonda wo anaawulira ebigambo bya Labusake eyatumibwa kabaka wʼe Bwasuli mukama we okuvuma Katonda omulamu, Mukama Katonda wo nʼamunenya olwʼebigambo byʼawulidde: Kale waayo okusaba kwo wegayiririre ekitundu ekikyasigaddewo.”

⁵Abaddu ba kabaka Keezeekiya bwe bajja eri Isaaya,

⁶Isaaya nʼabagamba nti, “Mugambe mukama wammwe nti, ‘Bwʼati bwʼagamba Mukama nti, Ebigambo byʼowulidde abaddu ba kabaka wʼe Bwasuli bye banvumye tebikutiisa.

⁷Laba ndimusindikira omwoyo omubi, awulire olugambo addeyo mu nsi ye. Era eyo gye ndimuzikiririza afe ekitala.’ ”

⁸Awo Labusake omuduumizi wa Bwasuli bwe yaddayo, nʼasanga kabaka wʼe ngʼalwana ne Libuna: kubanga yawulira nti avudde e Lakisi.

⁹Ate era kabaka Sennakeribu nʼafuna obubaka nti Tiraaka kabaka wʼe Kuusi azze okumulwanyisa. Bwe yakiwulira nʼasindika ababaka eri Keezeekiya nʼobubaka buno nti,

¹⁰“Keezeekiya kabaka wa Yuda mumugambe nti, Katonda wo gwe weesiga takulimbanga ngʼayogera nti, ‘Yerusaalemi tekirigabulwa mu mukono gwa kabaka wʼe Bwasuli.’

¹¹Laba wawulira bakabaka bʼe Bwasuli kye baakola amawanga gonna, ne bagazikiririza ddala. Mwe munaawona?

¹²Amawanga bakitange ge baasaanyaawo, Gozani, ne Kalani, ne Lezefu nʼabantu ba Adeni abaabanga mu Terasali, bakatonda baago, baabayamba?

¹³Ali ludda wa kabaka wʼe Kamasi ne kabaka wʼe Alupadi ne kabaka wʼekibuga Sefarayimu oba owʼe Keena, oba owʼe Yiva?”

¹⁴Keezeekiya nʼaggya ebbaluwa mu mukono gwʼababaka nʼagisoma: Keezeekiya nʼayambuka mu nnyumba ya Mukama nʼagyanjuluza mu maaso ga Mukama.

¹⁵Nʼasaba ne yeegayirira Mukama nga agamba nti,

¹⁶ⓢ Ayi Mukama owʼEggye, Katonda wa Isirayiri, atuula wakati mu bakerubbi, ggwe Katonda wekka afuga obwakabaka bwonna obwʼomu nsi, ggwe wakola eggulu nʼensi.

¹⁷Otege okutu kwo Ayi Mukama owulire, ozibule amaaso go, Ayi Mukama, olabe: owulire ebigambo byonna ebya Sennakeribu byʼaweerezza okuvuma Katonda omulamu.

¹⁸“Mazima ddala Mukama, bakabaka bʼe Bwasuli baazisa amawanga gonna nʼensi zaago,

¹⁹ne basuula bakatonda baabwe mu muliro: kubanga tebaali bakatonda, naye mulimu gwa ngalo za bantu, miti na mayinja; kyebaava babazikiriza.

²⁰ⓣ Kale nno, ayi Mukama Katonda waffe, tulokole mu mukono gwa Sennakeribu, obwakabaka bwonna obwʼensi butegeere nga ggwe wekka ggwe Mukama.”

²¹Awo Isaaya mutabani wa Amozi nʼatumira Keezeekiya ngʼayogera nti, “Bwʼati bwʼayogera Mukama Katonda wa Isirayiri nti, Kubanga onneegayiridde ku bya Sennakeribu kabaka wʼe Bwasuli,

²²Kino kye kigambo kye mmwogeddeko:

²²‘Omuwala wa Sayuuni atamanyi musajja akunyoomye era akusekeredde. Omuwala wa Yerusaalemi anyeenyanyeenya omutwe gwe ngʼodduka.

²³Ani gwʼovumye gwʼovodde? Era ani gwʼoyimuyisirizzaako eddoboozi lyo nʼokanulira nʼamaaso? Omutukuvu wa Isirayiri!

²⁴Okozesezza abaddu bo okuvuma Mukama nʼoyogera nti, Nyambuse nʼamagaali gange amangi ku ntikko yʼolusozi, ntuuse ku njuyi ezʼomunda eza Lebanooni; era ntemedde ddala emivule gyakwo emiwanvu, nʼenfugo zaakwo ezisinga obulungi, era natuuka ne ku lusozi lwakwo olukomererayo, ekibira kyayo ekisinga obunene.

²⁵ⓤ Waduula nti wasima enzizi era nʼonywa nʼamazzi mu mawanga era nti ebigere byʼabajaasi bo byakaliza amazzi gʼomugga Kiyira mu Misiri.’

²⁵

²⁶“Ggwe towuliranga nti bino nabikola dda ne mbitegeka okuviira ddala mu biro ebyʼemabega? Kaakano nkituukirizza. Nakuwa ggwe obuyinza okugenda ngʼozikiriza ebibuga okubifuula entuumu yʼamafunfugu.

²⁷ⓥ Abantu baamu kyebaavanga baggwaamu amaanyi, ne baterebuka ne bakeŋŋentererwa ne baba ngʼessubi mu nnimiro, ngʼomuddo omuto, ngʼomuddo ogumera ku nnyumba ogwokebwa ne gufa nga tegunnakula.

²⁷

²⁸“Era mmanyi byonna ebikufaako; embeera yo, bwʼofuluma, ne bwʼoyingira era ne bwʼonneereegerako.

²⁹Kubanga oneereegeddeko, okwepanka kwʼokoze nkutuuseeko. Era kaakano ntuuse okuteeka eddobo mu nnyindo zo,[27] nʼoluuma ndufumite mu mimwa gyo, nkuzzeeyo ngʼopaala mu kkubo lye wajjiramu.”

³⁰Awo Isaaya nʼagamba Keezeekiya nti, “Kano ke kabonero akanaakuweebwa: Omwaka guno mugenda kulya eŋŋaano eyeemeza yokka. Eno gye muliryako nʼomwaka ogwokubiri. Mu mwaka ogwokusatu mulirya ku birime byammwe bye musize era ne mukungula mu nnimiro zammwe ezʼemizabbibu.

³¹Abantu ba Yuda abalifikkawo baliba ngʼebisimbe emirandira gyabyo nga gikka wansi ate nga bigimuka ne bibala.

³²Mu Yerusaalemi walibaawo abalisigalawo ne ku Lusozi Sayuuni walibeerawo abaliwona, kubanga Mukama Ayinzabyonna mu bumalirivu bwe, yeewaddeyo okukikola.”

³³“Noolwekyo bwʼati bwʼayogera Mukama ku Kabaka wʼe Bwasuli nti, Kabaka oyo tajja kuyingira mu kibuga kino okulasaamu akasaale ke, oba okukirumba nʼengabo oba okukitaayiza okukizikiriza oba okukizimbako olukomera.

³⁴Ekkubo lye yajjiramu lye limu lyʼanaakwata okuddayo. Tajja kuyingira mu kibuga kino,”

³⁴bwʼayogera Mukama.

³⁵“Kubanga nzija kulwanirira ekibuga kino nkirokole.”

³⁶Awo malayika wa Mukama nʼafuluma nʼatta mu lusiisira olwʼAbasuli abantu emitwalo kkumi na munaana mu enkumi ttaano. Abaasigalawo bagenda okuzuukuka enkya nga wonna wajjudde mirambo.

³⁷Awo Sennakeribu kabaka wʼe Bwasuli nʼavaayo nʼaddayo nʼabeera e Nineeve.

³⁸Lumu bwe yali ngʼasinziza mu ssabo lya Nisuloki katonda we, Adulammereki, ne Salezeri batabani be ne bamusalira olukwe ne bamutta: ne baddukira mu nsi ya Alalati. Esaludooni mutabani we nʼamusikira.